Abahawe ubwenegihugu batangaje ko bakabije inzozi
Imibereho

Abahawe ubwenegihugu batangaje ko bakabije inzozi

Imvaho Nshya

August 26, 2023

Ankunda Ambrose, ni umugande umaze imyaka isaga 10 atuye mu Rwanda. Ni kimwe na Ibui Karen Kakambi umunya-Kenya washakanye n’umunyarwanda bakaba bamaranye imyaka 5 babana nk’umugabo n’umugore.

Bombi kimwe n’abandi uko ari 14 bahawe ubwenwgihugu, bahuriza ku kuba bishimiye kuba abanyarwanda kandi ko inzozi zabo zigezweho.

Ankunda yagize ati “Turishmye turanezerewe kuba natwe tugiye mu muryango nyarwanda tukaza kubaka u Rwanda rwacu”.

Ashimira Perezida Paul Kagame ngo washyizeho gahunda nziza akavuga ati n’abandi bose bakenera kuba abanyarwanda ikaze. Ati “Uyu munsi byabaye turishimye cyane”.

Avuga ko ubusanzwe yakundaga u Rwanda akajya yifuza kuba umunyarwanda ni ho ahera agira ati “Ni yo mpmvu navuze nti reka mbusabe cya kifuzo cyanjye kizagerwaho”.

Ibui Karen Kakambi ukomoka muri Kenya na we wahawe ubwenegihugu avuga ko amaze imyaka 5 mu Rwanda kandi ko yashakanye n’umunyarwanda bityo rero ahitamo gusaba ubwenegehigu kugira ngo agire amahirwe amwe nk’umunyarwanda uwo ari we wese.

Mutsinzi Antoine, Umuyobozi Nshingwabikorwa w’Akarere ka Kicukiro, yavuze ko bakiriye indahiro z’abantu 14 barimo Abagande 6, Abarundi 4, Umuhinde 1, Umunya-Nigeria 1, Umunya-Kenya 1 n’uwo muri Switzerland 1.

Yavuze ko aba bose bafite imico itandukanye baje basanga Kicukiro nabo bafite uburyo bari babayeho.

Yagize ati “Nkuko nabivuze icyo twishimira ni uko baza tukigirana hamwe.

Iyo batuye muri Karitsiye baba bagomba gusabana na bagenzi babo babana. Ni cyo dukangurira abaturage bacu, kwakira abaje batugana neza tukabigiraho na bo bakatwigiraho”.

Ubuyobozi bwa Kicukiro busaba abahawe ubwenegihugu gufatanya n’Abaturage ba Kicukiro kubaka igihugu aho batuye mu mudugudu.

Rusanganwa Jean Damascène, Umuyobozi wa Serivisi zigenewe abenegihu mu Kigo gishinzwe Abinjira n’Abasohoka, yasobanuye bimwe mu bishingirwaho kugira ngo umunyamahanga ahabwe ubwenwgihugu.

Yagize ati “Umunyamahanga washakanye n’umunyarwanda bamaranye imyaka 5 babana nk’umugabo n’umugore yemerewe gusaba ubwenegihugu.

Umwana w’umunyamahanga watoraguwe ku butaka bw’u Rwanda uwo na we ahabwa ubwenegihugu.

Iyo atarageza imyaka y’ubukure 18, hakamenyekana ubwenegihugu bwe, bwa bunyarwanda arabutakaza agafata ubwenegihugu bwe.

Iyo abimenye yaramaze kugeza imyaka y’ubukure, yemerewe kugumana ubwenegihugu yahawe.

Umunyarwanda wemeye kugira umwana w’umunyamahanga umwana we ataramubyaye bikaba byanditse mu mategeko, uwo mwana ahita ahabwa ubwenegihugu.

Ikindi ni uko mu nyungu z’igihugu, mu bushishozi bwacyo kibona kigukeneye, gishobora kukugira ubwenegihugu”.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA