Abajyanama b’Ubuzima bagiye kugabanywa, hongerwemo urubyiruko
Amakuru

Abajyanama b’Ubuzima bagiye kugabanywa, hongerwemo urubyiruko

NTAWITONDA JEAN CLAUDE

July 7, 2022

Minisiteri y’Ubuzima yatangaje ko hari gahunda yo kuvugurura urwego rw’Abajyanama b’Ubuzima mu Gihugu hose, mu rwego rwo kurushaho kunoza imikorere n’imikoranire y’abagize uru rwego muri iki gihe serivisi z’ubuzima zikomeje gutera imbere mu bijyanye n’ikoganabuhanga.

Kimwe mu birimo gutegurwa ni ukugabanya Abajyanama b’Ubuzima bakava ku basaga 58,000 babarizwaga mu Gihugu, bakagera munsi ya 35,000 kandi na bo bakongerwamo abakiri bato bashobora kwiga no kumenya vuba ikoranabuhanga rigezweho mu buvuzi ndetse bakanakora imirimo ikwiriye.

Icyo cyemezo cyafashwe nyuma y’ubushakashatsi bwakozwe ku rwego rw’Abajyanama b’Ubuzima mu Rwanda, bwatangiye gukorwa kuva mu mwaka wa 2016 kugeza mu 2021.

Mu biganiro bigamije kwigira hamwe uko urwego rw’Abajyanama b’Ubuzima rwakubakwa rukanashyigikirwa mu buryo burambye byahuje inzego z’ubuzima mu Rwanda n’abafatanyabikorwa babo, Minisitiri w’Ubuzima Dr. Ndamije Daniel yavuze ko ubwo bushakashatsi bwagaragaje ko mu Rwanda hari Abajyana b’Ubuzima bamaze kugira imyaka iri hejuru ya 65.

Nubwo abo Bajyana b’Ubuzima batanze serivisi zagize uruhare mu kugabanya imfu z’abana bapfa bakivuka, kugabanya Malariya, indwara z’umusonga n’izindi, amavugururwa arimo gukorwa azasiga uru rwego rwiganjemo abafite imyaka iri hagati ya 21 na 45.

Dr. Ndamije yavuze ko ibyo bigiye gufasha mu guhugura abazatoranywa bari muri iyo myaka bakaba babasha gutanga serivisi zatangwaga n’Abajyana batandukanye mu Mudugudu umwe, kandi bikanaborohera mu gukoresha ikoranabuhanga mu mikorere n’imikoranire n’izindi nzego.

Ati: “Mu gushaka kuvugurura iyi Porogaramu y’Abajyanama b’Ubuzima turashaka gusubiza ibibazo bitandukanye birimo icy’imyaka kuko harimo abafite intege nkeya batagishobora gukora izo nshingano, ikindi turashaka no kuzana ikoranabuhanga mu mikorere y’Abajyanama b’Ubuzima aho usanga dukeneye ko tugira abantu bakiri bato bashobora kwiga ubumenyi bushyashya bakoresha ikoranabuhanga ryadufasha gutanga raporo, gukurikiranwa, no kuba twabagira inama twifashishije ikoranabuhanga.

Yavuze ko gutoranya Abjyanama b’Ubuzima bakiri bato bizatuma Umujyana umwe asimbura abandi bose bakoranaga mu Mudugudu, akazajya yongererwa ubumenyi n’ubushobozi hatabayeho gutagaguza ubushobozi mu Bajyanama bakorera hamwe.

Yakomeje amara impungenge abazaba bacyuye igihe ko bazakomeza gukorana bya hafi n’icyiciro gishya cy’Abajyanama b’Ubuzima babagira inama, babasangiza ubunararibonye ndetse n’imigabane bafite mu makoperative bahuriramo bakazayigumana.  Ati: “Tuzabita Abajyana b’Ubuzima b’Icyubahiro.”

Minisitiri w’Ubuzima Dr. Ngamije Daniel

Dr. Ngamije yavuze kandi ko amavugurura agiye gukorwa azakemura ikibazo cy’Abajyanama b’Ubuzima bimukaga aho batuye bikagorana kubona ababasimbura. Mu gutoranya Umujyanama w’Ubuzima hagiye kujya harebwa no ku kuba ari wa wundi uzakorana n’abaturage mu buryo burambye.

Abajyanama b’Ubuzima batangiye mu mwaka wa 1995, icyo gihe babarirwaga mu 12,000 bakorera ku rwego rw’Akagari. Ariko uko imyaka yagiye yiyongera na bo babaye benshi kubera ko n’inshingano zabo zagiye ziyongera.

Uko bagiye biyongera ni na ko inshingano zabo zagiye zigabanywa, ndetse zikanegerezwa abaturage. Kuri ubu hari abavura indwara zirimo Malariya, umusonga n’impiswi, abatanga serivisi zijyanye n’imyororokere no kuvura indwara zijyanye na yo, ndetse n’abita ku isuku no guteza imbere inzego z’ubuzima mu Mudugudu.

Minisitiri Dr. Ngamije yavuze ko mu gihe buri cyiciro cyasabaga Umujyanama w’Ubuzima, kuri ubu izo serivisi zose zizajya zitangwa n’umuntu umwe wabihuguriwe kandi ufite ibikoresho bihagije.

Ati: “Ubu impinduka dushaka gukora ni uko tugira umubare usobanutse n’akazi gasaranganyijwe kuko buri wese azaba afite ubushobozi bwo gukurikirana ingo zose kandi afite ubushobozi bwo gutandukanya ibibazo by’ubuzima bazaba bafite… Birumvikana ko tugiye kugira bake, bahuguwe neza kuri porogaramu zose. Turava ku bihumbi 58 tugere kuri hafi ibihumbi 35; murumva ko n’ubushobozi buzaba buri gusaranganywa mu bantu bakeya ariko imikorere irusheho kuba myiza uko bazaba bakora buzuzanya kandi basaranganya akazi kabo.”

Dr. Theopista John Kabuteni, waje ahagarariye Umuyobozi w’Ishami ry’Umuryango w’Abibumbye ryita ku Buzima (OMS) mu Rwanda, yavuze ko bishimira umusaruro gahunda y’Abajyanama b’Ubuzima ikomeje gutanga ku rwego mpuzamahanga, kuko igira uruhare rukomeye mu guhangana n’indwara zitandukanye.

Yavuze ko OMS yashyizeho uburyo bugamije kwereka ibihugu uko byakorana n’Abajyanama b’Ubuzima mu gukemura ibibazo bibangamiye ubuzima bw’abantu, anashimangira ko ari ingenzi cyane kwinjiza urubyiruko mu Bajyanama b’Ubuzima.

Ati: “Nka hano mu Rwanda bahisemo guhera ku myaka 21 ariko ahandi bashobora kujya munsi yayo cyangwa bakajya hejuru. Icyo abatoranywa bakwiye guhuriraho ni ukugenerwa amahugurwa ahoraho kugira ngo babashe gukora kinyamwuga.”

Uwizeye Marcel, Umuyobozi Mukuru w’Ibitaro bya Byumba, yashimiye uruhare rw’Abajyanama b’Ubuzima mu gutanga ubuvuzi bw’ibanze. Ati: “Abajyanama b’Ubuzima ni bo bantu bakomeye cyane badufasha mu kurinda abaturage bacu kuko ibyo bakora byinshi ni ibirinda indwara n’ibindi bibazo bitandukanye by’ubuzima.”

TANGA IGITECYEREZO

  • MUKANDINDA Beatha
    July 8, 2022 at 5:30 am Musubize

    Birakwiye rwose kuko kugeza ubu inshingano zabaye nyinshi k’umujyanama w’ubuzima Kandi zirimo ubuhanga usanga rero abajyanama bakuze cyane ndetse nabadafite ubumenyi buhagije badashobora kuzuzuza neza.urugero:Gukora raporo no gutanga Rapidsms,kuzuza neza ibitabo nibindi.Bamwe urabigisha ariko ntibabyumve

    • MUKANDINDA Beatha
      July 8, 2022 at 5:33 am Musubize

      Badashobora kuzuzuza neza ibyo bashinzwe

    • Mukantabana Alice
      July 8, 2022 at 12:30 pm Musubize

      Technologie itugeza ku murim’unoze Kandi wihuse

  • KABISAMA Bernardine
    July 10, 2022 at 1:26 pm Musubize

    Iterambere ry’ikoranabuhanga niryiza Kandi turarishyigikiye,ariko hari abarengeje imyaka 45 Bashoboye Kandi hafite ubushobozi mu ikoranabuhanga ubwo uwo mujyanama bizagenda gute afite imyaka 50?
    2.kohari abafite imyaka 21 kugeza kuri 45 badashoboye bwo bizagenda gute?
    3.koharigihe bigeze kuvuga ko kugirango ube umujyanama w’ubuzima n’uko utarenza imyaka 55 ariko abarimo bagakomeza imirimo
    4.kubw’iterambere habaho kwigisha bose ikoranabuhanga tukagendana naryo
    Urugero:abarimu haje iterambere ry’indimi abakera barize mu gifaransa iterambere rije dukoresha icyongereza abakera bashyizeho umuhate bariga ubu bose Bari kwigisha kandi neza
    Natwe twabikora,ahar’ubushake birashoboka murakoze

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA