Abakinnyi 4 ba Paris Saint-Germain bagiriye ibihe byiza mu Rwanda
Amakuru

Abakinnyi 4 ba Paris Saint-Germain bagiriye ibihe byiza mu Rwanda

Imvaho Nshya

May 2, 2022

Guhera ku wa Gatandatu taliki ya 30 Mata, u Rwanda rwakiriye abakinnyi bane b’Ikipe ya Paris Saint Germain (PSG) bishimiye kuba bagiriye ibihe byiza muri uru ruzinduko rw’iminsi itatu basuyemo ibice bitandukanye by’Igihugu muri gahunda ya Visit Rwanda.

Abo bakinnyi bari kumwe n’imiryango yabo muri urwo ruzinduko rw’iminsi itatu ni Julian Draxler, Thilo Kehrer, Keylor Navas na Sergio Ramos. Bakaba baje mu bufatanye bw’u Rwanda n’iyi kipe mu bukangurambaga bwo gushishikariza abatuye Isi gusura u Rwanda.

Aba bakinnyi n’imiryango yabo bishimiye uburyo bakiranywe urugwiro bakigera mu Rwanda ndetse n’ahantu hose bagiye basura cyane cyane mu duce nyaburanga n’ahabitse amateka y’Igihugu.

Bagize amahirwe yo guhura n’inyamaswa eshanu nini ziba muri Pariki y’Igihugu y’Akagera ari zo intare, inzovu, inkura, imbogo n’ingwe. Banabonye kandi imparage, ifumbeli n’izindi nyamaswa zitandukanye zituye muri iyi Pariki.

Aba bakinnyi n’imiryango yabo basobanuriwe ko pariki y’Igihugu y’Akagera ari ko gace gatoshye kanini mu Gihugu kagwiriyemo amoko y’inyamaswa zitandukanye ziba mu mukenke, bikaba ari na byo bikagira icyanya cyihariye cy’ubukerarugendo gituwe n’inyamaswa zisaga 130,000.

Ku munsi w’ejo na bwo  aba bakinnyi basuye Urwibutso rwa Jenoside rwa Gisozi bunamira inzirakarengane zazize Jenoside yakorewe Abatutsi mu Rwanda, aho abarenga miliyoni bishwe mu minsi 100 gusa.

Aba bakinnyi basuye na Pariki y’Igihugu y’Ibirunga aho bagiye guhura n’imiryango itandukanye y’ingagi zo mu misozi, bakanirebera n’urundi rusobe rw’ibinyabuzima birangwa muri iyi Pariki iri mu byanya bikomye byagizwe Umurage w’Isi na UNESCO.

Uru ruzinduko ruje rukurikira urw’ibindi byamamare bibiri bya Paris Saint Germain biheruka gusura u Rwanda ari byo Youri Djorkaeff waje mu 2020 na Rai waje mu 2021.

Umuyobozi Mukuru w’Urwego rw’Igihugu rw’Iterambere (RDB) Clare Akamanzi, yavuze ko u Rwanda rutewe ishema no kwakira abakinnyi b’iyi kipe yubatse izina rikomeye mu ruhando mpuzamahanga.

Yagize ati: “Dutewe ishema no kwakira abakinnyi ba Paris Saint-Germain n’imiryango yabo, tukaba twaberetse ko u Rwanda rufite ibintu byinshi byiza byo gutanga. Ubu bufatanye dufitanye na Paris Saint-Germain bwatanze umusaruro ufatika guhera mu mwaka wa 2019. Uku udusura ni amahirwe yo kwereka abafana b’iyi kipe aho bari ku Isi yose ubwiza bwihariye bw’Igihugu cyacu. Tuzishimira kwakira n’abandi bakinnyi, abahoze ari abakinnyi n’abafana ba PSG mu gihe kizaza no kurushaho kubereka ibyiza nyaburanga by’akataraboneka.”

Umuyobozi ushinzwe ubufatanye bwa PSG n’abafatanyabikorwa Marc Armstrong, na we yongeyeho ko bishimira kuba abakinnyi b’iyi kipe babonye amahirwe yo gusura u Rwanda.

Ati: “Usibye kuba bagaragaza ibirango bya Visit Rwanda ku myambaro bambara bari mu myitozo, ubu noneho bashobora gusobanura mu buryo bufatika igitekerezo cy’urugwiro rw’Abanyarwanda, uko bahanga udushya n’ibyiza karemano by’u Rwanda. Ibyo bifasha gushimangira umubano w’u Rwanda na Paris Saint Germain kuko usanga harimo ingendo z’abakinnyi b’ahashize, ab’ubu n’ab’igihe kizaza.”

Yakomeje ahamya adashidikanya ko aba bakinnyi n’imiryango yabo baje mu Rwanda bishimiye uko bakiriye kandi bakaba barananyuzwe n’ibyiza biboneye batari barigeze babona ahandi, kandi batazibagirwa.  

Mu mwaka wa 2019 ni bwo u Rwanda rwasinyanye amasezerano y’imyaka itatu na Paris Saint Germain agamije ubufatanye mu kumenyekanisha ibyiza nyaburanga by’u Rwanda ku bafana b’iyi kipe ku Isi yose.

Ayo masezerano ashingiye ku nkingi eshatu ari zo: ubufatanye mu guteza imbere umuco n’ubugeni, guharanira ubumwe mu kuba indashyikirwa ndetse no guteza imbere umupira w’amaguru.

Mu mwaka ushize, Paris Saint-Germain yatangije Ishuri ryigisha umupira w’amaguru mu Rwanda rikomeje kugira uruhare mu gutegura impano z’abana bakiri bato. Nyuma y’amezi iryo shuri ritangiye u Rwanda na PSG byatangije ubukangurambaga bushya bugamije kugaragaza uduce nyaburanga dukurura ba mukerarugendo mu Gihugu, kugaragaza ibikorwa remezo bya siporo n’ibiranga umuco by’umwihariko ikibuga cya Golf cyuzuye mu Mujyi wa Kigali.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA