Abakinnyi ba AS Kigali banze gukora imyitozo kubera ubukene
Amakuru

Abakinnyi ba AS Kigali banze gukora imyitozo kubera ubukene

SHEMA IVAN

March 15, 2024

Abakinnyi ba AS Kigali banze kujya gukora imyitozo kuko ubuyobozi bwanze kubakemurira ikibazo cy’imishahara baberewemo igera ku mezi ane.

Ibi byabaye mu gitondo cyo kuri uyu wa Gatanu, tariki ya 15 Werurwe 2024, ubwo hari hateganyijwe imyitozo y’iyi kipe kuri Kigali Pelé Stadium.

AS Kigali iri mu makipe afashwa n’Umujyi wa Kigali utarayiha amafaranga uyirimo, imaze igihe mu bibazo by’amikoro aho muri iki gihe iri kugorwa n’ibibazo by’ubukungu butifashe neza mu byiciro bitandukanye harimo no guhemba abakinnyi.

Ibi ni byo byatumye Umutoza wayo Guy Bukasa n’abungiriza be bagera ku kibuga aho bagombaga guhurira bagasanga nta n’inyoni itamba kuko hagati y’abakinnyi bumvikanye ko nta mafaranga barabona batagomba kwitabira imyitozo.

Ibi bibazo byatangiye mu ntangiriro z’umwaka w’imikino kuko iyi kipe yagowe no kugura abakinnyi ndetse na bake mu bo yari isigaranye bihanganye nubwo yari ibafitiye imyenda.

Abakinnyi bagiye bagabanyirizwa imyenda bishyurwa mu buryo butandukanye ariko kugeza ubu hari bamwe bagifitiwe amafaranga yo mu mwaka ushize ndetse muri rusange bose bakaba bafitiwe amezi agera muri ane badakozwa icyitwa umushahara.

Iyi kipe ifashwa n’uwari Perezida wayo, Shema Fabrice, yikoze ku mufuka abaha uduhimbazamusyi mu bihe bitandukanye bibafasha kuva mu mwanya mubi yari irimo mu minsi ishize, aho yari mu makipe arwana no kutamanuka mu cyiciro cya kabiri.

Kugeza ubu AS Kigali iri ku mwanya wa gatandatu ku rutonde rw’agateganyo rwa Shampiyona igeze ku munsi wa 24.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA