Abakobwa biganje mu bize TVET batangiye ibizamini ngiro bya Leta
Amakuru

Abakobwa biganje mu bize TVET batangiye ibizamini ngiro bya Leta

NTAWITONDA JEAN CLAUDE

June 28, 2022

Ku wa Mbere taliki ya 27 Kamena 2022, abanyeshuri barenga ibihumbi 21 barimo abiga mu mashuri y’imyuga n’ubumenyi ngiro (TVET) n’abakandida bigenga basaga 1 000, batangiye gukora ibizamini ngiro bya Leta (Practical Exams) bigenewe abanyeshuri basoza muri ayo mashuri ya TVET.

Mu gihe mu myaka yashize abahungu ari bo babaga biganje mu mashuri y’imyuga n’ubumenyi ngiro, imibare y’abatangiye ibizamini ngiro muri uyu mwaka iragaragaza ikinyuranyo kuko, abakobwa ari bo biganje.

Ubuyobozi bw’Ikigo cy’Igihugu gishinzwe Ibizamini n’Ubugenzuzi bw’Amashuri (NESA) buvuga ko muri rusange abanyeshuri 20,136 biyandikishije gukora ibizamini barimo abahungu 8,929 b’abakobwa 11,207. Abagandida bigenga bo uko ari 1,414 barimo ab’ibitsina gabo 904 n’ab’igitsina gore 510.

Ku rwego rw’Igihugu, ibizamini ngiro bya Leta byatangirijwe ku  Ishuri Ryisumbuye ry’Imyuga rya SOS riri i Gacuriro/ Kinyinya mu Karere ka Gasabo (SOS Techinical High School), rifite abakandida 190 bari gukora ibizamini, bakaba barimo abahungu 60 n’abakowa 130.

Umuyobozi Mukuru wa NESA Dr Bernard Bahati, yavuze ko ibizamini ngiro bya Leta byahuriranye n’ibizamini bisoza igihembwe cya gatatu cy’uyu mwaka birimo gukorwa mu mashuri yose yo mu Gihugu, ariko bikaba binabanjirije ibizamini byanditse bizatangira ku ya 26 Nyakanga.

Yavuze ko ibizamini ngiro bya Leta bifasha NESA gusuzuma ubushobozi bw’abanyeshuri biteguye kujya ku isoko ry’umurimo cyangwa gukomeza muri kaminuza.  

Abatangiye gukora ibizamini ngiro babarizwa mu mashami y’imyuga 36 irimo ubwubatsi, ububaji, gusudira, ikoranabuhanga, ubukanishi, ubudozi, amashanyarazi, gukora ibikoresha amashanyarazi (electronics), ubuhinzi n’indi itandukanye.

Yemeje ko Leta yishyuriye aba banyeshuri ibikoresho bifashisha mu bizamini ngiro bifite agaciro k’amafaranga y’u Rwanda miliyoni 800, kugira ngo barangize kwiga bashoboye gukora ibifite ireme.

Umuyobozi wa SOS Technical High School yavuze ko abanyeshuri bakoreye kuri iyo site biga mu ishuri rye n’abaturutse kuri APAPER na World Mission TVET School.

Yizeye ko abanyeshuri biga ku kigo ayoboye bazatsinda neza kuko bahawe ubumenyi bwose bw’ingenzi bwabongereye ubushobozi bwo guhanga udushya n’ubwo kuba bahangana ku isoko ry’umurimo igihe baba basoje amasomo yabo.

Abanyeshuri barimo gukora ibizamini ngiro na bo bavuga ko bifitiye icyizere kuko igihe bamaze biga kitababereye imfabusa. Honnete Keza Nshutiyayesu, yavuze ko icyumweru u Rwanda rwakiriyemo Inama y’Abakuru b’Ibihugu na Guverinoma bibarizwa mu Muryango wa Commonwealth (CHOGM) cyababereye amahirwe yo gusubiramo amasomo byimbitse kuko batajyaga ku ishuri cyangwa ngo bagire ibindi bintu bibarangaza.

Biteganyijwe ko ibizamini byanditse bigenewe abarangije muri TVET  bizatangira gukorwa ku ya 27 bigasozwa ku ya 2 Kanama 2022.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA