Abakoresha abantu bafite ubumuga barabavuga imyato
Imibereho

Abakoresha abantu bafite ubumuga barabavuga imyato

Imvaho Nshya

August 26, 2023

Abikorera bakoresha bamwe mu bakozi bafite ubumuga butandukanye baremeza ko gukoresha abafite ubumuga byabafashije kongera umusaruro ndetse n’ubwiza bwawo bakaba bamaze kuzamura umusaruro w’ibigo bakorera.

Umuyobozi wa Kompanyi mpuzamahanga (Aubin Produce International ltd) Niyindorera Aubin Guershom avuga ko Kompanyi ye ikora ubucuruzi mpuzamahanga bwo kugemura ubuki, imiteja n’ibindi bikomoka ku mbuto kandi ibyo bakora abafite ubumuga basaga 400 ku bakozi ibihumbi 2000 bafite, babigiramo uruhare rukomeye kuko bita ku musaruro ukaba mwiza kuko bawitondera.

Yagize Ati: “Dutangira gukora twabonye ko abafite ubumuga bashobora kudufasha bakikorera kandi bakihemba kuva muri 2017. Dutangira uyu mushinga twawutangiye dukorana n’abafite ubumuga butandukanye burimo ingingo no kutavuga no kutumva bagera kuri 400 mu bakozi 2000 dukorana ariko badukorera ibyo dushaka bakabasha kuduha umusaruro twifuza kandi mwiza ariko turashishikariza abandi bikorera kwibuka ko abafite ubumuga na bo bafasha mu iterambere ry’Ibigo bakorera”.

Umuyobozi wa Aubin Produce International ijyana ibicuruzwa mu mahanga akaba akorana n’abafite ubumuga 400 ku bakozi 2000 bakora bihemba

Umuyobozi wa Stafford Coffee Brewers, Rubagumya Stafford avuga ko afite amaduka acuruza ikawa mu turere tw’Intara y’amajyepfo n’i Kigali avuga ko mu mwaka wa 2021-2022 yatangiye gukoresha abakozi bamwe muri bo bafite ubumuga bwo kutavuga ndetse umusaruro wiyongereyeho 15% ugereranyije na mbere.

Ati “Dufite amaduka acuruza ikawa kuri uyu muhanda wa Kigali Butare ariko kuva twatangira gukoresha abafite ubumuga, abatugana batugiriye icyizere n’umusaruro wacu wazamutseho 15% ugereranyije n’uwo twabonaga mbere, tukabikesha umuhate n’ubushobozi bwo gutekereza neza byaba abakozi bakoresha umuhate wo kwita ku kazi, ku bakozi bacu bafite ubumuga, nkakangurira n’abandi bikorera kuko byarushaho kuzamura ibigo bakorera bigatera imbere kuko ibyo umwigishije yongeraho ibindi kandi akabikora neza”.

Mukamusana Sylvie afite ubumuga bw’Ingingo avuga ko hari abafite ubumuga bafite ubushobozi bwo kubona akazi mu bikorera ariko usanga bakimwa kubera ibikoresho bashobora gusaba abakoresha kugira ngo babashe gukora bisanzuye ariko iyo batabibonye abatanga akazi bagaha abandi.

Umuyobozi Mukuru w’Umuryango Feed the Future Rwanda Hanga Akazi, Timoty Shumaker, yemeza ko uyu muryango mu myaka itanu igiye gukurikiraho bazafasha abadafite akazi kukabona bagera ku bihumbi 23 bakabona ibyo bakora ndetse bazahanga imirimo igera ku bihumbi 19.

Yongeraho ko uyu mushinga uzibanda cyane ku byiciro by’abafite ubumuga kugira ngo be gusigara inyuma na bo bagomba kubona icyo bakora ariko tunifuza ko ibigo bikomeye bitandukanye bibaha akazi kugira ngo bakore kandi twizeye ko bizashoboka kuko abatangiye gukoresha aba bakozi batangiye kubona umusaruro mwiza kuko ibyo bakora babikora neza bityo ntawukwiye kugira impungenge ku bushobozi bw’Abafite ubumuga mu kazi kuko barashoboye.

Uyu mushinga Feed the Future -Hanga Akazi uzakorera mu Turere twose tw’Igihugu ukazamara imyaka 5 ukazagera ku bashaka akazi bagera ku bihumbi 23 ndetse hakazahangwa imirimo ibihumbi 19 ukazakorana n’abakora mu buhinzi no mu bindi bice hagamijwe gukangurira abafite ubumuga kwitabira imirimo itandukanye harimo n’ubuhinzi ariko abafite ubumuga bagaherwaho kuko na bo bashobye.

Gusa ntabwo byoroshye kumenya neza abafite ubuga bafite akazi ndetse bikarushaho kugora abikorera baba abafite inganda n’ibindi kubasha guha akazi abafite ubumuga kubera ibikorwa remezo birimo n’ibikoresho byo korohereza aba bakozi gukora neza inshingano zabo mu kazi baba bahawe.

Umuyobozi w’Uruganda rutunganya amata n’ibiyakomokaho rwa Masaka Creamery yagaragaje imikorere y’abantu bafite ubumuga n’umusaruro batanga

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA