Abanyarwanda 8 birukanywe na Niger basabiwe gusubizwa i Arusha byihuse
Amakuru

Abanyarwanda 8 birukanywe na Niger basabiwe gusubizwa i Arusha byihuse

NTAWITONDA JEAN CLAUDE

February 8, 2022

Umucamanza w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) Joseph Chiondo Masanche, yategetse ko Abanyarwanda umunani baheruka kwirukanwa na Niger basubizwa byihuse ku cyicaro cy’uru rwego i Arusha muri Tanzania.

Mu nyandiko y’icyemezo yafashe ku wa Mbere taliki ya 7 Gashyantare, Umucamanza Joseph Chiondo Masanche yise iki kibazo ‘akaga’, yongeraho ko Niger yishe amasezerano yagiranye naLoni ubwo yemeraga kwakira abo bagabo binangiye bakanga kugaruka mu Rwanda nk’igihugu cyabo nubwo cyabahaye ikaze .

Abo bagabo ni Francois-Xavier Nzuwonemeye, Prosper Mugiraneza, Anatole Nsengiyumva, Protais Zigiranyirazo, Alphonse Nteziryayo, Andre Ntagerura, Tharcisse Muvunyi, na Innocent Sagahutu.

Muri aba, babiri bari Abaminisitiri, abandi bari abasirikare bakuru, hamwe na muramu w’uwari Perezida Juvénal Habyarimana ari we Protais Zigiranyirazo wamenyekanye ku izina rya “Z” mu yahoze ari Perefegitura ya Gisenyi.

Bamwe bagizwe abere abandi barangiza ibihano bari barakatiwe n’urukiko rwa Arusha ku byaha bya Jenoside yakorewe Abatutsi, Urwego rwa IRMCT rukavuga ko bityo ubu ari abere kandi bafite uburenganzira bwose.

Mu kwezi k’Ugushyingo 2021 mu Kanama ka Loni gashinzwe Umutekano, Leta ya Niger yemeye kwakira abo bagabo, gusa hashize igihe gito ihita isohora inyandiko ibategeka kuva ku butaka bwayo mu minsi irindwi “ku mpamvu za diplomasi”.

Leta ya Niger yavuze ko yafashe icyo cyemezo kubera impungenge yagejejweho na Leta y’u Rwanda ku kuba kw’abo bantu ku butaka bwa Niger, cyane ko hari ibimenyetso simusiga bigaragaza ko bamwe muri bo bijanditse mu bikorwa by’ubugizi bwa nabi na nyuma y’uko barekurwa n’icyahoze ari Urukiko Mpuzamahanga Mpanabyaha rwashyiriweho u Rwanda (ICTR).

Abo bagabo bavuze ko bambuwe ibyangombwa byabo kandi bagafungirwa mu nzu i Niamey, mu gihe bari bategereje kugira ahandi berekezwa. Bavuze ko batifuza gusubira mu gihugu cyabo cy’u Rwanda “ku mpamvu z’umutekano wabo”.

Mu cyumweru gishize, umunsi umwe mbere y’uko igihe ntarengwa bari bahawe na Niger kirangira, Innocent Sagahutu yabwiye BBC Gahuzamiryango ko “batazi aho bazerekeza”.

Umucamanza Chiondo Masanche yavuze ko “ibyabonekaga nk’icyemezo cyishimiwe n’uru rwego na Leta ya Niger – ubu cyahindutse ibishobora kuba ari uguhonyora uburenganzira bwa muntu.”

Mu kwisubiraho ikirukana abo bantu, umucamanza Chiondo Masanche yavuze ko Niger yishe ingingo z’ubwumvikane yari yemeye, igafata umwanzuro yonyine itamenyesheje ruriya rwego.

Umucamanza yagize ati: “None kubw’ibyo ntegetse umukuru (w’urwo rwego) guhita afatanga ingingo zose za ngombwa agategura ibikwiye kugira ngo abo bantu bagarurwe ku ishami rya Arusha by’agateganyo kugeza boherejwe mu kindi gihugu.”

Bivugwa ko uru rwego ari rwo rufata mu nshingano abarangije ibihano byabo kugeza babonye ibihugu baturamo, ariko iyo ngingo ntivugwaho rumwe kuko yagaragaye gusa kuri abo Banyarwanda na bo barangije ibihano ku buryo u Rwanda rutagifite icyo rubakurikiranaho nubwo bo ubwabo bagifite impungenge zaba zishingiye ku rwikekwe rw’ibyo bishinja.

Umucamanza yavuze ko abo Banyarwanda bashobora koherezwa mu rwanda igihe ari bo ubwabo babyihitiyemo kandi ngo bigakorwa hubahirijwe amategeko mpuzamahanga aho ijwi ryabo n’ibyifuzo bafite byakubahirizwa.

Avuga ko ibyakozwe na ICTR ari ugushaka uburyo abo baturage bakomereza ubuzima bwabo mu bindi bihugu bumva batekanyemo nubwo ibihugu bitandukanye byanze kubakira bitewe n’amateka y’abo bagabo n’ibyaha bakurikiranyweho nubwo bagizwe abere.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA