Abanyarwanda bamaze kubona ibidukikije nk’isoko y’umurimo-REMA
Amakuru

Abanyarwanda bamaze kubona ibidukikije nk’isoko y’umurimo-REMA

NTAWITONDA JEAN CLAUDE

June 4, 2022

Ikigo cy’Igihugu gishinzwe kurengera Ibidukikije (REMA) kivuga ko hari intambwe igaragara imaze guterwa mu kurengera ibidukikije kuko Abanyarwanda bamaze kubibona nk’isoko y’umurimo.

Umuyobozi Mukuru wa  REMA Kabera Juliet, mu kiganiro n’itangazamakuru yagize ati: “ …kubona Abanyarwanda bibumbiye muri koperative zitandukanye  batangiye kubona ibidukikije nk’isoko y’umurimo; twabonye abakora amakaro muri pulasitiki, abakura amarebe mu biyaga bagakoramo imyenda, aho bakora iby’ubugeni byo gushushanya n’ibindi. Icyo ni cyo kidushimisha kurusha ibindi kubona ibidukikije biva mu byo kuvuga mu magambo, muri politiki, mu mategeko, mu nyigo noneho bikaba byarageze mu bantu babibona nk’ isoko y’umurimo”.

Umuyobozi Mukuru wa REMA Kabera Juliet

Ni mu gihe bamwe mu bafite imishinga yo kurengera ibidukikije banahawe n’ibihembo ku wa 3 Kamena 2022, ubwo u Rwanda rwizihizaga Umunsi Mpuzamahanga w’Ibidukikije, kugira ngo bakomeze kuyagura.

Mu yahembwe harimo uwo gukora amakaro mu macupa ya pulasitiki n’amashashi, uwo gukora ibikoresho byifashishwa n’abagore n’abakobwa mu gihe bari mu mihango, ubuhinzi n’ubworozi bikorwa mu buryo bwo kurengera ibidukikije n’indi.

Ibiri muri iyi mishinga yahawe miliyoni 7 z’amafaranga y’u Rwanda, indi ibiri ihabwa miliyoni 5.

Murorunkwere Saidath umwe mu bakoze umushinga wo kurengera ibidukikije,  yavuze ko bya bintu abantu batekereza ko ari ibyo kujugunywa bitagifite akamaro ari  byo bo babyaza umusaruro.                            

 Ati: “… Dukoresha amacupa ya pulasitiki, tugakoresha zino mpapuro twandikaho zaba izanditse cyangwa izitanditseho, dukoramo imitako itandukanye irimo iyo mu nzu, iyo kwambara; amaherena, iningi n’amasahane umuntu ashobora kuriraho ibiryo n’ibindi”.

Minisitiri w’Ibidukikije Dr Mujawamariya Jeanne d’Arc na we yashimye iyi ntambwe agira ati: “Turashima uruhare Abanyarwanda n’Abaturarwanda bakomeje kugaragaza mu kurengera ibidukikije mu rugamba rw’iterambere rirambye. Dukomereze aho, inzira iracyari ndende, duhitemo gukoresha umutungo kamere mu buryo burambye”.

 Yakanguriye Abanyarwanda gukomeza inzira yo kwita ku bidukikije, ati: “Uruhare rwa buri wese mu Rwanda rurakenewe. Kubungabunga ibidukikije ni bwo buryo bwiza bwo kugira ngo iyi si isugire! Tugire ijwi rimwe, dufatanyirize hamwe, twiteze imbere kandi dufata neza  umutungo kamere, urusobe rw’ibinyabuzima n’ indiri zarwo”.

Yongeyeho ati: “Muri iyi si dutuye, ni ho honyine dukura umutungo kamere udufasha kubaho mu buzima bwacu bwa buri munsi. Aha twavuga: amazi, ubutaka, isanzure, umwuka duhumeka, amashyamba, urusobe rw’ ibinyabuzima n’ ibindi. Ibi bikatwereka ya sano ikomeye dufitanye n’ isi cyangwa se ibidukikije”.

Minisitiri Dr Mujawamariya yavuze ko uyu mutungo kamere ufashwe neza, bizafasha abantu  kugira ubuzima bwiza, guhumeka umwuka mwiza, kugera ku bukungu burambye  kandi bagasigira ababakomokaho  Isi idafite ubwandu.

Ati: “Mu Rwanda natwe twugarijwe n’ ibikorwa bya muntu byangiza isi dutuye cyangwa ikoreshwa nabi ry’ umutungo kamere; gutema ibiti cyangwa amashyamba adakuze;  guhumanya ikirere  hatwikwa imyanda cyangwa ibiyorero, kudasuzumisha ibinyabiziga ku gihe, inganda zirenga ku mabwiriza y’ ubuziranenge”.

Yakomeje avuga ko  hari kandi ibikorwa byo kwangiza ibishanga bimenwamo  imyanda, kubituramo, gusatira imbago z’ ibishanga, ibiyaga n’ imigezi; ubucukuzi bukorwa mu kajagari no mu buryo butarambye; kudacunga amazi neza akaba yatwara ubutaka (isuri); gukora ubuhinzi butita ku bidukikije; ikoreshwa ry’ amashashi n’ibikoresho bya pulasitike bikoreshwa inshuro imwe kandi byangiza ibidukikije.

Ati: “Ibi bikorwa byose birakwiye ko tubyirinda”.

Ubusanzwe Umunsi Mpuzamahanga w’Ibidukikije wizihizwa ku itariki 5Kamena, ariko u Rwanda rwawizihije ku wa 3 Kamena kuko iriya tariki yahuriranye n’umunsi w’ikiruhuko.  Wizihijwe ku nsanganyamatsiko igira iti: “Dufite isi imwe rukumbi. Tuyibungabunge”.

Mu Rwanda iyi nsanganyamatsiko ijyanye n’ icyerekezo 2050 u Rwanda rwihaye cyo kuba mu bihugu biteye imbere binyuze mu iterambere ritabangamiye ibidukikije kandi rifite ubudahangarwa buhagije ku mihindagurikire y’ibihe.  

Ijyanye kandi n’Intego z’Iterambere Rirambye (SDGs) na gahunda y’Igihugu y’Imyaka irindwi y’impinduka zo kwihutisha iterambere ry’ubukungu (NST1). Bityo mu gihe habayeho gukomeza kwangirika k’umutungo kamere n’urusobe rw’ibinyabuzima byagira ingaruka zikomeye zitambamiora izo  ntego z’iterambere ry’ubukungu Igihugu cyiyemeje.

Umunsi Mpuzamahanga w’Ibidukikije washyizweho n’Umuryango w’Abibumbye mu mwaka wa 1972. Ugamije ahanini gukangurira abatuye Isi ibikorwa bijyanye no kubungabunga ibidukikije no guhangana n’imihindagurikire y’ibihe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA