U Rwanda rwegukanye imidali yose muri Half Marathon y’abagore mu Irushanwa Mpuzamahanga ryo Gusiganwa ku Maguru “ Kigali International Peace Marathon 2026”, Umunya-Kenya Kephar Namutala yegukana irushanwa mu cyiciro cy’abagabo.

Kuri iki Cyumweru tariki ya 14 Kamena 2026, ni bwo hakinwe umunsi wa Kabiri w’irushanwa ryakinwaga ku nshuro ya 21. Iri rushanwa ritegurwa n’Ishyirahamwe ry’Imikino Ngororamubiri mu Rwanda (RAF) ku bufatanye na Minisiteri ya Siporo, uyu mwaka ryari rifite umwihariko wo gukinwa iminsi ibiri.

Inzira yakoreshejwe ni Amahoro Stadium-Chez Lando-Gishushu RDB-MTN Nyarutarama (Akabuga ka Nyarutarama)-Gishushu RDB-KCC-University of Kigali –Kacyiru- MINAGRI-Kwa Ambasaderi wa USA- KABC-Kimihurura ku Kabindi-Primature-ku Kabindi-Kigali Heights- University of Kigali-KCC-Gishushu-Chez Lando- Amahoro Stadium (Zigama Gate)-kwa Rwahama-Simba Kimironko- KFC Kimironko-Controle Technique-Amahoro Stadium.

Umunya-Kenya Kephar Namutala yegukanye Marato Mpuzamahanga ya Kigali ya 2026 muri Full Marathon mu cyiciro cy’abagabo nyuma yo gukoresha amasaha abiri, iminota 14 n’amasegonda 19.

Yakuyeho agahigo ko gukoresha ibihe bito kari gafitwe na mugenzi we ukomoka muri Kenya Kibet Paul Kosjei wakoresheje amasaha abiri, iminota 14 n’amasegonda 56 mu 2012.

Yakurikiwe na mwenewabo Shadrack Kimining wabaye uwa kabiri yasizwe amasegonda mu gihe ku mwanya wa gatatu hasoreje Benard Kipkorir na we wo muri Kenya.

Mu bagore, isiganwa ryegukanywe n’Umunya-Kenya Ivyne Jeruto, aho yakoresheje amasaha abiri, iminota 35 n’amasegonda 35.

Yakurikiwe na Tegest Ayalew Ymer (Ethiopia) yasize amasegonda 41, mu gihe umwanya wa gatatu wegukanywe na Tsega Desta Mehari na we wo muri Ethiopia.

Mu cyiciro cya Half Marathon y’ibilometero 21, mu bagabo n’abagore, bazenguruka inshuro imwe mu nzira yakozwe n’abakinnye Full Marathon.

Umunya-Kenya Amos Kirui ni we wahize abandi mu bagabo, akoresheje isaha imwe, iminota ine n’amasegonda 16.

Yakurikiwe na Oscar Kibet wo muri Uganda mu gihe uwa gatatu yabaye Zakariah Kirika Gacugu wo muri Kenya.

Mu bagore, Umunyarwandakazi Ibishatse Angelique yegukanye Half Marathon, akoresheje isaha imwe, iminota 13 n’amasegonda 30 ku ntera y’ibilometero 21.

Yakurikiwe na Mutuyimana Berthilde yasize amasegonda 24 na Tuyambaze Thabita yasize amasegonda 37, aho bose ari Abanyarwanda

Umukinnyi wegukanye Full Marathon mu bagabo n’abagore yahawe ibihumbi 20$ [asaga miliyoni 29,3 Frw], uwa kabiri ahabwa ibihumbi 15$ naho uwa gatatu atwara 7 500$.

Uwa kane yabonye amadolari ya Amerika 5 000, uwa gatanu abona amadolari 3 000, mu gihe kuva ku wa gatandatu kugeza ku wa munani bahawe amadolari 2 000, amadolari 1 500 na 1 000.

Mu basiganwe Igice cya Marathon [ibilometero 21,098], uwa mbere mu bagabo no mu bagore yahawe amadolari ya Amerika 5 000 [asaga miliyoni 7,3 z’amafaranga y’u Rwanda].

Uwa kabiri yabonye amadolari ya Amerika 4 000, uwa gatatu ahabwa amadolari 3 000. Kuva ku mwanya wa kane kugeza ku wa munani bahawe amadolari ya 2 000, amadolari 1 000, amadolari 800, amadolari 500 n’amadolari 400.

Kigali International Peace Marathon uyu mwaka yatumiwemo abakinnyi 22 bakina amarushanwa yo ku rwego rwa kabiri [Gold Label] kugira ngo izazamurirwe urwego.

Ba uwa mbere mu kumenya amakuru agezweho!!!