Abanyeshuri baje gukora ibizamini bisoza abanza bipfunyikiye
Amakuru

Abanyeshuri baje gukora ibizamini bisoza abanza bipfunyikiye

Imvaho Nshya

July 17, 2023

Abanyeshuri bo mu mashuri abanza bakoreye ibizamini muri Camp Kigali kuri uyu wa Mbere tariki ya 17 Nyakanga 2023, harimo abaje gukora ibizamini banitwaje impamba, bipfunyikiye naho abatuye hafi bo baraza kujya kurya mu rugo, gahunda yo kugaburira abana ku ishuri ikaba itakomeje kubahirizwa.

Ibyo byatewe nuko nta murongo ngenderwaho washyizweho ngo hasobanurwe uko abanyeshuri bazaba bari mu bizamini bazagaburirwa muri gahunda yari isanzwe yo kubagaburira ku ishuri, aho buri kigo cyagennye uko abanyeshuri bacyo bazirwanaho.

Umuyobozi wa site y’ibizamini ya Camp Kigali, Kamanzi Kalisa Gilbert yavuze ko abanyeshuri  baje mu bizamini buri wese afite uko yirwanaho mu bijyanye no kurya.

Yagize ati: “Ikizamini cya mbere nikirangira, buri mwana uko yaje yiteguye bigendanye nuko ikigo cyabo cyabiteguye ni uko ari bubeho. Ariko twari twavuganye n’ubuyobozi babajije icyo kibazo bavuga ko bimenyekanye bitinze, buri kigo kirwanyeho uburyo abana bacyo bazabaho ni nako biri bugende.

Abana bapfunyitse ariko abataha hafi bari buze gutaha. Ni ko byari bisanzwe, ubushize byagenze neza ariko wenda ubuyobozi bwabyiga bikazajya bikorwa mu buryo bumwe abana bakarira ku ishuri”.

Madamu Irere Claudette ashyikiriza abanyeshuri impapuro z’ibizamini

Umunyamabanga wa Leta muri Minisiteri y’Uburezi ushinzwe ikoranabuhanga, amashuri y’imyuga n’ubumenyi ngiro Irere Claudette yavuze ko kuba gahunda yo kugaburira abana ku ishuri itarimo kubahirizwa kuri santere y’ibizamini bigiye gukurikiranwa.

Ati: “Umuntu yaza gukurikirana neza uko kuri iyi santere bimeze, ariko ubundi ntabwo yakagombye guhagarara, gusa nibaza ko ababyeyi baba bafite abana baturuka ku mashuri atandukanye baba batazi  neza uko bimeze, ku buryo bwabo bakavuga ngo umwana ataza kwicwa n’inzara, reka ngire ikintu mupfunyikira, ariko gahunda yo kugaburira abana ku ishuri irakomeza ntabwo igomba guhagarara.

Uretse ikibazo cyo kuba abana batagaburirwa ku ishuri mu gihe cy’ibizamini kandi hanagaragaye kuba hari bamwe mu bana bagera kuri santere y’ibizamini bakererewe ntibakurikire amabwiriza  rusange mbere y’uko batangira ibizamini.

Umunyamabanga wa Leta, Irere Claudette, yavuze ko ku munsi wa mbere akenshi hari abanyeshuri bamwe bakererwa kuko baba bagiye ku mashuri badasanzwe bigaho, harimo abaturuka kure, ariko ko bizera ko bikosoka.

Umuyobozi w’Umujyi wa Kigali Rubingisa Pudence yavuze ko akenshi umunsi wa mbere abana basa n’abagira imbogamizi kuhagerera igihe, ariko ko atari ibintu bihoraho, ariko ubuyobozi bukomeza gukurikirana, hakabaho guhwitura n’ababyeyi bakajya bohereza abana ku gihe.

Mu Mujyi wa Kigali ibizamini bisoza amashuri abanza byakorewe kuri site 86, hakaba hariyandikishije abanyeshuri 23 704. Kuri site ya Camp Kigali hakoreye abanyeshuri 445.

Mu gihugu hose hakoze abanyeshuri 202 967, bakoreye ku masite y’ibizamini bya Leta 1 099, zihuje abanyeshuri baturutse mu bigo by’amashuri abanza 3 644.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA