Abarangirije muri Kicukiro TVET beretswe ko ubuyobozi bubashyigikiye
Amakuru

Abarangirije muri Kicukiro TVET beretswe ko ubuyobozi bubashyigikiye

NTAWITONDA JEAN CLAUDE

June 4, 2022

Ubuyobozi bw’akarere ka Kicukiro bwatangaje ko ubuyobozi bw’igihugu bushyigikiye iterambere ry’umwana w’umukobwa ndetse n’umugore by’umwihariko abasaga 200 barangije amasomo y’ubumenyingiro muri Kicukiro TVET.

Umuyobozi Nshingwabikorwa wa Kicukiro, Umutesi Solange, yabigarutseho mu muhango wo gusoza amasomo y’ubumenyingiro ku bakobwa babyariye iwabo.

Umutesi Solange, Umuyobozi Nshingwabikorwa wa Kicukiro, yagaragaje ko ubuyobozi bw’igihugu bushyigikiye abagore mu kwiteza imbere (Foto Kayitare J.Paul)

Umuhango wo kubashyikiriza impamyabumenyi witabiriwe n’inzego z’abagize inama y’igihugu y’abagore mu Mujyi wa Kigali n’ababyeyi b’abanyeshuri kuri uyu wa Gatanu tariki 03 Kamena 2022 mu murenge wa Niboye mu karere ka Kicukiro.

Umutesi, Umuyobozi Nshingwabikorwa wa Kicukiro, yabwiye abarangije amasomo y’ubumenyingiro ko icya mbere ari ukubahumuriza nubwo baba barahuye n’ibibazo ariko ngo hirya y’ubuzima, ubuzima bukomeza.

Yagize ati “Uyu munsi bariyubatse, bagaruriwe icyizere kuko bize gutunganya ubwiza bw’imisatsi, inzara n’ibindi, ubu ku isoko ry’umurimo bazibeshaho.

Dufite ubuyobozi bwiza bubahumuriza, bubakomeza, bubashyigikiye, bubakunda, na bo bitinyuke bumve ko bashobora kuzuza inshingano zindi z’ubuzima ariko nawe ukanibeshaho ukiteza imbere”.

Uwamahoro Hasha yishimiye kuba yabonye impamyabumenyi yakuye muri Women Training Center mu kigo cya Kicukiro TVET gikurikianwa n’Inama y’Igihugu y’Abagore.

Avuga ko yabyaye umwana afite imyaka 16 ubu akaba afite abana bane n’umugabo. Ahamya ko akibyara ubuzima bw’ishuri bwahise buhagarara.

Yabwiye Imvaho Nshya ko nyuma yaje gutekereza kwiga amasomo y’umwuga.

Ati “Naricaye ndavuga nti kubaho nta mwuga nta kintu byaba bimfashije nk’umubyeyi, niyo mpamvu navuze nti reka nge kwiga ibijyanye no gutunganya imisatsi, inzara n’ibindi”.

Avuga ko nabona ubushobozi na we azishingira inzu itunganya ubwiza bw’imisatsi kandi akigisha n’abandi bakiteza imbere.

Uzamukunda Suzan na we warangije amasomo y’ubumenyingiro, avuga ko yarangije amashuri yisumbuye agahitamo gukomeza amasomo y’ubumenyingiro ajyanye n’umwuga w’ubudozi.

Avuga ko yatangiye kubona ibiraka byo kudodera abantu akaba yaratangiye gukirigita ifaranga.

Ati “Nkunda gukoresha amaboko yanjye nkumva ko ibyo nkoze cyangwa ibyo nkuye mu byo nakoze ari ishema kuri njye, niyo mpamvu nahisemo kwiga ubudozi kandi narimbikunze”.

Murebwayire Jeanne d’Arc wize kudefuriza avuga ko amaze kwiteza imbere akaba ari mu matsinda yo kwizigama.

Murebwayire Jeanne d’Arc yatangiye kwiteza imbere akaba anizigamira muri gahunda ya Ejo Heza (Foto Kayitare J.Paul)

Ahamya ko mu mafaranga avana mu mwuga yize, ayifashisha mu kwizigamira muri gahunda ya Ejo Heza.

Ati “Ubu mfite imashini yogosha imfasha mu gukemura ibibazo byo mu rugo. Ikindi nuko umugabo wanjye adashobora kwicara inzara mpari”.

Ubuyobozi bw’akarere buvuga ko ibyiciro abanyeshuri baturukamo ari iby’abanyeshuri abenshi baba baragize ibibazo byatumye batarangiza amashuri yabo.

Abiga muri Kicukiro TVET si abo muri ako karere gusa, ubuyobozi bw’akarere ka Kicukiro bwahamije ko abahiga baturuka mu gihugu hose kandi bakigira Ubuntu.  

Abanyeshuri 208 nibo basoje amasomo y’ubumenyingiro (Foto Kayitare J.Paul)
Abahawe impamyabumenyi bavuga ko bagiye kurushaho kwiteza imbere (Foto Kayitare J.Paul)
Hari n’abahungu biganaga na bashiki babo bahawe impamyabumenyi (Kayitare J.Paul)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA