Abarimu 477 bo muri Zimbabwe bitezwe mu Rwanda bitarenze muri Nzeri
Amakuru

Abarimu 477 bo muri Zimbabwe bitezwe mu Rwanda bitarenze muri Nzeri

Imvaho Nshya

March 30, 2022

U Rwanda rwiteguye kwakira abarimu 477 baturutse muri Zimbabwe bitarenze muri Nzeri uyu mwaka nk’uko byatangajwe n’Ubuyobozi bw’Ikigo cy’Igihugu gishinzwe Uburezi bw’Ibanze (REB) mu Nama y’ubucuruzi n’ishoramari ya kabiri ihurije hamwe abahagarariye u Rwanda na Zimbabwe, i Harare.

Ni inama ije ikurikira indi nka yo yabereye i Kigali muri Nzeri 2021, aho Perezida wa Repubulika y’u Rwanda Paul Kagame yasabye abarimu bo muri Zimbabwe kuza gutanga umusanzu mu kuzahura ireme ry’uburezi.

Icyo gihe yagize ati: “Ndakeka ko Zimbabwe yanaduha abarimu beza, rero nabyo mubikoreho nk’ibyihutirwa. Umubare wose mwabona w’abarimu beza twe turiteguye kuko turabakeneye cyane.”

Mu ijambo Umuyobozi Mukuru wa REB Nelson Mbarushimana yagejeje ku bitabiriye inama ya kabiri iri kubera I Harare, yavuze ko igikorwa cyo gutangira urugendo rwo kwinjiza abo barium mu kazi cyatangiye kandi hitezwe kuzaboneka abarimu 477.

Yagize ati” “Mu masezerano y’ubufatanye yasinywe mu mwaka ushize mu bijyanye no guhanahana abarimu baturutse muri Zimbabwe, kugeza ubu twatangiye kubinjiza mu kazi ndetse tuzabona abarimu 477 bazaturuka muri Zimbabwe bitarenze muri Nzeri uyu mwaka.”

Yakomeje avuga ko abo abenshi muri abo barimu bazashyirwa mu mashuri yigisha imyuga n’ubumenyingiro ndetse no mu mashuri makuru na za kaminuza. Ati: “Twamaze gushyiraho komite yihariye kuri uru rugendo rwo kubinjiza mu nshingano kandi birimo gukorwa neza hifashishijwe ikoranabuhanga.”

Bivugwa ko amasezerano yatangiye kubahirizwa mu nzego ebyiri z’ingenzi hibandwa ku barimu bazaza mu Rwanda kwigisha Icyongereza n’amasomo ya Siyansi, Ubenjenyeri, Ikoranabuhanga n’Imibare (STEM).

Inama y’uyu mwaka yateranye ku nsanganyamatsiko ishimangira ibijyanye no kugenzura, gushora imari no kohereza ibicuruzwa hagati y’ibihugu byombi ndetse no hanze yabyohagamijwe gushimangira ubutwererane bw’ibihugu byombi.

Kugeza ubu hamaze gusinywa amasezerano umunani mu nzego zitandukanye zose zishyize imbere kwimbika mu butwererane n’ubuhahirane bw’ibihugu byombi.

Inzego zihuje inyungu z’ibihugu byombi by’umwihariko ni ubuhinzi, ingufu, uburezi, ubwikorezi, ubwubatsi n’urwego rw’abikorera.

Nubwo ingano y’ibicuruzwa bihererekanywa hagati y’ibihugu byombi ikiri hasi cyane, abayobozi bo ku mpande z’ibihugu byombi bakomeje kugaragaza icyizere cyo kuyongera no kwagura amahirwe y’ubufatanye muri uru rwego.

Perezida wa Zimbabwe Emmerson Dambudzo Mnangagwa afungura iyi nama ku wa Mbere, yavuze ko ubufatanye bumaze kubakwa hagati y’u Rwanda na Zimbabwe mu bucuruzi n’ishoramari bwitezweho kongera ingano y’ibicuruzwa bihererekanywa hagati y’ibihugu byombi.

Yongeyeho kandi ko ayo mahirwe mashya abonetse mu butwererane bw’ibyo bihugu azagira uruhare rukomeye mu kunoza imibreho myiza y’abaturage b’u Rwanda n’aba Zimbabwe.

Umuyobozi Mukuru w’Ikigo cy’Igihugu Gishinzwe Uburezi bw’Ibanze (REB), Dr Mbarushimana Nelson

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA