Abasenateri bo muri Zimbabwe baje kwigira ku  Rwanda
Amakuru

Abasenateri bo muri Zimbabwe baje kwigira ku Rwanda

Imvaho Nshya

February 22, 2022

Itsinda ry’Abasenateri 6 bagize Komite y’Amahoro n’Umutekano muri Zimbabwe bari mu ruzinduko rw’iminsi 5 aho baje kwigira ku mikorere y’Inteko Ishinga Amategeko, imiyoborere, iterambere  n’amateka by’u Rwanda.

Ku wa Mbere, iryo tsinda ryakiriwe na Perezida wa Sena Dr. Iyamuremye Augustin ndetse na Visi Perezida Dr. Mukabaramba Alvera, bagirana ibiganiro byabo byibanze ku guteza imbere umubano hagati y’ibihugu byombi.

Iryo tsinda ry’Abasenateri bagize Komite y’Amahoro n’Umutekano muri Zimbabwe rivuga ko impamvu ryahisemo gusura u Rwanda ari ukubera intambwe igihugu kimaze gutera cyiyubaka mu bijyanye n’amahoro n’umutekano.

Umuyobozi w’iyo Komite Dr. Parirenyatwa David, yabwiye RBA ko u Rwanda barufata nk’indashyikirwa mu kubaka amahoro n’umutekano kuri uyu mugabane w’Afurika ari na yo mpamvu barusuye.

Ati: “Twatekereje ko u Rwanda ari Igihugu twakwigiraho by’umwihariko dushingiye ku bihe byahise n’uburyo mwabirenzeho mukaba igihugu gikomeye kandi gitekanye muri Afurika. Muri iyi Komite ishingiye ku mahoro n’umutekano twemera ko uburyo u Rwanda rwateye imbere bishimangira ko rufite amahoro n’umutekano, bityo twatekereje ko nk’inteko twaza tukungurana ibitekerezo twirebere n’amaso uburyo birimo gukorwa hano ni yo mpamvu turi hano.”

Perezida wa Sena y’u Rwanda Dr Iyamuremye Augustin, yavuze ko umubano w’u Rwanda na Zimbabwe umaze gushinga imizi cyane ashingiye ku ngendo zigamije kubaka ubutwererane buhamye impande zombi zigirirana, aho Abakuru b’Ibihugu byombi bamaze gusurana.

Yongeraho ko n’Inteko zishinga amategeko z’ibihugu byombi zirimo gutegura kugirana ubushuti bwihariye n’imikoranire irambye.

Uru ruzinduko rwatangiye ku wa Mbere taliki ya 21, ruzarangira ku ya  25 Gashyantare 2022; Biteganyijwe ko bazasura inzego zinyuranye zirimo n’iz’ubuyobozi bw’Igihugu, Inteko Ishinga Amategeko umutwe w’Abadepite, banasure ibice bitandukanye biri hanze ya Kigali mu rwego rwo kwerekwa intambwe igihugu kimaze gutera kiyubaka.

Ku gicamunsi cyo ku wa Mbere, abo basenateri basuye Urwibutso rwa Jenoside rwa Kigali ku Gisozi basobanurirwa amateka ya Jenoside yakorewe Abatutsi, bunamira abasaga miliyoni bishwe mu 1994 bazira uko bavutse, bashyira indabo ku mva zishyinguwemo abasaga 250,000 baruhukiye muri rwo rwibutso.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA