Abasirikare bakuru 37 bo mu Bihugu bitandukanye byo ku Migabane ya Afurika na Aziya batangaje ko banyuzwe no gusura Igicumbi cy’Intwari z’u Rwanda bavuga, bahakuye isomo rizabafasha gukomeza inshingano yo gukunda Ibihugu byabo no kubungabunga amahoro.

Ni Abasirikare bari kwiga mu  Ishuri  Rikuru rya Gisirikare rya Nyakanama rihereye mu Karere ka Musanze, rishinzwe gutanga amasomo ya gusirikare ku basirikare bakuru (RDF CSC), bakaba basuye Igicumbi cy’Intwari kuri uyu wa Kane tariki ya 23 Mata 2026, muri gahunda y’urugendoshuri barimo kugirira mu Rwanda,  aho biga ku mateka y’urugamba rwo kubohora Igihugu rwakozwe n’Ingabo zari iza RPA Inkotanyi.

Lt. Col. Isaac Kwame Amehoho ukomoka muri Ghana yabwiye itangazamakuru ko ari amahirwe bahawe yo kwigira ku murage n’umuco byiza u Rwanda rufite byo kubaha Intwari zarwo bityo bizafasha buri wese gusubira mu Gihugu cye agatanga umusanzu we uko bikwiye.

Yagize ati: “Urugendoshuri nk’uru ruduha amahirwe yo kwigira ku bunararibonye bw’u Rwanda, Igihugu kitizihiza cyangwa ngo kizirikane Intwari zacyo ntacyo cyaba gikora, ari na yo mpamvu u Rwanda rwafashe iya mbere mu kwizihiza Intwari z’Igihugu zarwo.

Ni isomo rikomeye nizereza ko buri wese mu itsinda ryacu azasubirana iwabo.”

Lt Col. Madalitso Zulu waturutse muri Zambia we yavuze  ko bize bizabafasha mu kazi kabo ka buri munsi.

Ati:”Mu Ishuri Rikuru rya Gisirikare rya Nyakinama, twiga ibijyanye n’igisirikare n’umutekano, ibi ni bimwe mu nteganyanyigisho bidufasha mu masomo yacu ajyanye no kubungabunga umutekano, binyuze mu mateka y’u Rwanda kuko ibyahabaye bishobora no kuba ahandi ku mugabane.

Biradufasha nk’abayobozi b’igisirikare twaturutsemo kuba abayobozi bahamye mu gufata icyemezo kandi ntidutekereze nk’Igihugu gusa ahubwo tugatekereza nk’umugabane wose ni byo bizadufasha kugarura amahoro hose.”

Umuyobozi w’Ishami rishinzwe ubushakashatsi mu Rwego rw’Igihugu rushinzwe Imidari n’Impeta z’Ishimwe (CHENO), Rwaka Nicolas, yagaragaje  ko urwo rugendoshuri ari amahirwe yo kugaragaza uko u Rwanda rwizihiza Intwari zarwo.

Ati: “Ni amahirwe yo kumenyekanisha uko tubungabunga amateka y’Intwari z’Igihugu kandi akenshi kubungabunga amateka n’ubutwari by’Igihigu biba ari ibintu by’ingenzi atari ku Gihugu gusa ahubwo no ku Isi muri rusange”.

Rwaka akomeza avuga ko ubwo babatemberezaga babasobanurira ubutwari bwaranze Intwari z’u Rwanda, kimwe mu byabanyuze ari ugusobanurirwa uburyo aho buri Ntwari yibukirwa, hubakiye mu ishusho y’inzu za kinyarwanda bishatse kuvuga ko Intwari idapfa ahubwo iba isubiye mu rugo.

Uwo muyobozi yumvikanishije ko abo basirikare basabye gusura igicumbi cy’intwari z’u Rwanda mu rwego rwo guhuza akazi kabo ko gukunda Igihugu n’indangagaciro yo kugira Ubutwari.

Ati: “Bifuje gusura ibicumbi by’intwari kugira ngo bashobore kubihuza n’inshingano zabo za buri munsi zo gukunda Igihugu kandi ntiwakunda Igihugu udafite indangagaciro y’ubutwari.”

Abo basirikare bo mu bihugu bitandukanye bya Afurika na Azia mbere y’uko basura igicumbi cy’intwari bari babanje gusura, ingoro y’amateka y’urugamba rwo kubohora Igihugu, nyuma y’uko tariki 22 Mata 2026, bari basuye umupaka wa Kagituma aho ingabo za RPA zatangirije urugamba rwo kubohora Igihugu no guhagarika Jenoside yakorewe Abatutsi mu Rwanda mu 1994, rwatangiye tariki ya 1 Ukwakira mu 1990.

Abo basirikare ni 37 barimo umugore umwe bakaba bahagarariye ibihugu bisaga 20 baturukamo ibyo bavuga ko bose bizabafasha kujyana umurange mwiza iwabo bakuye mu Rwanda.

Ba uwa mbere mu kumenya amakuru agezweho!!!