Abayoboke ba ADEPR bagejejweho intashyo za Perezida Kagame
Amakuru

Abayoboke ba ADEPR bagejejweho intashyo za Perezida Kagame

Imvaho Nshya

March 7, 2022

“Mu izina rya Perezida wa Repubulika Paul Kagame na Guverinoma y’u Rwanda, ndagira ngo mbashimire, kandi mbabwira ko Umukuru w’Igihugu abasuhuza kandi abakunda. Ndabasuhuje kandi mu izina rya Yesu…” Ubwo ni ubutumwa bwatangiye ijambo rya Minisitiri w’Ubutegetsi bw’Igihugu Gatabazi Jean Marie Vianney, ku Cyumweru taliki ya 06 Werurwe, ubwo Itorero ry’ADEPR ryimikaga Umushumba Mukuru mushya Ndayiyeze Isaie n’umwungirije Rutagarama Eugene.

Byari ibirori byitabiriwe n’imbaga nini y’abayoboke b’Itorero ADEPR baturutse mu bice bitandukanye by’Igihugu, abayobozi bahagarariye inzego zitandukanye ndetse n’abashyitsi baje baturutse mu bihugu by’amahanga bitandukanye.

Minisitiri Gatabazi yavuze ko Guverinoma y’u Rwanda yishimira uruhare ntagereranywa Itorero ADEPR ryagize kandi rikomeje kugira mu guhangana n’icyorezo cya COVID-19, mu kwigisha gusoma, kwandika no kubara, mu bikorwa by’iterambere, guteza imbere uburezi n’ubuvuzi, kuzamura imibereho y’abatishoboye n’ibindi.

Minisitiri Gatabazi yagize ati: “Bashumba b’Itorero namwe Bakristu turabasaba gukomeza kubungabunga ibyagezweho n’Itorero ndetse mukanakora ibindi bikorwa by’indashyikirwa bituma ADEPR irushaho kuba umusemburo w’impinduka mu gihugu cyacu.”

Yakomeje asaba abayobozi ko kugira ngo babashe kuyobora neza basabwa gushyira mu bikorwa icyerekezo gishya cy’Itorero ADEPR hashingiwe ku mavugurura mashya yakozwe. Ayo mavugurura agomba kujyana n’uko abayobozi bagomba kwirinda ababaca intege n’abashaka gusenya ubumwe bw’Itorero, no kugenzura kuri buri wese indangagaciro ADEPR yubakiyeho.

Ikindi nanone abayobozi n’abayoboke basabwe, harimo gusenyera umugozi umwe, gukorera mu mucyo abashumba bemera kugaragariza abayoboke ibikorwa bakora n’uko byakozwe, kwitabira no gushyigikira gahunda za Leta zitandukanye kuko ziba zigamije guhindura imibereho y’abaturage ndetse no kwirinda no kurwanya ubuhanuzi n’inyigisho ziyobya.

Minisitiri Gatabazi yavuze ko Guverinoma y’u Rwanda itazahwema gukorana n’abayobozi bashya mu kuzuza inshingano bahawe zo kuyobora ir’Itorero mu nzira nziza abifuriza imirimo myiza no gufashwa n’Imana mu byo bakora bose.

Nyuma yo kurahira, aba bayobozi batangaje ko bashyize imbaraga mu gukorera hamwe hagamijwe guhangana n’ibibazo by’ingutu iri torero ryanyuzemo mu myaka yashize, birimo n’imicungire mibi y’umutungo.

Umushumba Mukuru Ndayizeye Isaie, yavuze ko agiye gushyira imbaraga mu kugarura ubumwe no kunoza imicungire y’umutungo muri iri torero hagamijwe gufasha abayoboke baryo n’Abanyarwanda muri rusange kugira imibereho myiza.

Yashimiye ubuyobozi bw’Igihugu kuba bwarababaye hafi mu bibazo banyuzemo, no mu bihe bya COVID-19 bitari byoroheye amadini n’amatorero, yizeza ko bazakomeza gutanga umusanzu mu rugendo rw’iterambere ry’Igihugu ndetse n’ibya mwuka.

Itorero rya ADEPR rigiye kumara imyaka 82 rigeze mu Rwanda, kuri ubu rifte abayoboke basaga miliyoni 2 rikaba rigira uruhare mu iterambere ry’uburezi, ubuvuzi, ubuhinzi ndetse no guhangana n’ibibazo byugarije imibereho y’abaturage.

Amafoto: MINALOC

TANGA IGITECYEREZO

  • Salomon
    March 7, 2022 at 8:28 am Musubize

    Turabashyigikoye Abayobozi bacu b’Itorero ADEPR kuko bari kongera kutugarurira Itorero nyaryo rishingiye ku butumwa beiza bwa Yesu Kristi.
    Bakomereze aho tubari inyuma.
    Tunasaba abagiye barwanya impinduka zari ziri kuba kongera kumva neza ko Itorero riri kugana heza bakihana bagahinfukira bakaza tugafatanya gukorera Imana nkabazajya mu ijuru atari ugushaka inyungu ku giti cyabo

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA