Abayobozi bahuye na Perezida Kagame mu nama y’Umutekano ya Munich (Amafoto)
Amakuru

Abayobozi bahuye na Perezida Kagame mu nama y’Umutekano ya Munich (Amafoto)

NTAWITONDA JEAN CLAUDE

February 20, 2022

Perezida wa Repubulika y’u Rwanda  Paul Kagame, ku wa Gatandatu taliki 19 Gashyantare 2022 ni bwo yageze i Munich mu Budage aho yitabiriye Inama yiga ku mutekano ya Munich ifite amateka maremare kuko yatangiye gukorwa bwa mbere mu myaka 59 ishize.

Akigera mu Budage, Perezida Kagame yagiranye ibiganiro n’Umuyobozi wungirije w’Umuryango Open Society, Alexander Soros, Minisitiri w’Intebe wungirije akaba na Minisitiri w’Ububanyi n’Amahanga wa Qatar, Sheikh Mohammed bin Abdulrahman Al-Thani, Jendayi Frazer n’abayobozi ba sosiyete Ecolog International, ikorera mu bihugu binyuranye by’Afurika.

By’umwihariko, Sheikh Mohammed bin Abdulrahman Al-Thani yashyikirije Perezida Kagame intashyo z’Umuyobozi w’Ikirenga wa Qatar Sheikh Tamim bin Hamad Al Thani, aboneraho kwifuriza Abanyarwanda bose iterambere n’uburumbuke.

Perezida Kagame na we yoherereje intashyo Umuyobozi w’Ikirenga wa Qatar, ndetse ashimira na Minisitiri wamuzaniye intashyo, abifuriza ubuzima buzira umuze n’umunezero mu gihe abaturage b’ibihugu cya Qatar bakomeje kunyurwa n’iterambere n’uburumbuke.  

Muri iyo nama, hanaganiriwe kandi ku mubano w’u Rwanda na Qatar, hanagarukwa ku bibazo by’umutekano biboneka mu Karere ari na ko hanarebwa ku nyungu ibihugu byombi bihuriyeho.

Iyo nama yakomeje no kuri iki Cyumweru, ihurije hamwe abayobozi mu ngeri zitandukanye, Abakuru b’Ibihugu na Guverinoma barenga 30, Leta Zunze Ubumwe z’Amerika n’abayobozi b’imiryango mpuzamahanga ikomeye nka Loni, Umuryango w’ubwirinzi bw’u Burayi n’Amerika (OTAN/NATO) n’Umuryango w’Ubumwe bw’u Burayi (EU).

Bivugwa ko u Burusiya buri mu bihugu by’ibihangange bitahagarariwe muri iyi nama ibaye ku nshuro ya 59, dore ko yatangiye guterana bwa mbere yiga ku bibazo by’umutekano guhera mu mwaka wa 1963.

Minisitiri w’Intebe w’u Bwongereza yavuze ko nubwo muri ibi bihe Isi isa n’aho ituje, hakiri ingorane z’intambara y’ubutita ituma kunga ubumwe no kumvikana biba ingume.

Yakomeje avuga ko kuba u Burusiya bufite ingabo zisaga ibihumbi 130 ku mupaka ubuhuza na Ukraine ari ikibazo gikomeye kuri iki gihugu cy’u Burayi no ku Burayi bwose muri rusange. Izo ngabo ngo zirimo batayo zirenga 100 z’abasirikare b’abahanga mu mirwano, bityo akaba asaba Isi yose kwihuriza hamwe mu gukumira ko icyo kibazo cyateza ibyago by’intambara ku Isi yose.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA