Abiga muri UR-CAVM basabwe kwifashisha ikoranabuhanga bahangana n’abapfobya Jenoside
Amakuru

Abiga muri UR-CAVM basabwe kwifashisha ikoranabuhanga bahangana n’abapfobya Jenoside

Imvaho Nshya

June 12, 2022

Abanyeshuri biga mu Ishami ry’Ubumenyi bw’Inyamaswa n’Ubuvuzi bw’Amatungo muri Kaminuza y’u Rwanda (UR-CAVM) basabwe gukoresha ikoranabuhanga bahangana n’abapfobya bakanahakana Jenoside yakorewe Abatutsi bifashishije imbuga nkoranyambaga.

Urwo rubyiruko rwabisabwe mu muhango wo kwibuka ku nshuro ya 28 abanyeshuri n’abakozi b’icyahoze ari ISAE Busogo bazize Jenoside yakorewe Abatutsi mu mwaka wa1994.

Umukozi  wa UR akaba ari na we wari Umushyitsi mukuru Papias Mlimba Musafili, yasabye urubyiruko rwo muri kaminuza, guhangana n’abapfobya bakanahakana Jenoside banyuze mu ikoranabuhanga.

Yagize ati: “Iyi Jenoside yakorewe Abatutsi 1994,  yakozwe n’urubyiruko rwumvise inama mbi z’ababyeyi babo n’abarezi, ariko nanone dufite amahirwe  ko urubyiruko rwari rufite umutima mwiza ukunda u Rwanda rwahagaritse Jenoside. Kuri ubu rero igisigaye ni ugusigasira ibyagezweho, kandi tugaharanira ko bitazongera ariko nanone urubyiruko rushingiye ku byagezweho harimo n’ikoranabuhanga, rurasabwa gukoresha imbuga nkoranyambaga rurwanya abo bose bapfobya kandi bakimakaza umuco mubi wo kwimakaza ingengabitekerezo ya Jenoside”.

Abanyeshuri bo muri UR-CAM bavuga ko kwibuka bibafasha kwirinda ingengabitekerezo ya Jenoside birinda gusubira mu bikorwa bibi u Rwanda rwanyuzemo, kandi bakaba biyemeje kurwanya uwo ari we wese uhakana cyangwa upfobya Jenoside yakorewe Abatutsi mu 1994, yaba mu gihugu  cy’u Rwanda no hanze yacyo, nk’uko Hatungimana Rwema Flank yabitangarije Imvaho Nshya.

Yagize ati: “Iyo dukora igikorwa nk’iki cyo kwibuka abazize Jenoside yakorewe Abatutsi, ni bumwe mu buryo bwo gutekereza imibereho mibi Abatutsi babayemo mu gihe kirekire batotezwa, ibi rero nanone nka twe bakiri mu mashuri twitegura kuzaba abayobozi mu minsi iri imbere, biduha isomo ko twe dukwiye kuzavamo abayobozi beza, twiyemeje ariko nanone kujya dusoma cyane, kandi tukamagana abo bose bahembera ingengabitekerezo ya Jenoside, dukurikirana cyane imbuga nkoranyambaga zivuga ku Rwanda, twamagana abahembera Jenoside.”

Uwamaliya wavuze mu izina ry’imiryango y’abazize Jenoside yakorewe Abatutsi bigaga n’abakoraga ku cyahoze ari ISAE Busogo, yashimye gahunda yo kwibuka yashyizweho na UR-CAVEM,.

Yagize ati: “Byari urugendo rurerure kugira ngo hano byemerwe ko abacu baguye hano tubasha kubona umwanya wo kubibuka, ariko kuri ubu noneho byarakunze ndashimira iyi Kaminuza, uyu mwanya rero utuma turuhuka mu mitima, kandi tugaha agaciro n’icyubahiro abacu bazize Jenoside yakorewe Abatutsi mu 1994. Mboneraho no gusaba abanyeshuri bo muri Kaminuza  gukomeza kunga ubumwe, barwanya uwo ari wese wakongera kuzana amacakubiri mu Banyarwanda”.

Abibutswe ni abakozi n’abanyeshuri bahabaga mu 1994 bazize Jenoside yakorwe Abatutsi, kuri ubu ku Rwibutso rwa UR-CAVEM hari amazina y’abakozi bagera kuri 5, abanyeshuri 12, ndetse hakaba hakomeje gushakishwa n’andi mazina. Hifuzwa ko n’amafoto y’abishwe bahorwa uko bavutse yashakwa akajya anifashishwa mu gihe cyo kwibuka.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA