Abikorera basabwe gukoresha amahirwe ari mu Mijyi yunganira Kigali
Amakuru

Abikorera basabwe gukoresha amahirwe ari mu Mijyi yunganira Kigali

NTAWITONDA JEAN CLAUDE

May 10, 2022

Mu kwihutisha iterambere ry’Igihugu n’imibereho myiza y’abaturage, abikorera barashishikarizwa kubyaza umusaruro amahirwe aboneka mu Mijyi yunganira Kigali, ari yo uwa Huye, Muhanga, Rubavu, Musanze, Nyagatare, na Rusizi.

Ibi byagarutsweho na Minisitiri w’Ubutegetsi bw’Igihugu Gatabazi Jean Marie Vianney, arimo gutanga ikiganiro mu mwiherero w’abayobozi b’inzego zitandukanye z’Urugaga rw’Abikorera mu Rwanda barenga 400 bari mu mwiherero w’iminsi itatu (8-10 Gicurasi 2022) ubera mu Karere ka Bugesera, cyibanda ku kubashishikariza “Kubyaza umusaruro amahirwe ari mu Mijyi yunganira Kigali”.

Yagize ati: “Ishoramari rigomba kuba mu Mujyi wa Kigali, mu Mijyi igaragiye n’Iyunganira Kigali kugira ngo byoroshye urujya n’uruza rw’abantu n’ibintu kandi bizafasha kuzamura ubukungu bw’igihugu n’imibereho myiza y’abaturage.”

Nyuma yo gusobanura impamvu Leta yashyizeho imijyi yunganira Kigali ku iterambere ry’igihugu, Minisitiri Gatabazi yaberetse ko muri iyi mijyi hari amahirwe menshi yo gushoramo imari arimo ibikorwa remezo bikenewe n’abaturage nka gare, amasoko, inganda nini n’into, inzu zo guturamo, ibikorwa remezo by’imyidagaduro na siporo, imishinga y’ubukerarugendo na Hoteli, kwegereza abaturage ibicuruzwa na serivise.

Yongeyeho ko kwagurira ibikorwa muri iyi Mijyi yunganira Kigali byanafasha kubyaza umusaruro isoko riri muri iyi mijyi n’ibihugu duhana imbibi yegereye n’ibindi.

Minisitiri Gatabazi kandi yabasabye gukumira icuruzwa ry’abantu no kwangiza abangavu bibera muri za hoteli, utubari n’ahandi, gukumira icuruzwa n’ikoreshwa ry’ibiyobyabwenge, kwimakaza isuku mu byo bakora, aho bakorera n’abo bakorana no kugira uruhare mu gukemura ibibazo bibangamiye abaturage.

Yagarutse by’umwihariko ku batanga serivisi zo kwakira abashyitsi nka za hoteli, utubari n’andi macumbi, abasaba kuba bagira uruhare mu kurwanya ibyaha birimo icuruzwa ry’abantu no gusambanya abana.

Yagize ati: “Dufite ikibazo cy’abantu bangiza abana bacu muri izo hoteli, ndetse hakabamo n’ibintu byo gucuruza abantu, ni ho baganirira uko bajya gucuruza abo bana bacu ndetse hakabamo no kubangiza bikorerwamo.”

Minisitiri Gatabazi yakebuye abafite izo hoteli, avuga ko nubwo baba bakorera amafaranga ariko batanezezwa no kuba abana babo nabo bagiye kubangiriza mu zindi hoteli, abasaba kugira uruhare n’ubufatanye mu guca izo ngeso mbi.

Ati: “Ushobora kwakira abandi ariko n’abandi baba bakiriye abawe. Tubirwanyirije rimwe rero byadufasha kuko abana bacu ni bo bazadusimbura. Tubarinde ababashora mu busambanyi, ubusinzi, ibiyobyabwenge n’ibindi bibi bibangiriza ubuzima.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA