Abimukira 50 ba mbere bavuye mu Bwongereza bitezwe mu Rwanda
Amakuru

Abimukira 50 ba mbere bavuye mu Bwongereza bitezwe mu Rwanda

Imvaho Nshya

May 20, 2022

Guverinoma y’u Rwanda yemeje ko yiteguye kwakira icyiciro cya mbere cy’abimukira n’abasaba ubuhungiro kigizwe n’abasaga 50 bazoherezwa bitarenze mu mpera z’uku kwezi kwa Gicurasi nk’uko byemejwe n’Umuvugizi wungirijwe wa Guverinoma Alain Mukuralinda.

Ayo makuru atangajwe mu gihe Minisitiri w’Ububanyi n’Amahanga n’Ubutwererane Dr. Biruta Vincent yasoje uruzinduko i Londres mu Bwongereza aho yagiranye ibiganiro na Minisitiri w’Ubutegetsi bw’Igihugu Priti Patel, byibanze kuri ubwo bufatanye bwatangijwe hagati y’u Rwanda n’u Bwongereza

Muri Mata ni bwo Guverinoma y’u Bwongereza yemeje gahunda yo kohereza abimukira mu Rwanda kugira ngo habanze gusuzumwa ubusabe bwabo bwo kubona ubuhunzi mu nzira zemewe n’amategeko, ariko mu ntangiriro z’uku kwezi hatangazwa ko hari abanyamategeko bageragaje kwitambika bavuga ko ubwo bufatanye bunyuranyije n’amategeko mpuzamahanga.

U Bwongereza bavuze ko abo bitambitse badashobora guhagarika ishyirwa mu bikorwa ry’iyi gahunda mu gihe abayifiteho ikibazo bazagenda basobanurirwa imikorere yabwo buhoro buhoro.

Guverinoma y’u Bwongereza yatangaje ko yamaze gutegura no kumenyesha abazoherezwa mu byiciro bibanza guhera mu giteganyijwe kugera i Kigali mu mpera z’uku kwezi.

U Bwongereza buhamya kandi ko iyi gahunda yateguwe mu rwego rwo guhungabanya imiterere y’ubucuruzi bw’abantu bukorwa n’agatsiko ka magendu, nubwo yakuruye impungenge n’impaka zitandukanye z’abantu n’imiryango batarayisobanukirwa uko bikwiye.

Alain Mukuralinda yavuze ko u Rwanda rwiteguye kwakirana urugwiro abimukira bavuye mu Bwongereza, ati: “Dukurikije amakuru dufite, icyiciro cya mbere cy’abimukira kizagera hano mu mpera z’uku kwezi, ariko mu by’ukuri Guverinoma y’u Bwongereza ni yo izi neza ingano y’abazaza n’igihe cya nyacyo bazazira.”

Yakomeje agira ati: “Nibamara kubona sitati y’ubuhunzi, bazajya kubana n’abandi Banyarwanda. Bazaba babohotse, kuko ntabwo bazaba baje ari imfungwa.”

Mu mwaka ushize, abimukira basaga 28,000 n’abasaba ubuhungiro ni bo banyuze inzira y’amazi binjira mu Bwongereza bari mu twato duto. U Bwongereza buvuga ko gahunda yo kohereza no gutuza abo bimukira mu Rwanda ifite agaciro ka miliyoni 120 z’amapawundi.

Nubwo imiryango mpuzamahanga irimo n’Ishami ry’Umuryango w’Abibumbye ryita ku Mpunzi (UNHCR), amacumbi u Rwanda rwateguriye aba bimukira arahebuje ndetse bamwe mu babonye amashusho y’aho bazacumbikirwa ntibabura kwemeza ko ubuzima bajemo ari bwiza cyane buruta kure ubwo bakeka ko babonera mu Bwongereza igihe baba babayeho basiragira nta n’ibyangombwa bafite.

Ku wa Kane, abanyamakuru batambagijwe mu nyubako zateguriwe kwakira abo bimukira bagaragaza ubwiza bwazo utatandukanya n’ubwa hoteli. Mukuralinda yavuze ko hari ahantu 5 hatunganyijwe aba bimukira bazabamo.

Minisitiri w’u Bwongereza we mu kwezi gushize yavuze ko uretse kuba abo bimukira bagiye kwakiranwa urugwiro rudasanzwe, bagiye no kuba mu gihugu cy’ntangarugero mu mutekano ku mugabane w’Afurika no ku Isi.  

Bazaba babayeho nk’ibikomangoma- Amafoto y’amacumbi bazacumbikamo bakigera mu Rwanda

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA