Ishami ry’Umuryango w’Abibumbye ryita ku bimukira (IOM) ryatangaje ko abimukira 139, barimo abana 15, bapfuye nyuma y’uko ubwato barimo bwarohamye mu ijoro ryo ku wa Kane, hafi y’inkengero z’igihugu cya Djibouti ubwo berekezaga muri Yemeni.

IOM yatangaje ko abantu 82, bose bakomoka muri Etiyopiya, barokotse iyo mpanuka, mu gihe abandi bantu 84 bataraboneka.

Safiya Ibrahim, ushinzwe guhuza ibikorwa by’ubutabazi muri iryo shami, yavuze ko ubwo bwato bwarohamye hafi y’umujyi wa Obock, uri ku nkombe z’inyanja ya Djibouti.

Yagize ati: “Mu bwato harimo abagore n’abagabo, ndetse n’abana. Umubare w’abapfuye watangajwe by’agateganyo uracyari munini cyane.”

Alexandre Coissac, uhagarariye IOM muri Djibouti, yavuze ko bamwe mu barokotse bamubwiye ko ubwato bwatangiye kurengerwa n’amazi buhera inyuma, bakimara kubwinjiramo.

Yagize ati: “Turihanganisha abarokotse n’imiryango yabuze ababo muri iyi mpanuka, ndetse n’abataramenya amakuru y’abavandimwe babo.”

IOM yatangaje ko iri gufasha abarokotse, ibaha ubuvuzi ndetse ikabafasha kuvugana n’imiryango yabo kugira ngo bayimenyeshe uko bameze.

Coissac yavuze ko iyi mpanuka ikomeye yibutsa abantu akaga abimukira bahura nako igihe bava mu bihugu byabo bashaka ubuzima bwiza ahandi.

Yongeyeho ko umwe mu barokotse yamubwiye ko akomoka mu karere ka Tigray, gaherereye mu majyaruguru ya Etiyopiya, aho imirwano hagati y’inyeshyamba n’ingabo za leta yari yongeye gutera ikibazo cy’umutekano muke.

Nubwo Yemeni ikomeje kwibasirwa n’intambara y’abenegihugu imaze igihe, ndetse n’akarere kayikikije kakaba karangwa n’umutekano muke, abimukira baracyakoresha inzira z’ubusamo kugira ngo bajye muri iki Gihugu.

IOM ivuga ko buri mwaka, abantu ibihumbi mirongo bava mu bihugu byo mu ihembe rya Afurika bakora urugendo rugoye kandi rushyira ubuzima bwa bo mu kaga, bizeye kugera mu bihugu byo mu Barabu bashaka umutekano n’akazi.

Iyi mpanuka yongeye kugaragaza ibyago bikomeye abimukira bahura na byo mu gihe bashaka ubuzima bushya, aho bamwe bahasiga ubuzima, abandi bagatandukana n’imiryango yabo cyangwa bakaburirwa irengero.

Ibihe bitandukanye byagiye bibamo izindi mpanuka nkizi zigahitana abantu. Ku wa 4 Mata 2024: 38 bapfiriye hafi ya Djibouti

Ubwato bwari butwaye abimukira bwarohamye hafi y’umujyi wa Obock, ubwo bari mu rugendo rugana muri Yemeni. Abasaga 38 barapfuye, mu gihe 22 barokotse, abandi batandatu bakekwaga kuba bari mu bwato ntibigeze baboneka.

Ku wa 22 Mata 2024: Abantu 24 bapfiriye mu yindi mpanuka hafi ya Djibouti.Nyuma y’ibyumweru bibiri gusa habaye impanuka ya mbere, ubundi bwato bwari butwaye abimukira basaga 77 bwarohamye hafi ya Obock, ubwo bwavaga ku nkombe ya Yemeni.

Abantu nibura 24 barapfuye, 33 bararokoka, abandi 20 baburirwa irengero. Ku wa 10 Kamena 2024: 49 barapfuye, abandi 140 baburirwa irengero hafi ya Yemeni

Ubwato bwari butwaye abimukira bagera kuri 260 bwarohamye hafi y’akarere ka Shabwah muri Yemeni.

Muri iyo mpanuka, abantu nibura 49 barapfuye, abandi 140 baburirwa irengero. Mu bapfuye harimo abagore 31 n’abana batandatu

Abarokotse bavuze ko ubwato bwari buvuye ku cyambu cya Bossaso muri Somaliya, butwaye Abanyasomaliya 115 n’Abanyetiyopiya 145.

Ku wa 3 Kanama 2025: 56 bapfiriye hafi ya Yemeni.Ubwato bwari butwaye abimukira bagera kuri 200 bwarohamye hafi ya Shuqrah, mu ntara ya Abyan muri Yemeni. Abasaga 56 barapfuye, abandi 132 baburirwa irengero, naho 12 bararokoka. Muri abo bapfuye harimo abagore 14, kandi benshi bakekwaga kuba bakomoka muri Etiyopiya.

Impuguke n’imiryango mpuzamahanga igaragaza impamvu zitandukanye zituma abimukira bakomeza guhura n’ibyago mu nyanja harimo Ubukene no kubura akazi, Intambara n’umutekano muke, abacuruzi b’abantu,kubura inzira zizewe zo kwimuka n’izindi.

Mu mwaka wa 2025, iri shami ryari ryamaze kwandika abantu barenga 350 bapfuye cyangwa baburiwe irengero muri iyo nzira kuva uwo mwaka watangira, nubwo ryavuze ko umubare nyawo ushobora kuba urenze cyane.

Ba uwa mbere mu kumenya amakuru agezweho!!!