Aborozi bo mu Karere ka Nyagatare bagera ku 253 bizeye ko inkunga nyunganizi ingana na miliyoni 311 z’amafaranga y’u Rwanda bagenewe binyuze mu masezerano abafasha kubona ibikoresho byo kwifashisha mu bworozi, azaba imbarutso yo kuvugurura ubworozi, aho abagore n’urubyiruko basabwa nkunganire ya 30% naho abagabo bagasabwa iya 50%, bikazatuma umukamo wiyongera.

‎Minisiteri y’Ubuhinzi n’Ubworozi (MINAGRI) ibinyujije mu mushinga wayo ugamije kuvugurura icyororo no kuzamura umukamo RDDP2, yasinye amasezerano n’aborozi 253 bo mu Karere ka Nyagatare, afite agaciro ka miliyoni 311 z’amafaranga y’u Rwanda, azabafasha guhabwa ibikoresho birimo ibidamu (dam sheet), imashini zikata ubwatsi (Chopper machine) byo guhangana n’ibibazo by’izuba.

‎Umwe mu borozi bashyize umukono ku masezerano yo guhabwa inkunga nyunganizi, Twahirwa Peter wo mu Murenge wa Karangazi yavuze ko aborozi bazayikoresha neza ngo banoze n’ubworozi kandi ko izamufasha mu byo atashoboraga gukora wenyine.

‎‎Ati: “Iyi nkunga izamfasha kubona imashini ikata ubwatsi ifite agaciro ka miliyoni 2 z’amafaranga y’u Rwanda. Byari bigoye cyane ko nayigondera ubwanjye, Ubu izamfasha kugabura neza inka zanjye bityo nongere umusaruro ukomoka ku mata.”

‎Yavuze ko izo mashini zizafasha gukoresha neza ubwatsi kuko zibukata bugakoreshwa bwose ntihagire ubwangirika, bugakoreshwa uko bwakabaye.

Birungi Theopista Mupende, umworozi wo mu Murenge wa Rwimiyaga, mu Karere ka Nyagatare we yavuze ko yagiraga ikibazo cy’amazi yo kuhira inka, ariko ko ubwo ari mu bagiye guhabwa ibidmu (dam sheet) bizamufasha kubika amazi.

Yagize ati: “Mbere nari mfite ikibazo cyo kutagira uburyo bwo kubika amazi kandi kugurira inka amazi yo kuzuhira birahenze. Idamu nemerewe izamfasha mu kubika amazi kandi bizazamura umukamo.”

‎Ibidamu bizafasha aborozi kubika amazi ku buryo no mu gihe cy’izuba inka zitazayabura. Mu rwego rwo kubika amazi mu nzuri, hashyizwemo ibibumbiro n’ibigega.

‎‎Amasezerano ateye ku buryo bazahabwa  inkunga nyunganizi ku bikoresho, bazagira uruhare batanga, abagore n’urubyiruko basabwa kuba bafite 30% by’agaciro k’igikoresho basabye, naho abagabo bagatanga 50%.

‎Umuyobozi w’Akarere ka Nyagatare wungirije ushinzwe Imibereho myiza y’Abaturage Murekatete Juliet, yasabye aborozi kubyaza umusaruro amahirwe bakavugurura ubworozi, bakabukora bunguka.

Yagize ati: “Akarere ka Nyagatare ni Akarere k’ubuhinzi n’ubworozi, mu gihe cy’icyanda (mu Cyi / Impeshyi) usanga aborozi bafite ikibazo cy’amazi, ugasanga amatungo ntabona amazi neza. Umushinga RDDP icyo ugiye kudufasha ni uko ugiye gukemura ikibazo cyo mu gihe cy’icyanda aho amatungo yaburaga amazi cyane cyane ku nka. Wabonaga ko aborozi babashaga kubika amazi ari bake, none uyu mushinga wafashe aborozi 253 mu Mirenge itandukanye y’ubworozi basinye amasezerano n’umushinga ngo habeho no kubunganira kuko ku bufatanye na RAB harimo na nkunganire.”

Yasabye abo borozi gukoresha ayo mahirwe neza, bakita kuri izo ‘dam sheet’, bakanasukura amazi azirimo no gukomeza kwibuka ko abo ibyo bikoresho byagezeho baba babaye bandebereho, byose ari ukugira ngo barusheho kongera umukamo bikanazana impinduka mu buzima bwabo.

‎Uhagarariye Ikigo cy’Igihugu cyo guteza imbere Ubuhinzi n’Ubworozi (RAB) mu Turere twa Gatsibo na Nyagatare, Kayumba John yavuze ko amasezerano yasinywe hagati ya Minisiteri y’Ubuhinzi n’Ubworozi n’aborozi bo mu Karere ka Nyagatare akubiye mu ntego z’umushinga wa RDDP2, agamije cyane cyane kuvugurura icyororo cy’inka no kongera umukamo.

‎Yagize ati: “Umushinga icyo ugamije ni ugufasha ubworozi bw’inka zitanga umukamo utubutse. Icyo inka ikeneye cyane ni ubwatsi cyangwa se ikarya n’ibisigazwa by’imyaka nk’ikigorigori kandi ntiyagitamira cyose.

Leta yararebye ibona ko umworozi akwiye gufashwa agahabwa akamashini kugira ngo gasye bya bigorigori, inka ibashe kubirya byose nta na kimwe cyangiritse, si ubwatsi gusa ahubwo n’ibyo bisigazwa by’imyaka kwangirika kukaba guke, ikarya byinshi ikagira, inyota ikanywa amazi menshi bigatanga umukamo, ni yo mpamvu bahawe ‘dam sheet’.”

‎Yasabye aborozi gukoresha neza iyo nkunga kugira ngo barusheho kunoza ubworozi bwabo kandi ari inshingano zabo kuyikoresha neza kugira ngo bafate neza amatungo kandi barusheho kongera umukamo.

‎

Ba uwa mbere mu kumenya amakuru agezweho!!!