Guverinoma ya Mozambique yatangaje ko mu mpera z’icyumweru gishize abaturage bayo batanu baguye mu bitero byabibasiye muri Afurika y’Epfo babaziza ko ari abanyamahanga. Itangazo rya Guverinoma ya Mozambique ryo  kuri uyu wa 02 Kamena 2026, ryagaragaje ko abaturage bayo  800 bafatiwe mu mvururu n’ibikorwa by’urugomo byibasiraga abanyamahanga n’abimukira bari muri ako gace byadutse ku wa Gatanu w’icyumweru gishize  mu mujyi wa Mossel Bay.

Iri tangazo ryagaragaje ko bibabaje kubona abaturage ba Mozambique barindwi bapfa batanu muri bo bakaba baraguye mu bitero byibasiye abanyamahanga mu gihe abandi babiri bishwe n’impanuka ubwo bari mu modoka basubira mu gihugu cyabo.

Urwo rugomo ngo rwatumye abaturage ba Mozambique 300 basubizwa iwabo igitaraganya mu gihe abarenga 500 gato bahungishirijwe mu Burengerazuba bw’Intara ya Cape mu gihe gahunda yo kubasubiza iwabo igikomeje. Ku wa 31 Gicurasi, polisi yo muri Afurika y’Epfo  yatangaje ko iri gukora iperereza ku rupfu rw’abagabo babiri bapfiriye mu  mujyi wa Mossel Bay, ahari hatangiye ibikorwa byo kwibasira abanyamahanga.

Umuyobozi w’ako karere, Dirk Kotze yagaragaje ko atewe akababaro n’abaguye mu bitero byibasiye abanyamahanga aho abantu bishwe, bagatwikirwa abandi bakavanwa mu byabo. Imyigaragambyo yamagana abimukira muri ako gace isa nk’iyabaye mu byumweru bishize mu mujyi wa Johannesburg, uwa Durban, ndetse no mu bice bitandukanye by’Intara y’Iburasirazuba bwa Cape.

Si ubwa mbere Afurika y’Epfo yabamo ibikorwa nk’ibi byo kwamagana abanyamahanga kuko no mu 2008, 2015 na 2021 abimukira benshi barishwe, abandi ibihumbi bava mu byabo kubera ibitero byabagabweho hirya no hino mu gihugu.

Ba uwa mbere mu kumenya amakuru agezweho!!!