South Africa 2-1 Maroc

Ikipe y’Afurika y’Epfo yegukanye ku nshuro ya mbere igikombe cy’Afurika mu cyiciro cy’abagore  mu mupira w’amaguru « Women’s Africa Cup of Nations 2022» itsinze ku mukino wa nyuma ikipe y’igihugu ya Maroc.

Uyu mukino wa nyuma wabaye ku wa Gatandatu  taliki 23 Nyakanga muri Sitade Prince Moulay Abdellah i Rabat muri Maroc, ikipe y’Afurika y’Epfo « Banyana Banyana » yatsinze Maroc ibitego 2-1 byatsinzwe na  Hildah Magaia ku munota wa 63 na 71 ku ruhande rw’Afurika y’Epfo mu gihe igitego rukumbi cya Maroc cyatsinzwe na Rosella Ayane ku munota wa 80.

Umusifuzi mpuzamahanga w’Umunyarwanda, Mukansanga Salima ni we wayoboye uyu mukino wa nyuma warebwe n’abafana bagera ku bihumbi 46.

Ikipe y’Afurika y’Epfo yageze ku mukino wa nyuma isezereye ikipe ya Zambia muri ½ ku gitego 1-0 naho Maroc isezerera Nigeria  ifite iki gikombe inshuro 11  kuri penaliti 5-4 nyuma yo kunganya igitego 1-1.

Mu guhatanira umwanya wa 3, ikipe ya Zambia yatsinze Nigeria igitego 1-0. 

Mu nshuro 14 iki gikombe cy’Afurika gikinwe, ikipe ya Nigeria ni yo yacyegukanye inshuro nyinshi 11 (1991, 1995, 1998, 2000, 2002, 2004, 2006, 2010, 2014, 2016 na 2018) hakaza Guinea Equatorial inshuro 2 (2008 na 2012) n’Afurika y’Epfo inshuro imwe (2022).

Iyi mikino y’Afurika muri uyu mwaka wa 2022 yabereye muri Maroc kuva taliki 02 kugeza 23 Nyakanga 2022  yari yitabiriwe n’amakipe 12 aho yari agabanyije mu matsinda 3, itsinda A ryari ririmo Maroc, Senegal, Burkina Faso na Uganda. Itsinda B ryari rigizwe na Zambia, Cameroun, Tunisia na Togo naho itsinda C rigizwe na South Africa, Nigeria, Botswana n’u Burundi.

Ikipe ya Maroc, Senegal (itsinda A), Zambia, Cameroun  na Tunisia (itsinda B) na South Africa, Nigeria, Botswana ( itsinda C) ni zo zakomeje muri ¼ .

Ikipe y’ Afurika y’Epfo, Maroc, Zambia  na Nigeria  zabonye itike yo kuzaserukira Afurika mu mikino y’igikombe cy’Isi  « FIFA Women’s World Cup 2023 » izabera muri Australia na New Zealand taliki 20 Nyakanga kugeza 20 Kanama 2023. Ikipe ya Zambia  na Maroc ni ubwa mbere zizaba zitabiriye naho Nigeria ni inshuro ya 9 (1991, 1995, 1999, 2003, 2007, 2011, 2015, 2019 na 2023) mu gihe Afurika y’Epfo ari ubwa kabiri (2019 na 2023).

Ba uwa mbere mu kumenya amakuru agezweho!!!