Amajyepfo: Polisi yagaruje moto ebyiri zari zibwe abamotari
Imibereho

Amajyepfo: Polisi yagaruje moto ebyiri zari zibwe abamotari

NTAWITONDA JEAN CLAUDE

February 2, 2022

Ku wa Mbere taliki ya 31 Mutarama, Polisi ikorera mu Karere Kamonyi na Nyanza, yafashe moto zari zibwe abaturage. Iya Ngirinshuti Antoine w’imyaka 35 yafatiwe mu rugo rwa Muhigana Jean Paul utuye mu Murenge wa Runda, Akagari ka Kabagesera, Umudugudu wa Kabagesera. Indi itaramenyekana nyirayo yafatiwe mu Karere ka Nyanza, Umurenge wa Busasamana, Akagari ka Kibinja, Umudugudu wa Rebero.

Umuvugizi wa Polisi mu Ntara y’Amajyepfo, Superintendent of Police(SP) Theobald Kanamugire yavuze ko Ngirinshuti yabuze moto ye mu ijoro ry’italiki ya 30 Mutarama, ubwo abantu bicaga urugi bakinjira mu nzu Ngirinshuti yari aryamyemo bagatwara  moto yari mu cyumba cy’uruganiriro.

Ngirinshuti avuga abayitwaye bayijyananye n’ibyagombwa byayo byose yari yabiraje mu ngofero yambara (Casquet). Akimara kuyibura yatangiye kuyishakisha.

Yagize ati: “Ngirinshuti amaze kubura moto ye mu gitondo yatangiye kuyishakisha yifashishije ikoranabuhanga rya GPS riba muri mubazi. Yagendeye kuri iyo GPS imugeza mu rugo kwa Muhigana Jean Paul basanga moto iri mu nzu ye mu Karere ka Kamonyi, Umurenge wa Runda, Akagari ka Kabagesera, Umudugudu wa Kabagesera.

SP Kanamugire akomeza avuga ko umugore wa Muhigana yaje kuvuga uko iyo moto yageze mu nzu yabo. Yavuze ko ku mugitondo  saa kumi n’ebyiri  taliki ya 31 Mutarama hari abantu babiri baje mu kabari ke banywa inzoga zihwanye n’amafaranga y’u Rwanda ibihumbi 20 babura amafaranga yo kwishyura.

Abo bantu ngo bahisemo gusiga iyo moto ngo bavuga ko bazagaruka kuyitwara baje kwishyura izo nzoga banyweye. Gusa abo bantu ngo nta byangombwa by’iyo moto bamusigiye ndetse nta n’ubwo yari abazi.

Umuvugizi wa Polisi mu Ntara y’Amajyepfo akomeza avuga ko Ngirinshuti amaze kugera ahari moto ye bamubujije kwinjira mu nzu yitabaza Polisi iza kumuhesha iyo moto.

Yakomeje aburira abantu kujya bizera abantu batazi kuko bariya bantu basize moto nta cyizere bagombaga kugirirwa kuko nta n’ibyangombwa bya moto bari bafite.

Kuri ubu inzego z’umutekano ziracyarimo gushakisha abacyekwaho kwiba moto ya Ngirinshuti.

Abafatanywe moto z’inyibano batawe muri yombi

Nanone kuri uyu wa mbere tariki ya 31 Mutarama mu Karere ka Nyanza mu Murenge wa Busasamana, hafatiwe moto yo mu bwoko bwa TVS, yafatanwe uwitwa Mundanikure Ephron w’imyaka 38 na Mazimpaka Valens w’imyaka 29.

SP Kanamugire avuga ko kugira ngo iriya moto ifatwe byaturutse ku makuru yatanzwe na bamwe mu bamotari bo mu Karere ka Nyanza babonaga Mazimpaka ayitwaraho abagenzi nijoro.

Yagize ati: “Abamotari bavuga ko bajyaga babona Mazimpaka atwara abagenzi kuri moto nijoro gusa, baje kugira amakenga bakeka ko ari iyo yibye. Babimenyesheje  Polisi ihita ijya kuyishakisha ifatirwa mu nzu kwa Mundanikure  aho Mazimpaka yayibikaga.”

Mazimpaka amaze gufatwa yemeye ko moto yari ayimaranye iminsi itatu yayihawe n’uwitwa Emmanuel, ayimuha amubwira ko yayibye mu Karere ka Nyamagabe. Yari yayimuhaye ngo ajye ayitwaraho abagenzi nagira amafaranga abona amuheho, Mazimpaka na we aremera ko yayitwaraga nta cyangombwa na kimwe cyayo agira ndetse nta n’uruhushya rwo kuyitwara agira.

Mundanikure na Mazimpaka bahise bashyikirizwa Urwego rw’Igihugu rushinzwe Ubuhenzacyaha (RIB) rukorera muri Sitasiyo ya Polisi ya Busasamana, kugira ngo hatangire iperereza hanashakishwa Emmanuel bikekwa ko ari we wayibye ndetse hanashakishwa nyiri iyo moto.

Itegeko no 68/2018 ryo kuwa 30/08/2018 ingingo ya 166 ivuga ko  umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2) ,ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ingingo ya 167 y’iri tegeko ivuga ko ibihano ku cyaha cyo kwiba byikuba kabiri (2) iyo uwibye yakoresheje guca icyuho, kurira cyangwa yakoresheje igikoresho icyo ari cyo cyose gifungura aho utemerewe kwinjira,  kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije, kwiba byakozwe nijoro, kwiba byakozwe n’abantu barenze umwe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA