Amajyepfo: RIB irahugura Inzego z’ibanze ku byaha by’ihohoterwa
Imibereho

Amajyepfo: RIB irahugura Inzego z’ibanze ku byaha by’ihohoterwa

Imvaho Nshya

October 10, 2023

Kuva ejo ku wa Mbere tariki 09 Ukwakira 2023 Urwego rw’Ubugenzacyaha, RIB, rwatangiye guhugura abayobozi b’Inzego z’ibanze ku byaha by’ihohoterwa rishingiye ku gitsina n’irikorerwa abana.

Insanganyamatsiko igira iti “Uruhare rw’abayobozi b’Inzego z’ibanze ku byaha by’ihohoterwa rishingiye ku gitsina n’irikorerwa abana”.

Ku rwego rw’Igihugu, amahugurwa yatangiriye mu Murenge wa Mamba mu Karere ka Gisagara mu Ntara y’Amajyepfo.

Hahuguwe inzego z’Umudugudu kugeza ku rwego rw’Umurenge.

Urwego rw’Ubugenzacyaha rwatangaje ko aya mahugurwa agamije kwigisha no kongerera ubumenyi abayobozi b’Inzego z’ibanze kugira ngo habeho guhindura imyumvire n’imyitwarire ku byaha.

Inzego z’ibanze zahuguwe ku bijyanye no gukora raporo y’ibanze y’ihohoterwa ifasha mu iperereza, gufasha mu kurinda ibimenyetso ku wahohotewe ndetse no kunoza imikoranire.

Hari kandi no gusobanurira abayobozi mu Nzego z’ibanze ibyaha n’uburyo byakwirindwa no kugira uruhare mu kubitangaza.

Habineza Jean Paul, Umuyobozi w’Akarere ka Gisagara wungirije ushinzwe iterambere ry’ubukungu, yavuze ko amahugurwa agamije kubongerera ubumenyi no kugira imikoranire myiza na RIB mu gukumira ibyaha no kubirwanya.

Yagize ati “Barigishwa gukora raporo kuri ibi byaha, uko bafasha uwahohotewe n’uko bakorana n’inzego zitandukanye kugira ngo abahohotewe bahabwe ubufasha bwihuse, n’abakoze ibi byaha bakurikiranwe mu butabera, imikorere na serivisi zitangwa na Isange One Stop Centre mu gufasha abahohotewe”.

Ashimangira ko nk’Inzego z’ibanze aya mahugurwa azabafasha cyane ko basanganywe gahunda ya ‘Tubagororere mu muryango’ ishinzwe gukumira ibyaha bitaraba bafatanyamo n’inzego z’umutekano.

Nyiraminani Delphine, ushinzwe imibereho myiza mu Kagari ka Muyaga mu Murenge wa Mamba mu Karere ka Gisagara, yabwiye itangazamakuru ko yatunguwe n’ibyaha we yajyaga afata nk’ikosa.

Ati: “Icyantunguye n’ibyo najyaga mbona nk’ubuzima busanzwe ariko nk’aba nasanze ari icyaha. Nka kiriya cyaha cyitwa icyaha nshenguramutima”.

Agaragaza ko amahugurwa agiye kumufasha kurushaho kugira inama abaturage, akabumvisha ko igihe cyose uhoza ku nkeke umugore cyangwa umugabo, ari icyaha.

Aya mahugurwa arakomereza mu Mirenge ya Gishubi, Mibirizi na Ndora mu Karere ka Gisagara ndetse no mu Mirenge yo mu Turere twa Nyanza, Ruhango no mu Karere ka Kamonyi mu Ntara y’Amajyepfo.  

KAYITARE JEAN PAUL

TANGA IGITECYEREZO

  • Niyigaba Jean de Dieu
    October 10, 2023 at 9:30 am Musubize

    Mubyo mwiga mwigemo nibikorerwa abana babahungu ndetse nabagabo muri rusange kuko mwiga kubibazo byabakobwa nabagore mukagirango bo ntabyaha bagira kdi Hari abagore babaye amadayimoni ubwo ndavuga muri Rusange murwego rwigihugu simvuga mumajyepfo gusa,thx

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA