Ikipe y’Igihugu y’u Rwanda ‘Amavubi’ yatsinze iya Cape-Vert ibitego 2-1 mu mukino w’umunsi wa kabiri wo mu Itsinda K ryo gushaka itike y’Igikombe cya Afurika cya 2027 (CAN 2027), yuzuza amanota atandatu kuri atandatu.

Uyu mukino wabereye kuri Estádio Nacional de Cabo Verde ku mugoroba wo kuri uyu wa kabiri, tariki ya 29 Nzeri 2026.

Umutoza w’u Rwanda, Stephen Constantine, yari yakoze impinduka imwe, Mugisha Gilbert asimbura Kwizera Jojea mu bakinnyi 11 babanje mu kibuga.

Cap-Vert yari imbere y’abafana bayo niyo yatangiye neza umukino ikinira cyane mu rubuga rw’Amavubi yakinaga yugarira.

Uburyo bwa mbere Amavubi yaremye bwari ubwo ku munota wa 15 ubwo Leroy Jacques Mickels yakinanaga na Niyomugabo Claude wahinduye umupira wabisikanye na Vozinha Dias wari usohotse, ariko hakabura mugenzi wabo uwukina.

Nyuma y’iminota irindwi, Leroy Jacques Mickels yahinduye umupira mwiza mu rubuga rw’amahina ashaka mukuru we, Joy-Lance Mickels, ariko ntiyawugeraho.

Ku munota wa 32, Cap-Vert yahawe coup-franc itishimiwe n’abakinnyi b’Amavubi, itewe na Sidny Cabral ikurwaho na Mutsinzi Ange n’umutwe.

Byasabye gutegere ku munota wa 40 kugira ngo Cape-Vert ifungure amazamu ku gitego cyatsinzwe Ku Gilson Tavares ku mupira mwiza yahawe na kapiteni Rayan Mendes ari mu rubuga rw’amahina ahita awushyira mu izamu.

Nyuma yo gutsindwa igitego Amavubi yiminjiriyemo agafu asatira cyane izamu rya Cap-Vert bidatinze ku munota wa 45+2 Niyomugabo Claude yatsinze igitego cyo kwishyura ku ishoti rikomeye yatereye hanze y’uburuga rw’amahina, umupira uruhukira mu izamu.

Igice cya mbere cyarangiye amakipe yombi anganya igitego 1-1.

Mu igice cya kabiri, Amavubi yatangiranye impinduka Iradukunda Elie Tatou asimbura Biramahire Abbedy.

Izi mpinduka zahise zitanga umusururo kuku munota wa 52 Iradukunda Elie Tatou yatsinze igitego cya kabiri ku mupira wahinduwe na Joy Lance Mickels.

Ku munota wa 69’ Umutoza w’Amavubi Stephen Constantine yongeye gukora izindi mpinduka Kwizera Jojea na Noam Emeran basimbura Mugisha Gilbert na Leroy-Jacques Mickels.

Mu minota 70’ Cap-Vert yasatiriye bikomeye ishaka igitego cyo kwishyura mu minota yari isigaye mu gice cya kabiri, ariko umukino urangira itabigezeho

Umukino warangiye Amavubi y’u Rwanda yatsinze Cape-Vert ibitego 2-1, yuzaza amanota atandatu kuri atandatu.

Mugisha Bonheur wabonye ikarita y’umuhondo muri uyu mukino wa Cap-Vert, yakurikiye indi yabonye mu mukino wa Cap-Vert, azasiba umukino uzakurikiraho.

Undi mukino wo muri itsinda K, Mali irakirwa na Liberia mu mukino uteganyijwe Saa Tatu z’ijoro kuri uyu wa 29 Nzeri 2026.

Ba uwa mbere mu kumenya amakuru agezweho!!!