Sena y’Amerika yasabye iperereza ku birego RDC ishinja u Rwanda
Amakuru

Sena y’Amerika yasabye iperereza ku birego RDC ishinja u Rwanda

NTAWITONDA JEAN CLAUDE

May 30, 2022

Leta Zunze Ubumwe z’Amerika (USA) zasabye ko hakwiye gukorwa iperereza ku birego Repubulika Iharanira Demokarasi ya Congo (RDC) ishinja u Rwanda byo gufasha no gushyigikira umutwe w’inyeshyamba za M23.

Byagarutsweho n’Umuyobozi wa Komisiyo ya Sena ya USA ishinzwe ububanyi n’amahanga Senateri Bob Mendez uvuga ko iryo perereza rikenewe kugira ngo nihaboneka ibihamya bifatika u Rwanda rube rwafatirwa ibihano bigenerwa ibihugu bitera inkunga imitwe yitwaje intwaro.

Ibirego bya Repubulika Iharanira Demokarasi ya Congo ku Rwanda ni ibirego bitajya bihinduka ariko bidafitiwe igihamya gifatika, ku buryo byageze n’aho ingabo za RDC (FARDC) zifatanyije n’umutwe w’iterabwoba wa FDLR mu gushimuta abasirikare babiri b’u Rwanda barimo bacunga umutekano ku mupaka.

Mu itangazo rigufi yasohoye mu mpera z’icyumweru gishize, Bob Mendez yavuze ko yamenyeshejwe ko Leta y’u Rwanda yihishe inyuma y’ibitero bya M23 ku butaka bwa RDC byibasiye abasirikare ba FARDC, Ingabo z’Umuryango w’Abibumbye ndetse n’abasivili.

Mendez yongeyeho ko umuntu wese cyangwa igihugu bihamwe no gufasha umutwe witwaje intwaro mu buryo ubwo ari bwo bwose, birabiryozwa kandi bigafatirwa ibihano.  

Intara ya Kivu y’Amajyaruguru imaze iminsi ikabakaba ibyumweru bibiri irangwamo intambara iremereye ihuje FARDC na M23, ariko Leta ya Kinshasa igashinja u Rwanda gutera inkunga inyeshyamba za M23 ziharanira uburenganzira bw’Abanyekongo bavuga Ururimi rw’Ikinyarwanda bigatuma badafatwa nk’Abenegihugu.

Imirwano ya M23 irafatwa n’abahanga mu by’intambara nk’imwe mu ntambara zashowe n’inyeshyamba ikamara igihe kinini cyane muri RDC mu gihe gisanga imyaka 10 ishize.

Iyo mirwano yafatiwemo ibirindiro by’ingabo za FARDC bitandukanye birimo ibya Rumangabo, ari na cyo kigo cya gisirikare kinini kurusha ibindi mu Karere ka Rucuru ko mu Ntara ya Kivu y’Amajyaruguru, nubwo nyuma cyaje kongera gusubiranwa n’ingabo za FARDC.

Umuyobozi wa Pariki y’Igihugu y’Ibirunga Emmanuel de Merode, yavuze ko igice kinini gihana imbibi n’iyo Pariki cyose cyigaruriwe na M23.

U Rwanda rwatunguwe n’ibyemezo rwafatiwe na RDC yinangiye yanga kumvikana n’inyeshyamba  za M23 binyuze mu nzira zumvikanyweho ku rwego rw’Akarere, bikabyara ingaruka zo kwivovota kw’izo nyeshyamba ziharanira kubona uburenganzira busesuye nk’abandi Banyarwanda.

Umubano w’u Rwanda na RDC wajemo agatotsi, bituma Ambasaderi w’u Rwanda muri icyo Gihugu ahamagazwa, ingendo zakorwaga n’Isosiyete ya RwandAir zirahagarikwa byose bishingiye kuri ibyo birego bivugwa ko bidafitiwe gihamya ifatika.

Guverinoma y’u Rwanda ikomeje guhakana ibyo ishinjwa byose, ikavuga ko icyo gihugu gikwiye kureka amagambo ahubwo kikubahiriza ibikubiye mu nzira zashyiriweho gukemura ibibazo by’umutekano biterwa n’imitwe y’inyeshyamba iri muri icyo Gihugu.

Umuvugizi wungirije wa Guverinoma y’u Rwanda, Alain Mukuralinda yatangarije RBA ko iki ari ikibazo kiri hagati y’Abanyekongo ubwabo, bakwiye kwicara hamwe bakagishakira ibisubizo.

Mukuralinda yavuze ko ari ikibazo cy’amateka kiri hagati y’abatuye iki gihugu ubwabo, bakwiriye gushakira ibisubizo. Yasabye ko igihugu cyagaragaza ibimenyetso bifatika aho gushyira abantu mu rujijo.

Umunyamategeko akaba n’inzobere mu mateka y’ibibazo byo mu Burazirasuba bwa Congo Gasominari Jean Baptiste, yavuze ko hashize imyaka 25 iki gihugu  kibarizwamo imitwe y’abarwanyi isaga 140, ariko by’umwihariko muri iyo mitwe hakaba harimo n’umutwe w’iterabwoba wa FDLR washinzwe n’abasize bakoze Jenoside yakorewe Abatutsi, ukaba ukomeje no guhungabanya umutekano w’u Rwanda n’uw’Abanyekongo.

Umuvugizi wungirije wa Guverinoma y’u Rwanda yongeye kugaragaza ko ubushotaranyi bwa RDC ifatanyije na FDLR burimo gutera ibisasu ku butaka bw’u Rwanda mu bihe bitandukanye, ariko ko u Rwanda rutazigera rwinjira muri iyi ntambara.

Mu ntambara yo mu 2012-2013 inyeshyamba za M23 na bwo zafashe Umujyi wa Goma igihe gito, na bwo bivugwa ko u Rwanda rwari rushyigikiye ibyo bitero mu gihe izo nyeshyamba zokejwe igitutu zigahitamo guhungira mu Rwanda nubwo zahise zamburwa intwaro zikajyanwa gucumbikirwa mu Nkambi iri mu Burasirazuba bw’Igihugu kure cyane y’umupaka w’u Rwanda na RDC nk’uko biteganywa mu masezerano mpuzamahanga.

Ubuyobozi bwa M23 buratera utwatsi RDC ishinja igihugu cy’abaturanyi ibirego bidashinga mu gihe ari na cyo cyari gikomeje gutera intambwe ikomeye mu kuzahura ubutwererane bw’ibihugu byombi mu nzego zitandukanye.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA