AU ihangayikishijwe n’intambara itutumba hagati y’u Rwanda na RDC
Amakuru

AU ihangayikishijwe n’intambara itutumba hagati y’u Rwanda na RDC

Imvaho Nshya

May 29, 2022

Ubwoba n’impungenge ni byinshi ku Banyarwanda, abbanyekongo,ibihugu by’abaturanyi ndetse n’Afurika muri rusange nyuma y’ubushotoranyi ndengakamere bukomeje gukorwa n’Ingabo za Repubulika Iharanira Demokarasi ya Congo (RDC) ku Rwanda, uhereye ku gutera ibisasu ku butaka bw’u Rwanda, gushimuta abasirikare bo mu Ngabo z’u Rwanda , gushinja Abanyarwanda kuba inyuma y’urugamba bafitanye na M23 n’ibindi.

Mu gihe bamwe badashidikanya kuvuga ko mu bigaragara bigoye guhamya ko uretse intambara hari ubundi buryo ibi bibazo byakemurwamo, ariko ubuyobozi bw’Umuryango w’Afurika Yunze Ubumwe (AU) bwasabye ibihugu byombi kwihutira gukemura amakimbirane binyuze mu biganiro by’amahoro aho kujya mu ntambara kuko isenya ariko itubaka.

Perezida wa Senegal ari na we uyoboye Umuryango w’Afurika Yunze Ubumwe, kuri iki Cyumweru yahamagariye u Rwanda na RDC guhurira mu biaganiro.

Ni nyuma y’aho RDC ku wa Gatandatu yahagaritse ingendo za RwandAir mu bice bitandukanye by’icyo Gihugu, ndetse inahamagaza Minisitiri w’Ububanyi n’Amahanga w’u Rwanda Dr. Biruta Vincent, nyuma yo gutangaza ko bafashe abasirikare babiri bo mu Ngabo z’u Rwanda bari ku butaka bwa Congo.

U Rwanda rwo ruvuga ko abo basirikare bafashwe bari mu bikorwa byo gucunga umutekano ku mupaka, bikaba byarakozwe na FARDC ku bufatanye n’abarwanyi bo mu mutwe w’iterabwoba wa FDLR.

Ubuyobozi bw’Ingabo z’u Rwanda (RDF) bwasabye RDC kurekura abasirikare b’u Rwanda barimo gukorerwa iyicarubozo mu gihe bafashwe basanzwe mu kazi kabo ka buri munsi, bikitwa ko bari bateye icyo Gihugu.

Macky Sall yagize ati: “Mpangayikishijwe n’umwiryane ukomeje kuzamuka hagati y’u Rwanda na Repubulika Iharanira Demokarasi ya Congo. Ndasaba umutuzo n’ibiganiro hagati y’ibihugu byombi, no gukemura icyo kibazo mu mahoro hisunzwe inzego zo mu Karere ndetse n’Umuryango w’Afurika Yunze Ubumwe (AU).”

Impuguke mu bya Politiki n’ububanyi n’amahanga ziravuga ko mu gihe u Rwanda rutahwemye gushaka umubano hagati yarwo na RDC, icyo gihugu cyagiye kigaragaza mu bihe bitandukanye ko kitizeye u Rwanda nk’umuturanyi wizewe wifuza umubano utanga inyungu ku mpande zombi.

Haracyategerejwe umwanzuro ibihugu byombi bishobora gufata ku bijyanye no gukemura aya makimbirane yiganjemo n’akangonorwa k’amateka mu gihe RDC yahisemo kwiyunga n’umutwe w’iterabwoba uhungabanya umutekano w’u Rwanda mu myaka 28 ishize.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA