BAL 2022: Ikipe ya REG BBC, US Monastir, AS Salé na SLAC  muri ¼   

BAL 2022: Ikipe ya REG BBC, US Monastir, AS Salé na SLAC  muri ¼   

NTAWITONDA JEAN CLAUDE

March 16, 2022

CFV Beira 89- 94 REG BBC

DUC 86-91 AS Salé

Ikipe ya REG BBC (Rwanda), US Monastir (Tunisia), AS Salé (Maroc) na SLAC (Guinea) yabonye itike ya ¼ cy’irangiza  cy’irushanwa rya BAL 2022 nyuma yo kwitwara neza mu imikino  y’amajonjora yo mu itsinda rya mbere “Sahara Conference” yaberaga i Dakar muri Senegal kuva taliki 05 kugeza 15 Werurwe 2022.

Ku munsi wa nyuma w’iyi mikino y’amajonjora, taliki 15 Werurwe 2022  habaye imikino 2 aho ikipe ya REG BBC yitwaye neza itsinda CFV Beira yo muri Mozambique amanota 94 kuri 89.

Muri uyu mukino, REG BBC yitwaye neza itsinda  uduce tubiri tubanza amanota 20 kuri 17 na 28 kuri 21. Agace ka 3, CFV Beira yatsinze amanota 23 kuri 18 na ho agace ka 4 amakipe yombi anganya amanota 28 kuri 28.

Umukinnyi wa REG BBC, Ndayisaba Ndizeye Dieudonne ni we witwaye neza muri uyu mukino aho yatsinze amanota 21, agarura imipira 13 itageze mu nkangara “Rebounds” anatanga imipira 4 yavuyemo amanota.

Nshobozwabyosenumukiza Jean Jacques Wilson ni we watsinze amanota menshi muri uyu mukino (28).

Undi mukino wabaye, ikipe ya AS Salé yo muri Maroc yatsinze DUC  yo muri Senegal amanota 91 kuri 86.

Terrel De Von Stoglin ukinira ikipe ya AS Salé ni we witwaye neza muri uyu mukino aho yatsinze amanota 30, agarura imipira 7 itageze mu nkangara “Rebounds” anatanga imipira 4 yavuyemo amanota.

Nyuma y’iyi mikino y’amajonjora, ikipe ya REG BBC ni yo yasoreje ku mwanya wa mbere ikurikirwa na US Monastir (Tunisia), AS Salé (Maroc) na SLAC (Guinea). Aya makipe akaba ari yo yabonye itike ya ¼ cy’irangiza. Ku mwanya wa 5 haje CFV Beira (Mozambique) na ho ku mwanya wa 6 haza DUC (Senegal).

Nyuma y’iyi mikino yo mu itsinda rya mbere, kuva taliki 09 kugeza 19 Mata 2022 i Cairo mu Misiri muri Hassan Mostafa Indoor Sports Complex  hazabera imikino yo mu itsinda rya kabiri “Nile Conference” rigizwe n’ikipe ya  Zamalek (Misiri) ifite igikombe giheruka (BAL 2021),  BC Espoir Fukash (RDC),  Cape Town Tigers (South Africa), Cobra SC (South Sudan), FAP (Cameroun)  na Petro de Luanda (Angola). Aha na ho  amakipe  azakina hagati yayo, hanyuma amakipe 4 ya mbere akomeze muri ¼.

Amakipe 4 yo mu itsinda rya mbere n’andi 4 yo mu itsinda rya kabiri    azahurira i Kigali mu Rwanda  aho imikino ya ¼, ½  n’umukino wa nyuma bizabera muri Kigali Arena kuva taliki 21 kugeza 28 Gicurasi 2022.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA