Bamporiki yasabye Abanyarwanda gukomeza umurage w’Inkotanyi (Video)
Amakuru

Bamporiki yasabye Abanyarwanda gukomeza umurage w’Inkotanyi (Video)

NTAWITONDA JEAN CLAUDE

March 18, 2022

Umunyamabanga wa Leta muri Minisiteri y’Umuco n’Urubyiruko, Bamporiki Edouard, asaba Abanyarwanda gukomeza umurage w’Inkotanyi no kwitwara gikotanyi mu migirire yabo ya buri munsi.

Ni imbwirwaruhame yagejeje ku bitabiriye ibirori byabereye mu ishuri rya Lycée de Kigali taliki 11 Werurwe 2022, ubwo hizihizwaga ukwezi kwahariwe umuco mu mashuri.

Mu mbwirwaruhamwe ye yagarutse ku ntekerezo z’abakurambere n’umushinga bari bafitiye u Rwanda, uwo mushinga Inkotanyi zarawukomeje bituma u Rwanda rwema.

Yagize ati “[…] Abakurambere batekereza kubaka u Rwanda nk’umushinga bari bazi neza ko ari umushinga uzaba uruhererakane.

Banatekerezaga ko dushobora gukomwa mu nkokora bityo hakaboneka intwari zitanga kugira ngo u Rwanda rutaba ingaruzwamuheto y’abanyamahanga.

Umwaduko w’abakoloni wabaye icyorezo cyadutindanye, cyatwiciye ingabo, cyahagaritse umuvuduko w’iterambere tuza kugira Imana Inkotanyi zibona ko bitakomeza gutyo.

Ziterwa ubwoba n’umutongero w’abakurambere, zigambirira kunamura u Rwanda no kurwimana ziruvana ku manga zirarwunamura rurema.

Uyu murage w’inkotanyi ni wo nshaka ko dukomeza uko uri, kuko uratubereye. 

Umurage w’Inkotanyi ni umurage w’ubudaheranwa. U Rwanda rwahuye n’ingorane nyinshi mu mirage dufite ariko Inkotanyi ziravuga ngo niyo watsindwa kandi wari umutaneshwa, niyo waterwa, niyo wababara, niyo izuba ryakwica, niyo imvura yakunyagira ari nyinshi ariko umunyarwanda iyo ava akagera ntaheranwa!

Ubwo turi Abadaheranwa, ubwo turi abo mu kinyejana cy’Ubudaheranwa, bana b’Abanyarwanda uyu mutongero dutongerewe n’ababyeyi tukiri kumwe, dutongerewe n’ababyeyi batabarutse hambere aha, dufite mu Cyerekezo 2050 dukwiye gusesengura tukacyumva ntihazagire ikiduherana.

Ushobora kugira ingorane ukisanga mu kigare, ntikikaguherane u Rwanda ruragukeneye. Ushobora kugira ingorane ugasanga uwo muva inda imwe, uwo mwigana ari mu byamurangaje ashaka kukujyanamo ngo mwembi murangarane, wabibona ariko ntibyaguherana.

Kuko Umurage duhawe n’Inkotanyi, ni umurage w’Ubudaheranwa!

Mu byo abakurambere baturaze harimo no gukotana, ukotana aba akotanira inyungu z’u Rwanda.

Iyo gukotana biza kuba ari byo twahawe n’abanyamahanga twari kujya dusinzira tugakangukira hejuru tugira tuti ‘abanyamahanga bajyanye ubukotanyi bwabo’.

Ubukotanyi ni umwimerere w’u Rwanda, icyakora n’ab’ahandi bashatse gukotana bakotana nubwo bitabemerera guhagararamo neza nk’iyo ukotana uri umunyarwanda.

Uyu murage w’Ubudaheranwa muri iyo ntekerezo y’Ubukotanyi, bana b’Abanyarwanda muwukomereho.

Ni umurage wanyu, ntawe muwurwanira!

Umukoro wo kwitwara gikotanyi nk’Umunyarwanda, ni wo mukoro w’ibanze.

Kubanza gusa n’u Rwanda, ukabanza gusa n’iby’i Rwanda, ukabanza gusa nk’intwari z’i Rwanda, ukagira imigirire y’Abanyarwanda noneho ugashaka kurenzaho kugira ngo ube indashyikirwa mu banyarwanda n’abanyamahanga, ni umurage ukomeye kandi ni umurage ukoreka.

Umwana wavukiye mu rugo rw’intwari aba afite igishoro avana kuri Se. Uko Se yitanze, uko Nyina yitanze iyo nkuru y’uburyo bitanze kugira ngo uhagere, hari ibyatunganye, aba ari igishoro.

Iyo wagize ingorane ukavukira mu rugo rw’umuntu w’ikigwari akakwibaruka ukavuga uti ariko sinzaba nka we nubwo ari we nkomokaho.

Erega nabyo ni igishoro kirimo umuhigo ukomeye wo kuvuga ngo iyi nzira itari nziza nasanzemo umubyeyi wanjye ndashaka kumuhinyuza ngiriye u Rwanda, nabyo bikubera izindi mbaraga zituma ukora cyane kugira ngo abari bazi ko uwo muryango nta cyiza cyawuvamo bazabone hashibutse ishami rishibutse ku ishavu cyangwa rishibutse ahantu hadashoboka.

Amateka yacu mu Rwanda yaduhaye ibishoboka kugira ngo dushinge imizi, yaduhaye ibishoboka byose kugira ngo dukorere u Rwanda […]”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA