Banki ya Kigali yatanze miliyoni 150 Frw zo kubaka amacumbi aciriritse
Amakuru

Banki ya Kigali yatanze miliyoni 150 Frw zo kubaka amacumbi aciriritse

NTAWITONDA JEAN CLAUDE

March 15, 2022

Banki ya Kigali yageneye ubuyobozi bw’Umujyi wa Kigali miliyoni 150 z’amafaranga y’u Rwanda azifashishwa mu kubaka amacumbi aciriritse ajyanye n’igihe yo gutuzamo abaturage bari basanzwe batuye mu bice bishyira ubuzima bwabo mu kaga mu Murenge wa Gitega Akarere ka Nyarugenge.

Umushinga wo kubaka ayo mazu watangijwe kuri uyu wa Kabiri taliki ya 15 Werurwe mu muhango witabiriwe na Minisitiri w’Ubutegetsi bw’Igihugu Gatabazi Jean Marie Vianney, Umuyobozi w’Umujyi wa Kigali Rubingisa Pudence n’Umuyobozi wa Banki ya Kigali Dr. Diane Karusisi n’abandi bayobozi bashyize ibuye ry’ifatizo ahazubakwa ayo macumbi.

Biteganyijwe ko ayo macumbi azatuzwamo imiryango 11, aho agiye kubakwa ku butaka bwari butuyeho imiryango itatu.

Umuyobozi wa Banki ya Kigali Dr. Diane Karusisi, yavuze ko batewe ishema no kugira uruhare mu mushinga nk’uyu uziye igihe aho Leta y’u Rwanda ikomeje gushyira imbaraga mu gutuza abaturarwanda heza kandi habasha kwihanganira imihindagurikire y’ikirere.

Yagize ati: “Twishimiye gufatanya n’Umujyi wa Kigali gutanga amacumbi meza ku batuye ahantu hashobora gushyira ubuzima bwabo mu kaga. Banki ya Kigali, nk’umufatanyabikorwa mwiza w’abaturage, ihora ishakisha ubufatanye nk’ubu kugira ngo tuzamure imibereho y’abaturage dukorera.”

Yakomeje avuga ko uyu mushinga uziye igihe aho ikirere gikomeje kugaragaramo imvura idasanzwe. Ati: “Turimo guharanira kuva mu ngaruka z’icyorezo kandi tugomba gushyigikira abababaye kurusha abandi mu miryango yacu.”

Uyu mushinga utangiijwe mu gihe Umujyi wa Kigali ukomeje guharanira kongerera agaciro imiturire y’Umujyi binyuze mu gutegura imiturire ijyanye n’igihe ariko itagira n’umwe iheza inyuma.

Uburyo bushya bw’imiturire bwatangiye gushyirwa mu bikorwa mu Mudugudu w’icyitegererzo wa Mpazi uturanye n’ahari kubakwa izo nyubako nshya zizatuzwamo imiryango 11 mu gihe ari ubutaka bwatanzwe n’imiryango itatu gusa.

Muri ubu buryo bushya bw’imiturire, abaturage ni bo batanga ubutaka bari batuyeho bakongera kubakirwa inyubako nshya zijyanye n’imiturire ikenewe mu gishushanyombonera gishya cy’Umujyi wa Kigali.

Ubuyobozi bw’Umujyi wa Kigali buvuga ko kugeza ubu hamaze kubakwa amacumbi 37 mu gihe hakiri andi 56 akirimo kubakwa. Amacumbi 37 yuzuye kuri ubu acumbitsemo imiryango 37 yakuwe mu manegeka kuri ubu ikaba ituye ahantu heza.

Amacumbi 56 arimo kubakwa kuri ubu byitezweho ko azaturamo indi miryango yakuwe mu manegeka, iyi gahunda ikaba izakomeza no mu bindi bice byo mu turere dutatu tw’umujyi bigaragaramo imiturire itajyanye n’igishushanyombonera.

Uduce duteganyirizwa iyo mishanga byihuse ni aka Gatsata yo mu Karere ka Gasabo na Muhima yo muri Kanyarugenge usanga inzu nyinshi zubatswe mu manegeka . Igihe cyo kuba utwo duce twavuguruwe tuzagenwa n’ubushobozi uko buzajya bugenda buboneka ari na yo mpamvu abafatanyabikorwa nka Banki ya Kigali ari ingenzi cyane muri uru rugendo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA