Barashimira Perezida Kagame isoko rya Bugarama ribahuza n’ibihugu 2
Amakuru

Barashimira Perezida Kagame isoko rya Bugarama ribahuza n’ibihugu 2

NTAWITONDA JEAN CLAUDE

May 12, 2022

Abaturage bo mu Murenge wa Bugarama mu Karere ka Rusizi, barishimira ko kuri ubu batangiye gukorera mu isoko rya Kijyambere rya Bugarama rikaba ribahuza n’abacuruzi ndetse n’abarihahiramo baturutse mu Gihugu cy’abaturanyi cya Repubulika Iharanira Demokarasi ya Congo (RDC) n’icy’u Burundi.

Abaturage bo mu Karere ka Rusizi bashimira Perezida wa Repubulika y’u Rwanda Paul Kagame ku bw’iryo soko ryiza ryambukiranya imipaka yabahaye. Nyuma yo kuritaha, baramwizeza gukora cyane rikababera umusemburo w’ubukire.

Abacururiza muri iryo soko rya Bugarama bagaragaje imbamutima zabo ubwo basurwaga n’Umunyamabanga wa Leta muri Minisiteri y’Ubuhinzi n’Ubworozi Ngabitsinze Jean Chrysostome, Guverineri w’Intara y’Uburengerazuba Habitegeko Francois n’abandi bayobozi mu nzego zitandukanye.

Ngabitsinze yasabye abo bacuruzi  kurushaho kubyaza umusaruro ibikorwa remezo bashyirirwaho, kunoza ubuhahirane n’ibihugu bihana imbibi n’u Rwanda ndetse no kurushaho gutanga serivisi nziza.

Ati: “Ibi bikorwa remezo Leta yabashyiriye hano mubikoreshe neza mubibyaze umusaruro kandi binabafashe kunoza imikorere mu buhahirane n’ibihugu bihana imbibi n’u Rwanda, murusheho gutanga serivisi nziza”.

Iryo soko riremamo ibicuruzwa bitandukanye kandi riremwa n’Abanyarwanda ndetse n’abaturanyi bo muri Repubulika iharanira Demokarasi ya Congo (RDC), n’abavuye mu Burundi bakaba bashobora kurihahiramo.

Abacururiza mu isoko ryambukiranya imipaka rya Bugarama bijeje ko bazakora cyane bagakira

Nyuma yuko hari ibibazo byagiye bikemurwa mu gihe cyashize harimo ikibazo cya Seburikoko wambuye abaturage, nyuma yo kubaha amasambu 4,650; nyuma yo kububakira isoko ryambukiranya imipaka, hakemuwe ibibazo mu micungire ya koperative z’umuceri.

Abo bayobozi bagiranye inama n’abahinzi b’umuceri mu Kibaya cya Bugarama, hagamijwe gushakira ibisubizo ibibazo abahinzi b’umuceri bafite birimo n’igiciro cy’imbuto y’umuceri.

Abahinzi bahawe umwanya babaza ibibazo birimo kuba imbuto zihenze kandi ari bo bazitubura, gukatwa amafaranga menshi batazi impamvu, ikibazo cy’amafaranga y’ubwishingizi bw’imyaka bishyurwa atajyanye n’ibyabazwe, kudahabwa amakuru n’abayobozi, kudahabwa umuceri uhagije wo kurya.

Ibibazo abahinzi b’umuceri ba Bugarama bagaragaje ndetse bigahabwa umurongo harimo ibiciro by’imbuto y’umuceri, imiyoborere itanoze ya za Koperative, kutishyurwa neza amafaranga bishyurwa mu bwishingizi n’ibindi.

Ngabitsinze yasabye abahinzi b’umuceri kutemera serivisi mbi. Ati: “Ntimukemere guhabwa serivisi mbi”.

Nyuma yo guha umurongo ibibazo byabo no guhana gahunda yo kuzagarukana ibisubizo ku bitarangiye, habayeho no kwishimira ibyo bagejejweho n’Ubuyobozi bwiza bw’Igihugu.

Banasuye isoko rya kijyambere ryambukiranya imipaka rya Bugarama mu Murenge wa Bugarama (Foto MINAGRI)
Hatanzwe umwanya wo kubaza ibibazo ( Foto Akarere ka Rusizi)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA