Bimwe mu byatumye Hilltop Hotel ihabwa ibihano harimo n’imperi
Amakuru

Bimwe mu byatumye Hilltop Hotel ihabwa ibihano harimo n’imperi

NTAWITONDA JEAN CLAUDE

March 7, 2022

Iyo uvuze imperi (hari ababyita cyangwa ibiheri) mu Rwanda uhita wumva umwanda bikajyana no kudasinzira biturutse ku dusimba tuba mu buryamo bw’abantu no ku nkuta z’ibyumba twinjira mu myenda umuntu akaba ashobora kudutahana iwe mu gihe twinjiye mu byo yajyanye ibushyitsi.

Akenshi ibiheri bikunze kuruma abantu basinziriye kandi akenshi ntibumva ko byabarumye kugeza bakangutse, kubera ko abashakashatsi bavuga ko ‘kibatera ikinya’ kikamara iminota igera ku icumi kibanyunyuza amaraso.

Mu by’ukuri nta ndwara izwi ikwirakwizwa n’ibiheri, nk’uko bimeze ku mibu n’utundi dukoko, ariko na none bibuza abantu amahwemo bigatuma badasinzira neza.

Kenshi ibiheri bigera iwawe biturutse mu myenda, mu bintu biturutse ahandi nko mu mashuri abanyeshuri baje mu kiruhuko, mu mahoteri ndetse no mu ngo z’ahandi.

Ibiheri bishobora gutera umuntu uwo ari we wese bititaye ko uri umunyamugi, umunyacyaro, umukene cyangwa umukire.

Muri iyi nkuru turibanda ku biheri bivugwa muri Hilltop Hotel and Country Club iherereye mu Murenge wa Kanombe mu Karere ka Kicukiro mu Mujyi wa Kigali ahazwi nko mu Giporoso.

Urwego rw’Iterambere (RDB) ruherutse gutangaza ko ruciye amande angana n’ibihumbi 300 iyi Hoteli bitewe na Serivisi mbi yatanze mu gihe cya Tour du Rwanda 2022.

Mu butumwa yanyujije ku rukuta rwayo rwa Twitter, RDB yavuze ko ibaye ifunze iyo hotel mu gihe cy’ukwezi kubera isuku nke yasanzwemo mu bugenzuzi buheruka gukorwa.

Bugira buti: “Nyuma y’ibirego byinshi hakozwe ubugenzuzi bwimbitse kuri hilltop Hotel and Country Club bwakozwe na RDB n’inzego z’ibanze hagaragaramo ibibazo bijyanye n’umutekano, isuku, imibereho n’ibihungabanya umutekano hagendewe ku itegeko rigenga ubukerarugendo bwo mu Rwanda.

Kubera iyo mpamvu, hotel ihanishijwe gufunga by’agateganyo ukwezi kumwe kandi isabwa gukemura ibibazo byagaragajwe n’itsinda ryakoze ubugenzuzi mbere yo kongera gufungura imiryango”.

Ubuhamya bw’abacumbitse muri Hilltop Hotel

Umudamu n’umwana we bigeze kurara muri iyi hotel ubwo bari mu kato bavuye mu mahanga, ntibigeze basinzira kubera ibiheri.

Muhorakeye Joyce (izina tumwise) avuga ko yaharaye ibiheri bikamurya ndetse ko umwana atigeze asinzira ijoro ryose.

Undi waharaye agira inama abinjira mu gihugu kutarara muri Hilltop Hotel kubera serivisi mbi. Ati: “Nagira inama abantu kutagana Hilltop Hotel mu gihe itarisubiraho. Nayirayemo ndi kumwe n’itsinda rinini ariko bagenzi bacu 80% ntibanyuzwe n’iyi hoteli. Ibyumba ntibyari bisukuye, ibinyenzi byari byapfiriyemo…”

Undi mu bakiliya b’iyi hoteli wagombaga kuyiraramo inshuro ebyiri, avuga ko icyumba bakirayemo inshuro imwe ijoro rikurikiyeho bakimurirwa mu kindi cyumba kinini.

Asobanura ko icyatumye bayivamo ari ibinyenzi babonaga byapfiriye kuri sima, urumuri rutabona neza mu byumba, murandasi idakora neza, amadirishya asakuza mu gihe hari umuyaga mwinshi…

Louis Bendixen, Umunya Denmark ukinira ikipe ya Coop yo muri Norvège, akaba aherutse muri Tour du Rwanda 2022 abinyujije kuri Tweeter (Twita) yavuze ko mu gihe k’icyumweru cyose yabaye muri Hilltop Hotel and Country Club yahabonye imitangire mibi ya serivisi.

Ati: “Icyumweru cyose twamaze muri Hilltop Hotel ubwo twari muri Tour du Rwanda ntabwo byagenze neza. Nishimira kugaruka mu gihugu kiza nk’u Rwanda ariko sinasubira muri iriya Hoteli, mumbabarire”.

Guverinoma y’u Rwanda ishyira imbaraga nyinshi mu rwego rwa serivisi kuko ruri mu zihanzwe amaso mu kugira uruhare rukomeye mu mpinduka Igihugu cyiteze mu cyerekezo 2050.

By’umwihariko amahoteli ari mu nzego zigomba gutanga serivisi zizira amkemwa mu rwego rwo kwinjiza amadovize ariko zinagira uruhare mu gusigasira isura nziza y’Igihugu mu ruhando mpuzamahanga.

TANGA IGITECYEREZO

  • Manzi
    March 7, 2022 at 4:24 pm Musubize

    Iyi si hotel pe!!!! Naharaye kabiri muri 2021 ndi mu kato mvuye imahanga ariko ni akumiro pe. Uretse ibiheri n’ibinyenzi umwanya uhari ntushobora kuhashira cyereka hubatswe ibikorwa remezo bitari ibihari.
    Narwaye mu cyumba ngeze mu burira amashuka nsanga aryamwemo nka 4 adahindurwa umwanda unagaragarira ijisho.
    Bampa amafunguro yagaje.
    Abakozi baciriritse mu nyifatire, smartness n’abo ubonako inzara iba ibamereye nabi.
    Manager wahoo iyo ubimubwire atereriyo.
    Nifungwe kbsa

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA