Bishop Justin Alain uherutse gusengera Isi yashyize hanze indirimbo yise ‘Ugendane nanjye’
Imibereho

Bishop Justin Alain uherutse gusengera Isi yashyize hanze indirimbo yise ‘Ugendane nanjye’

Sedar Sagamba

February 20, 2022

Umunyarwanda Bishop Justin Alain utuye muri Australia n’umuryango we, yinjiye mu muziki mu mwaka wa 2022 aho yashyize hanze indirimbo yise ‘Akira Ishimwe’, none yamaze gushyira hanze indi ya kabiri yise ‘Ugendane nanjye’.

Iyi ndirimbo ikubiyemo isengesho yasenze ubwo yari amaze kubura umugore we mu 2016. Bishop Justin yamenyekanye mu mpera za 2021 ubwo yateguraga igiterane cyo gusengera Isi yose cyiswe ‘Pray For Our World’.

Iki giterane cy’amasengesho cyabereye ku migabane yose y’Isi kuva taliki 02 Kanama 2021 kugeza taliki 05 Nzeri 2021, kiba hifashishijwe ikoranabuhanga mu kwirinda icyorezo cya Covid-19. Bagikoreye kuri ‘Google meet’ n’imbuga nkoranyambaga za Rise and Shine World nka YouTube, Facebook, Instagram na Twitter.

Taliki 02-08 Kanama 2021 ni bwo basengeye Afurika, hatumirwa abakozi b’Imana barimo Pastor Desire Habyarimana wo mu Rwanda, Bishop Celestin Tshipata wo muri DR Congo, Bishop Amoti Rusengo Nathan wo mu Rwanda na Rev. Dr. Antoine Rutayisire wo mu Rwanda.

Hari hatumiwe kandi abaramyi bari mu bakunzwe cyane mu Rwanda Papi Clever na Dorcas ndetse na Gisele Precious.

Bishop Justin washyize hanze indirimbo ya kabiri yise ‘Ugendane nanjye’ yagiye hanze iri kumwe n’amashusho yayo, yabwiye Imvaho Nshya ko ibihe yanyuzemo byo kubura umugore we witabye Imana taliki 12 Gashyantare 2016 akamusigira abana batatu bakiri bato cyane, ari byo byatumye akora iyi ndirimbo mu gutangariza abantu ko bakwiye kwisunga Imana kuko yiteguye kugendana na bo.

Yagize ati: “Ibi byatumye nandikamo indirimbo ikubiyemo amagambo mpora nsengeramo. Akaba ariyo ndirimbo nshyize hanze muri uku kwezi kwa kabiri kuko ni ko kwezi Madame yitabiyeho Imana nkatangira inzira nakwita ko igoye yo kwita ku nshingano za njyenyine”.

Uko Bishop Alain yinjiye mu muziki

Asobanura ko kwinjira mu muziki kwe atari ibintu byapfuye kwizana.

Ati: “Mu by’ukuri kwinjira mu muziki ntabwo byapfuye kwizana kuko ubusanzwe nkunda kuririmba, kuva nkiri umwana naririmbaga muri za korali kugeza nkuze.

Nyuma aho mpinduriwe inshingano zo kuba umushumba biba ngombwa ko mba mbiretse gato gusa nkafasha abaririmbyi kugera ku nzozi zabo mu gukorera Imana”.

Akomeza avuga ati: “Nyuma rero byabaye ngombwa ko nsenga Imana kugira ngo impe imbaraga zo kuvuga ubutumwa bwiza bwa Yesu Kristo binyuze mu buryo bwose bushoboka numva Imana irabinyemereye.

Nkaba nari maranye igihe indirimbo zitandukanye zifite aho zihurira n’amateka, niko gutangira gushyira hanze ibyo bihangano kugira ngo birusheho gufasha benshi.

Gusa sinasobanura ngo byagenze gute ngo ninjire mu muziki ahubwo ni Imana ishimye ko biba muri iki gihe”.

Bishop Justin Alain yavuze ko intego ye mu muziki wo kuramya no guhimbaza Imana ari ukuvuga ubutumwa bwiza bwa Yesu Kristo.

Ati: “Nk’uko nkunze kubivuga, kutavuga inkuru nziza ya Yesu ni nko gutunga umuti uvura icyorezo runaka warangiza ukawimana ntuwutange, ukawuhisha munsi ya matera uryamaho.

Nta kindi ngamije usibye kunyuza ubutumwa Imana inshyize ku mutima nkabunyuza no mu ndirimbo bityo abakunda indirimbo bakumviramo ubwo butumwa bwiza, nk’uko no mu bundi buryo butari indirimbo, tubuvuga”.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA