Umuvugizi w’Ingabo z’u Rwanda (RDF) akaba n’Umuyobozi w’Ishami Rishinzwe Ubutwererane Mpuzamahanga mu bya Gisirikare, Brig Gen Patrick Karuretwa, yagiranye ibiganiro n’abitabiriye Gahunda y’Igihugu yo Kwakira no Kumenyereza Abakozi Bashya (National Induction Programme, mu butumwa yabahaye yabasabye guharanira gutanga serivisi bashyira umuturage ku isonga.

Iyo Gahunda y’Igihugu yiswe National Induction Programe [NIP), irimo kubera mu Kigo cy’Ingabo z’u Rwanda gishinzwe Amahugurwa y’Imyitozo ya Gisirikare cya Gabiro, mu Karere ka Gatsibo, Intara y’Iburasirazuba.

Minisiteri y’Ingabo mu Rwanda yatangaje ko iyi gahunda igamije kunoza imikoranire, ubufatanye, kubazwa inshingano no guteza imbere ubuyobozi bushingiye ku ndangagaciro n’imyitwarire myiza y’abakozi, hagamijwe kunoza itangwa rya serivisi zinoze, zishingiye ku byo abaturage bakeneye, no kwihutisha ishyirwa mu bikorwa ry’ibyihutirwa mu iterambere ry’Igihugu.

Ibiganiro bya Brig Gen Karuretwa byari bifite insanganyamatsiko igira iti: “Kuva ku cyerekezo cy’Igihugu kugera ku nshingano ziteza imbere imibereho y’abaturage.” Iyi nsanganyamatsiko ishimangira inshingano z’abakozi ba Leta zo guhindura icyerekezo cy’Igihugu ibikorwa bifatika, binyuze muri politiki, gahunda n’ibyemezo bigamije guteza imbere imibereho myiza y’abaturage, gukomeza inzego za Leta no gushyigikira iterambere rirambye n‘ibindi.

NIP bisobanura [National Induction Programe] ni Gahunda y’Igihugu yo Kwakira no Kumenyereza Abakozi ba Leta ubusanzwe imara ukwezi kumwe, ikaba ihuza amatsinda ane, buri tsinda rikaba rigizwe n’abagera kuri 200 baturutse mu nzego zitandukanye za Leta.

Abayitabiriye bahabwa amasomo ndetse n’ibiganiro bitandukanye byuzuzanya, bikubiyemo ingingo z’ingenzi zirimo Icyerekezo cy’Igihugu 2050 na Gahunda ya Kabiri y’Igihugu yo Kwihutisha Iterambere (NST2).

Mu butumwa yahaye abo bakozi, by’umwihariko abari mu  itsinda rya mbere, Brig Gen Karuretwa yabibukije ko abakozi ba Leta bafite uruhare rukomeye mu iterambere ry’igihugu. Ati   “Iterambere u Rwanda ruzagera ho rizashingira k’ubwitange bwabo mu gukorera  ari bo abaturage, ubushobozi bwo guhuza imikorere n’ibikenewe n’abaturage bigenda bihinduka, ndetse no gufata ibyemezo bishingiye ku makuru n’isesengura bigamije inyungu rusange banyarwanda bifuza.”

Ku ngingo irebana n‘icyerekezo cyi‘Iihugu abantu bahisemo, avuga ko inzego za Leta zibigiramo uruhare rukomeye.  Akomeza  agira ati: “Inzego za Leta ni zo zituma icyerekezo gihinduka impamo, zidahari, Icyerekezo 2050 cyaba amagambo meza gusa Icyerekezo 2050 ntikirebana n’ubukungu gusa. Intego yacyo ya kabiri ni ukugera ku mibereho myiza yo ku rwego rwo hejuru kuri buri Munyarwanda, imibereho yigihe kirekire kandi ifite ubuzima bwiza, kubona akazi gakwiriye, gutura mu nzu igezweho, kugira umutekano no kubona serivisi zishyikirizwa umuturage aho kugira ngo umuturage abe ari we usiragizwa’’.

Yifashishije urugero rw’Ingabo z’u Rwanda (RDF),  Brig. Gen Karuretwa  yibukije abakozi ba Leta, Gahunda y’Igihugu y’Imyaka 5 yo Kwihutisha Iterambere (NST2) ishyira amahoro n’umutekano mu nkingi z’imiyoborere ihindura imibereho y’abaturage, mu gihe kubungabunga amahoro n’umutekano bikomeje kuba inshingano z’ibanze z’Ingabo z’u Rwanda. Yongeyeho ko RDF isobanukiwe n’inshingano rusange ifite zo gukorera Abanyarwanda no kugira uruhare mu iterambere ry’Igihugu.

Yasobanuye kandi ko, binyuze muri Gahunda ngarukamwaka y’Ingabo n’Inzego z’Umutekano yo kwegera abaturage, abasirikare, inzobere mu buvuzi n’abashinzwe ubwubatsi bakorana n’abobozi bo mu nzego z’ibanze mu bikorwa bigamije kuzamura imibereho y’abaturage. Ibyo bikorwa ni bumwe mu buryo bwo kugira uruhare mu iterambere ry’Igihugu no gushakira abaturage ibisubizo bifatika badategreje ko bizaturuka ahandi.

Kwisuzuma ni uguhozaho

Brig. Gen. Karuretwa yasabye abitabiriye iyi gahunda kujya bahora bisuzuma, bakareba uburyo inshingano bashinzwe buri munsi zihuzwa n’icyerekezo n’intego by’iterambere ry’Igihugu, kandi bakita ku gutanga umusaruro ugaragara mu mibereho y’abaturage.

Ashimangira ko umukozi wa Leta adakwiye gupimirwa ku nshingano akora gusa, ahubwo ko akwiye no gupimirwa ku musaruro ibikorwa bye bitanga no ku mpinduka nziza bigira ku mibereho y’Abanyarwanda muri rusange.

Ba uwa mbere mu kumenya amakuru agezweho!!!