Bugesera: Arasingira ubukire ahereye  ku 7,500 Frw yahabwaga na Leta
Amakuru

Bugesera: Arasingira ubukire ahereye  ku 7,500 Frw yahabwaga na Leta

Imvaho Nshya

August 23, 2023

Vumiliya Gratia ni umubyeyi w’abana batatu n’umugabo. Umuryango we utuye mu Mudugudu wa Tetero, Akagari ka Kagenge mu Murenge wa Mayange, Akarere ka Bugesera mu Ntara y’Iburasirazuba. 

Iyo abara inkuru y’uko umuryango we ubayeho ntatinya kuvuga ko yashatse akiri muto ndetse n’uwo bashakanye na we yari muto kandi bose ari imfubyi, ubu ngo ntibakiri imfubyi.

Vumiliya ahamya ko mbere ubuzima bwari bugoye kuko yari umwe mu bishyurirwaga mituweli, ubu bafite ubushobozi bwo kwiyishyurira ubwisungane mu kwivuza.

Ababyeyi batwite ndetse n’abafite abana batoya bari mu cyiciro cya Mbere n’icya Kabiri cy’ubudehe, Leta ibagenera amafaranga 22,500 ku gihembwe bivuze ko bahabwa amafaranga 7,500 ku kwezi.

Ni muri gahunda zo kurwanya igwingira kuva umwana bakimutwite. Ahereye kuri aya mafaranga yashoboye kwiteza imbere, ubu akaba yiyishyurira mituweli.

Yagize ati “Mbere bakitwishyurira ari bwo bahitaga baduha ariya mafaranga yo kwiteza imbere y’abana muri gahunda ya Shisha Kibondo.

Njyewe naratekereje nshaka umushinga nakora kugira ngo wunganire urugo, ayo mafaranga barayampaye ngura ikibwana k’ingurube amafaranga ibihumbi 25.

Kugeza izi saha mfite ingurube 4, zirakura zagera mu mezi nka 4 nkazigurisha nkongera nkagura izindi. Uko byagenda kose hari aho navuye hari n’aho ngeze”.

Yishimira ko abana be batigeze barwara indwara ziterwa n’imirire mibi.

Ubufasha yahawe yabubyaje umusaruro kuko nta nkoko yari afite ariko ngo ubu aroroye.

Ati “Ufashe amafaranga ibihumbi 10 ukagura inkoko ejo cyangwa ejobundi ntabwo iza ari inkoko imwe, iza ari inkoko ebyiri cyangwa eshatu.

Niba ushatse kugurira umwana imyenda ntabwo uzagurisha ya nkoko imwe, uzagurisha ebyiri usigarane indi”.

Vumiliya avuga ko nta mafaranga make abaho kandi ko nta bufasha bukeya bubaho ahubwo ngo biterwa n’umutwe w’umuntu, kumva ko amafaranga ayo ari yo yose yamugirira akamaro.

Icyerekezo cy’umuryango wabo mu myaka 5 iri imbere, Vumilia avuga ko atazaba akicaye mu nzu uko imeze ubu ahubwo ko azaba yarayigize neza.

Mu ngurube yoroye, Vumiliya avuga ko nagira akabazo azagurisha ingurube imwe, hagasigare 3. Ati “Sinjya ngurisha ingurube, batampaye ibihumbi 100”.

Akomeza agira ati “Mu by’ukuri mu myaka nk’itanu iri imbere aho ndi ubungubu ntabwo ariho nzaba ndi kuko kuba twarashoboye kuva mu cyiciro cya mbere tukaba tubasha kwiyishyurira mituweli, ni intera ndende kandi ikomeye”.

Ibyo umuryango wabo umaze kugeraho, babikesha ubufatanye no kumvikana kandi bagashyira amaboko hasi.

Yanditswe KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA