Bugesera: Bishimiye ko bahawe amazi meza basabwa kubungabunga ibikorwa remezo
Amakuru

Bugesera: Bishimiye ko bahawe amazi meza basabwa kubungabunga ibikorwa remezo

ZIGAMA THEONESTE

March 28, 2024

Abaturage bo mu Mirenge ya Mwogo n’uwa Juru itagiraga amazi meza barishimira ko bayahawe, bakaba bayitezeho kuruhuka ingendo ndende bakoraga bagiye kuvoma mu yindi Mirenge.

Ayo mazi bayabonye biturutse ku muyoboro wa Kilometero 49 wubatswe ku bufatanye bw’Umushinga WaterAid Rwanda watanze Amadolari y’Amerika ibihumbi 500 ufatanyije n’Akarere ka Bugesera katanze amadolari y’Amerika ibihumbi 300, yose hamwe akaba arenga miliyari 1 y’amafaranga y’u Rwanda.

Uretse kuruhuka ingendo ndende bakoraga banavuze ko azabafasha kunoza isuku.

Umwe yagize ati: “Twishimiye ko baduhaye aya mazi urebye twari tugiye kwicwa n’umwanda, twavomaga kure pe!”

Undi yagize ati: “Turashimira Leta yacu itekereza umuturage, rwose natwe tugiye gutandukana n’inzoka zaturukaga ku mazi mabi twakoreshaga.

Wasangaga abana bacu batiga neza kubera ko babyukaga bajya gushaka amazi hirya no hino, ariko ubu birakemutse”.

Minisitiri w’Ibikorwa Remezo, Dr Gasore Jimmy mu gutangiza uwo muyoboro w’amazi yasabye abaturage bawuhawe kubungabunga ibyo bikorwa remezo.

Ati: “Mu by’ukuri ni ikintu cyadushimishije kuko hari Utugari tune tutari dufite amazi na mba nka Kabukuba, Juru, Kabusovu n’akandi kamwe, uyu munsi tukaba twayabonye.Tukaba rero nka Leta twishimira intambwe yatewe bikadufasha kwigisha abaturage kwimakaza isuku, kwirinda indwara zikomoka ku mirire mibi n’ibindi.”

Minisitiri w’Ibikorwa Remezo Dr Jimmy Gasore

Yongeye ko abaturage ba Bugesera n’Abanyarwanda bose bagomba kwirinda kwangiza ibikorwa remezo ndetse no mu gihe babonye ubyangiza bakabimenyesha inzego zibishinzwe

Umuyobozi w’Akarere ka Bugesera, Mutabazi Richard yavuze ko bishimiye ko abaturage b’aka Karere bahawe amazi bigasubiza ibyifuzo byabo.

Ati: “Ni ugusubiza ibyifuzo by’abaturage, turabizi icyo kugira amazi meza bimarira abaturage, kuba bayavoma hafi nibura umwanya bari gukoresha bayavoma kure bakawukoresha mu bibateza imbere, abana bagashyira imbaraga mu kujya ku ishuri, bakaruhuka kujya gushaka amazi kure, bakanywa amazi meza. Ni ikintu kidushimishije kuko bahoraga babivuga ko bayakeneye”.

Umuyobozi Mukuru wa WaterAid Rwanda, Mukeshimana Vestine yavuze ko gutanga amazi meza kuri abo baturage ba Bugesera biri muri gahunda yo kuyageza ku Banyarwanda bose.

Yagize ati : “Natwe turishimye ko twabashije kubagezaho amazi turabizi ko bari bayakeneye. Icyo tubafitiye rero ni uko ibikorwa bikomeza, turakorana n’inzego n’abandi bafatanyabikora kugeza igihe buri muturage wa Bugesera abonye amazi meza, ndetse birenge na Bugesera buri Munyarwanda azayabone”.

Uwo muyoboro watashywe i Bugesera, urimo amavomo 37 ageza ku baturage amazi meza, harimo amavomo 25 yo mu Murenge wa Mwogo na 12 yo mu gice cy’Umurenge wa Juru.

Kugeza ubu nyuma yo kongeramo uyu muyoboro, Ubuyobozi bw’Akarere ka Bugesera butangaza byatumye gukwirakwiza amazi ku baturage bigera ku gipimo cya 75%, bukavuga ko intego ari uko amazi azagera ku baturage bose 100% muri 2024.

Umuyobozi w’Akarere ka Bugesera Mutabazi, yavuze ko intego ari uko buri muturage atazajya arenza ikilometero kimwe ajya gushaka amazi, mu gihe azaba yamaze kubageraho bose.

Yavuze kandi ko hagati aho hari undi mushinga uteganyijwe kubakwa n’Ikigo cy’Igihugu gishinzwe gukwirakwiza amazi (WASAC) hamwe na WaterAid Rwanda muri aka Karere ka Bugesera, uzayakwirakwiza mu gice cy’Umurenge wa Juru atarageramo no mu Murenge wa Rweru na wo ufite icyo kibazo.

Umuyoboro watashywe kuri uyu wa Gatatu tariki ya 27 Werurwe 2024, watangiye gukwirakwiza amazi mu ngo z’abaturage bangana n’ibihumbi 46 bo mu Mirenge ya Mwogo n’igice cy’Umurenge wa Juru.

TANGA IGITECYEREZO

  • MTN NUBURYOHE
    March 28, 2024 at 12:03 pm Musubize

    Mumurenge Wa Juru Ahasigaye Guhabwa Amazi Ni Mukagari Ka
    Juru Kuko Kurijuru Baryakuvoma Bagakoresha Amasaha Atatu Nigice Urikumva Ko Aribintubibagora.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA