Burera: Abakijijwe umwanda uva muri ES Gahunga TSS barashima
Amakuru

Burera: Abakijijwe umwanda uva muri ES Gahunga TSS barashima

NGABOYABAHIZI PROTAIS

April 3, 2024

Abaturanye n’Ishuri Ryisumbuye rya Gahunga TSS (ES Gahunga TSS) bari babangamiwe n’umwanda uva mu bwogero bw’ishuri ukabateza umunuko n’imibu, bishimira ko ikibazo cyakemutse nyuma y’aho iri shuri ryubatse icyobo gifata amazi.

Ubwo Imvaho Nshya yongeraga kujya kureba aho ikibazo kigeze gikemurwa yasanze harubatswe icyobo gifata amazi kandi gitwikije amabati, abaturage bavuga ko bishimiye uburyo bakorewe ubuvugizi.

Twambazimana Emerita, umwe mu bari batanze amakuru bwa mbere, yagize ati : “Ubu tumeze neza cyane kuko ubuvugizi twakorewe n’itangazamakuru bwagize umumaro. Babatse hano icyobo gifata amazi baragitwikira nta munuko ukitugeraho kuko bafashe amatiyo akuramo amazi mu bwogero ku buryo asohorera muri icyo cyo.”

Uyu mubyeyi yongeraho ko banyuzwe n’uburyo ubuyobozi bwihutiye gukurikirana iki kibazo kigahita gikemuka.

Yagize ati : « Twagiye kubona tubona ubuyobozi bw’ikigo na Visi Meya ushinzwe imibereho myiza y’abaturage   mu Karere kacu ka Burera barimo gutembera hano, bavuga ku kibazo cy’umwanda utubangamiye barataha. Mu gitondo bahise ko batangira gutunda amabuye no gucukura bahita bubaka iki cyobo gifata uyu mwanda.”

By’umwihariko yashimiye Imvaho Nshya yabakoreye ubuvugizi ubu bakaba batakibangamiwe n’iumunuko wavaga muri iyo myanda yari imusozi.

Sikubwabo Aimable yishimiye icyemezo cyafashwe n’ubuyobozi bw’ishuri rya ES Gahunga TSS, cyo kuba barahise bumva akababaro k’abaturanyi nyuma y’uko itangazamakuru ribitangaza.

Yavuze ko bari bamaze igihe bagaragaza icyo kibazo ariko ubuyobozi bugasa nk’ubutabitayeho kugeza igihe byagereye mu itangazamakuru.

Ati: “Ubu ibintu ni byiza twotera akazuba hanze, dushobora guteka no kurira hanze. Umwenda twarawanikaga ukawushyira mu nzu wabaye umunuko kubera umwuka mubi wazaga ukirindamo, ubu amadirishya urabona noneho ko dusigaye tuyafungura ubu umwuka ni mwiza cyane natwe twiyemeje gukomeza imibanire myiza n’iki kigo.”

Umuyobozi wa ES Gahunga TSS Bukuba Cyriaque, ashimangira ko kiriya kibazo gisa n’icyari gitunguranye ku buryo batari bazi ko amazi ava mu bwogero yateza umwanda kuri ruriya rwego, ariko bakimara kumenya imiterere yacyo bahisemo guhita  bafata amazi ava mu bwogero bacukura icyobo kiyafata.

Yagize ati : “Buriya bariya baturage ni uko abantu batabizi ni bo baturanyi bacu ba hafi ; ibyabaye ntabwo byari bigambiriwe ariko nyuma yo gukeburwa twahisemo gukomeza imibanire myiza n’abaturanyi bari babangamiwe maze ducukura icyobo gifata iyo myanda yose yo mu bwogero, kandi turanagitwikira mu buryo bwo gukumira amasazi n’umwuka mubi wabatezaga ibibazo.”

Yakomeje yizeza abaturage ko batazatezuka ku kubananira neza, anabasaba kujya babamenyesha ibyo babona bitagenda neza kugira ngo bikosorwe na mbere y’uko hitabazwa itangazamakuru.

Ishuri Ryisumbuye rya Gahunga (ES Gahunga TSS)  ryigisha ibijyanye n’amashanyarazi, ubuhinzi n’ubukanishi rikaba rifite abanyeshuri basaga 700.

Ni ishuri rikora ku bw’amasezerano Itorero ADEPR ryagiranye na Leta cyane ko mbere ryari ishuri ryigenga ry’iryo torero.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA