Burera: Abakoresha isoko rya Rusumo bamaze imyaka isaga 10 bizezwa ko rizimurwa
Amakuru

Burera: Abakoresha isoko rya Rusumo bamaze imyaka isaga 10 bizezwa ko rizimurwa

NGABOYABAHIZI PROTAIS

April 2, 2024

Abagana n’abakorera mu isoko rya Rusumo riherereye mu Murenge wa Butaro mu Karere ka Burera, bavuga ko bamaze imyaka 12   bizezwa ko rizubakwa bakaba babangamiwe no kuba rishaje, imvura yagwa ikabanyagira n’ibicuruzwa byabo. Basaba ko bakubakirwa isoko rya kijyambere kuko imvura ibateza umutekano muke.

Umwe mu bacuruzi bo muri iri soko Mukamusoni Betatrice avuga ko iyo imvura iguye ibabuza amahoro kuva hasi kugera hejuru.

Yagize ati: “Iri soko mu bihe by’imvura ritubuza uburyo mu mashyi no mu mudiho, niba ari uko  ryubatse mu gishanga niba ari uko amabati nayo ubwayo ashaje ubu twarumiwe, imvura iragwa ikamanukira mu bicuruzwa byacu, yamara gusendera muri kino gishanga ryubatsemo, amazi agasendera hano hose bikatuyobera, turasaba ko iri soko baryubaka mu buryo bwa kijyambere kandi hashize imyaka isaga 10 dutakambira ubuyobozi”.

Sezikeye Bertrand we asanga iri soko rikwiye kwimurwa cyangwa se ngo haba hashakwa ubundi buryo ryakubakirwa imiferege.

Yagize ati: “Iri soko mu bihe by’imvura biba bikomeye cyane, twese hano tuba twitwikiriye imitaka abandi bakajya mu mahema  nawe urabona  amabati ashaje iri soko rimaze imyaka 27 ryubatse gutya, ridutera igihombo cyane kuko nk’iyo umwambaro uguye hasi ubwo urumva uba wanduye ubwo uhita uta agaciro abacuruza imyaka bo baragowe, aya mazi  iyo yuzuye umuferege avuye mu muhanda na  yo araza agasesekara hano muri ibi bicuruzwa byacu.”

Sezikeye akomeza avuga ko imyaka ibaye 12 bataka igihombo baterwa n’iri soko, kandi iki kibazo buri Muyobozi uje kuyobora Umurenge wabo abizeza ko iri soko rizimurwa cyangwa se rikavugururwa.

Isoko rirashaje rirava, ibicuruzwa bikangirika bisaba ko ryubakwa bushya

Yagize ati: “Kuva mu myaka ya za 2010, ni bwo twatangiye gutaka ibihombo duterwa n’iri soko, Meya uje iki kibazo avuga ko kibazo azagikemura akatwubakira isoko rya kijyambere, ndetse ngo byaba ngombwa rikazimurwa babuze kuridusanira, babura kuryimura mbese amaso yaheze mu kirere imyaka irahise isaga 12, kandi ikibazo ni uko dutanga imisoro buri gihe, aya mafaranga ajyahe koko.”

Kuba iki kibazo cy’iri soko kibangamiye abacuruzi n’abarigana gishimangirwa n’Umunyamabanga Nshingwabikorwa w’Umurenge wa Butaro Kayitsinga Faustin, avuga ko iki kibazo kizwi ariko ngo barimo barashaka uburyo iri soko ryakwimurwa.

Yagize ati: “Isoko rya Rusumo ikibazo cyaryo kirazwi ku buryo mu minsi iri imbere turateganya kuryimura kuko riri no mu gishanga, ubu rero harimo harashakwa ingengo y’imari ngo ribe ryakwimurwa kuko rirabangamye cyane mu bihe by’imvura, nkaba mbamenyesha ko mu minsi iri imbere bazubakirwa irindi soko.”

 yavuze ko barimo gukusanya ubushobozi kugira ngo iri soko rizimurirwe ahandi, cyane ryubatse mu gishanga.

Yagize ati: “Ririya soko rya Rusumo turarizi ndetse ryubatswe mu gishanga, turimo kwegeranya ubushobozi ndetse n’ingengo y’imari irimo gukorwa kugira ngo tuzarebe ahandi tujye gushaka ikibanza ariho ryubakwa, turabasaba kwihangana bizakorwa.”

Iri soko rya Rusumo rirema inshuro 2 mu cyumweru rigahuriramo abaturage basaga 1700 ku munsi, ariko bakaba bavuga ko mu bihe by’imvura nta mutekano w’ibicuruzwa byabo baba bafite.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA