Burera: Iyangirika ry’umuhanda Gahunga-Cyanika riteye inkeke
Amakuru

Burera: Iyangirika ry’umuhanda Gahunga-Cyanika riteye inkeke

Imvaho Nshya

October 23, 2023

Abakoresha umuhanda Gahunga- Cyanika bavuga ko kuba ugenda usenyuka bibatera impungenge ku mutekano w’abagenzi n’uw’abatwaye ibinyabiziga, bakaba basaba ubuyobozi ko bwakoresha uburyo bwose ugasanwa cyangwa se ukavugururwa kuko bigaragara ko ugenda usaza.

Uyu muhanda Gahunga-Cyanika ni igice cy’umuhanda uva mu Mujyi wa Musanze werekeza i Cyanika ku mupaka uhuza u Rwanda na Uganda; iyo ugezemo usanga warangiritse haba mu mpande ndetse no hagati nyirizina kuko ugenda ubisikana n’ibinogo.

Abawukoresha bavuga ko ibyo binogo n’uburyo wangiritse cyane bibatera impungenge.

Hakuzimana Mariko wo mu Murenge wa Rugarama yagize ati: “Uyu muhanda kubera kwangirika uratubangamiye cyane, hari aho ugera ugenza amaguru ukahahurira n’igare rikurikiranye n’imodoka kandi hakaba harangiritsemo hagati, mu gihe imodoka ihunga ibinogo bakagusatira n’iryo gare ukabura amahwemo, bamwe bajya banavunika, Leta nidufashe idusanire uyu muhanda.”

Ngomiganje we asanga kuba uyu muhanda ugenda uterwa ibiremo ari igihombo Leta ihura na cyo, kuko wongera kwangirika hadaciye kabiri.

Yagize ati: “Ubushize bumvise ko Perezida Kagame agiye kuza i Nkumba barara bateramo ibiraka ahandi bakagaragaza ko barimo gusana umuhanda ariko byarangiye bagarukiye hano mu Gahunga, gusa werekeje za Cyanika ubona ko ari ibinogo gusa mu muhanda, kandi uyu muhanda umaze igihe dusaba ko usanwa abayobozi bakatwizeza ko biri mu ngengo y’imari none amaso yaheze mu kirere.”

Yongeyeho ko hari Umunyonzi uherutse gupfa ntawumugonze ahubwo arimo ahunga imodoka n’ibyobo byo muri uwo muhanda, bityo ko kuwutera ibiremo ari ugupfusha ubusa amafaranga mu gihe yakabaye arundarundwa bakawukora bundi bushya ndetse bakanawagura.

Ibinogo bigaragara muri uwo muhanda bivugwaho guteza impanuka

Abashoferi bakoresha uyu muhanda na bo ngo babibonamo imbogamizi nk’uko Bahati Issa abivuga.

Ati: “Uyu muhanda ugenda wangirika kubera ko kaburimbo imaze igihe; aho usanga ibinogo mu muhanda rwa gati mu mpande ukaba waragiye utenguka ni ikibazo ku bagenzi natwe dutwara ibinyabiziga twifuza ko uyu muhanda kubera ko uri ku rwego mpuzamahanga wakubakwa bundi bushya ukagurwa ndetse bakanadushyiriraho amatara nk’uko indi mihanda mpuzamahanga ifite amatara. Uyu muhanda uramutse usanwe ku mutekano wacu twajya tugenda nta mpungenge”.

Umuyobozi w’agateganyo w’Akarere ka Burera Nshimiyimana Jean Baptiste, avuga ko uyu muhanda hari gukorwa ibiganiro n’inzego bireba zirimo n’Ikigo cy’Igihugu Gishinzwe Iterambere rya Taransiporo (RTDA) kugira ngo ube wakubakwa.

Yagize ati: “Uriya muhanda uri ku rwego rw’igihugu twakoze ubuvugizi na RTDA yaradusuye isanga koko uriya muhanda ukwiye kubakwa ndetse ukagurwa ariko mbere y’uko wagurwa turimo turakora ubuvugizi ngo na biriya binogo byagiye bigaragara mu muhanda wa kaburimbo bibe byakurwamo kandi turabona RTDA igenda ibikora neza. Ariko n’ubundi uyu muhanda uturuka i Musanze werekeza i Cyanika biri mu mihigo y’uko uzagurwa, turifuza ko waba ubanje gusanwa turakomeza gukora ubuvugizi.”

Hari n’aho igice cya Gahunga-Cyanika cyangiritse cyane harimo n’ikibazo cy’ibiraro n’imiferege usanga byose byarazibye, abaturage bakaba basaba ubuyobozi kuba bwakemura iki kibazo, kuko ngo amazi asigaye asendera mu muhanda akabasanga mu ngo zabo.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA