Byinshi kuri XOcare umuryango wita ku babyeyi barera abana bonyine
Imibereho

Byinshi kuri XOcare umuryango wita ku babyeyi barera abana bonyine

Imvaho Nshya

October 20, 2023

XOcare ni umuryango udaharanira inyungu wita ku babyeyi bafite inshingano zo kurera abana bonyine. Ni abashakanye nyuma bagatandukana, umwe muri bo agasigarana inshingano zo kurera abana wenyine.

Barahira Annick, Umuyobozi Mukuru wa XOcare ari na we washinze uyu muryango, asobanura ko uyu muryango wita ku babyeyi bafite inshingano zo kurera abana ari bonyine mu gihe byagaye inshingano z’ababyeyi bombi.

Mu kiganiro cyihariye yahaye Imvaho Nshya, Barahira yavuze ati “uyu muryango wita ku babyeyi batandukanye n’abo bashakanye, yaba umubyeyi w’ umugabo cyangwa umubyeyi w’umugore ndetse n’abana babo”.

Avuga ko uko gutandukana bigira ingaruka k’umuryango muri rusange ndetse abana bikaba byabatera ibibazo by’ihungabana. Asobanura ko ari ihungabana abana batewe no kuva mu buzima bari basanzwemo bakisanga mu bundi buzima.

Barahira agaragaza ko gutandukana kw’abashakanye bikura umuntu mu muryango mugari yari asanzwemo.

Agira ati “Gutandukana (Divorce) bifatwa nkaho ari ishyano ryaguye bitewe n’umuco nyarwanda.

Twifuje kubegera kugira ngo umuntu abahumurize abumvishe ko batari bonyine, tubahumurize, tubereke ko ubuzima bukomeza nyuma y’ibyabaye”.

Imiryango OXcare yitaho yashyizwe mu byiciro bibiri bitandukanye.

Icyiciro cya mbere kigizwe n’ababyeyi bafite imirimo itandukanye ibabeshejeho.

Aba babyeyi bakenera guhumurizwa no kwibutswa ko batari bonyine.

Bahurira muri gahunda ya ‘Mvura nkuvure’ bakaganira n’inzobere mu bijyanye n’ihungabana (Psychologist).

Ikindi cyiciro kigizwe n’ababyeyi bakeneye ubufasha bw’ibanze mu buryo butandukanye burimo ubwishingizi bwo kwivuza (Mutuelle de Santé), kwishyurira abana babo amafaranga y’ishuri.

Ubuyobozi bwa XOcare buvuga ko hiyongeraho kubaganiriza, kubahumuriza ndetse na gahunda ya ‘Mvura nkuvure’.

Ibyo byose XOcare ibikora iharanira ko buri wese yumva ko afite agaciro n’ijambo mu muryango nyarwanda.

Umuyobozi wa XOcare, Barahira, ashimangira ko ntawe ujya kubaka urugo ateganya gusenya.

Yongeraho ko mu gihe bidakunze gukomezanya urugendo rw’ubuzima, mu rwego rwo kwirinda izindi ngaruka zishobora kubaho byaruta ko habaho gutandukana.

Intego ya XOcare ni ukugira umwana ushoboye kandi ushobotse.

Kugeza ubu XOcare yishyuriye abanyeshuri 4 barangije icyiciro rusange cy’amashuri yisumbuye mu kigo cya Fred Nkunda TVET n’abandi 17 mu mashuri abanza ndetse no mu mashuri y’uburezi bw’ibanze.

Uwatsinze neza kurusha abandi yishyurirwa amafaranga y’ishuri ku kigo cyiza mu rwego rwo gutera abandi imbaraga zo kwiga bashyizeho umwete.

Umuryango XOcare ukorana n’inzego z’ibanze mu Karere ka Kicukiro binyujijwe mu bajyanama b’ubuzima, kuko aribo bamenya abaturage bakeneye ubufasha kurusha abandi.

Barahira akomeza avuga ko umuryango abereye umuyobozi ufite icyerekezo.

Ati “Icyerekezo cya XOcare ni umuryango utekanye, ufite icyizere n’intego birambye.

Iyo wamaze kumenya ko utari wenyine, ubuzima burakomeza bikaguha kugira icyizere cy’ejo hazaza”.

Akangurira ababyeyi kwita ku burere bw’abana mu rwego rwo kubarinda kujya mu bidafite umumaro bikabangiriza ejo hazaza.

KAYITARE JEAN PAUL

TANGA IGITECYEREZO

  • Yves eddy
    October 20, 2023 at 12:16 pm Musubize

    Ni byiza cyane rwose uyu mubyeyi Imana mine umugisha

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA