Patrick Byukusenge wa Team Rwanda yegukanye isiganwa ku magare ryihariye ryiswe ‘Amahoro Criterium’ ryari rigamije kureba urwego rw’abakinnyi bazahagararira u Rwanda muri Tour du Rwanda 2026, ibura ibyumweru bibiri gusa ngo itangire.

Iri siganwa ryakinwe ku nshuro ya kabiri ryabereye i Remera kuri iki Cyumweru, tariki ya 8 Gashyantare 2026.

Hagati y’itariki ya 22 Gashyantare n’iya 21 Werurwe 2026 ni bwo mu Turere dutandukanye two mu Rwanda hateganyijwe isiganwa mpuzamahanga ry’amagare rikaba rigiye gukinwa ku nshuro ya 18.

Mu rwego rwo kwitegura neza iri siganwa amakipe ane azahagararira u Rwanda
ari yo Team Rwanda, Benediction Club, Team Amani na May Stars bahuriye mu Isiganwa ryiswe” Amahoro Criterium’ ryari rigamije kureba urwego abakinnyi bagezeho.

Abakinnyi 54 bitabiriye, bahagurukiye ku marembo ya Stade Amahoro, banyura kuri Contrôle Technique, kwa Rwahama na Airtel mbere yo gusubira ku marembo ya Stade Amahoro ahazwi nko mu Migina.

Iyi ntera yo kuzenguruka yareshyaga na kilometero 3,9 bayinyuzemo inshuro 12.

Byukusenge Patrick wa Team Rwanda ni we wahize abandi akoresheje isaha imwe, umunota umwe n’amasegonda 15 arusha amasegonda ane mugenzi we wa Team Rwanda Tuyizere Etienne na Ngendahayo Jeremie wa May Stars Cycling Team basoreje ku mwanya wa kabiri n’uwa gatatu.

Byukusenge yavuze ko yishimiye gutsinda iri siganwa, ndetse ryaberetse ko imyiteguro bari gukora bitegura Tour du Rwanda iri kugenda neza.

Ati: “Ni isiganwa ryagenze neza, kubera ko tumaze iminsi twitegura, tumaze igihe kirenga ukwezi mu mwiherero. Kuba nsinze iri siganwa ntabwo ari ibintu bintunguye kuko twariteguye bihagije.”

Yongeyeho ati: “Icyizere naha Abanyarwanda ni ukwitwara neza kurusha umwaka ushize. Abagiye muri Tour of Sharjah mwabonye ko bitwaye neza, urumva ko tumeze neza.”

Biteganyijwe ko agace kabanza ka Tour du Rwanda ya 2026, kazahagurukira mu i Rukomo mu Karere ka Gicumbi berekeza i Rwamagana ku ntera ya kilometero 174.

Ba uwa mbere mu kumenya amakuru agezweho!!!