Urukiko Nkemurampaka rwa Siporo ku Isi (CAS) rwatangaje ko ruzaburanisha urubunza rw’ubujurire bw’Ishyirahamwe ry’Umupira w’Amaguru muri Sénégal (FSF) ku mwanzuro w’Impuzamashyirahamwe y’Umupira w’Amaguru muri Afurika (CAF) wambuye iki gihugu Igikombe cya Afurika cya 2025, kigahabwa Maroc.

Iburanisha ry’uru rubanza riteganyijwe ku wa Kane, tariki ya 8 Ukwakira 2026, ku cyicaro cya CAS i Lausanne mu Busuwisi.

Ku wa 17 Werurwe 2026, Akanama gashinzwe Ubujurire muri CAF kemeje ko Sénégal yatsinzwe ku mpapuro ku mukino wa nyuma w’Igikombe cya Afurika cya 2025, maze umukino wandikwa ko warangiye ku ntsinzi ya Maroc ibitego 3-0. Uyu mwanzuro wari ushingiye ku ngingo ya 84 y’Amategeko agenga iri rushanwa.

Nyuma y’uyu mwanzuro, Ishyirahamwe ry’Umupira w’Amaguru muri Sénégal ryatangaje ko rizajurira muri CAS, maze ku wa 25 Werurwe 2026 CAS yemeza ko yakiriye ubujurire bwa FSF burega CAF n’Ishyirahamwe ry’Umupira w’Amaguru muri Maroc (FRMF).

Sénégal isaba ko umwanzuro wa CAF uhindurwa kandi ko ari yo yemezwa nk’uwatwaye Igikombe cya Afurika.

Ibi bikurikiranye n’umukino wa nyuma w’Igikombe cya Afurika cya 2025 wabereye i Rabat muri Maroc ku wa 18 Mutarama 2026, aho Sénégal yahuye na Maroc.

Nyuma y’uyu mukino, Komisiyo ishinzwe Imyitwarire muri CAF yafatiye ibihano Ishyirahamwe ry’Umupira w’Amaguru muri Sénégal, iry’Umupira w’Amaguru muri Maroc, ndetse n’abakinnyi n’abatoza bamwe, kubera ibyabaye mu mukino wa nyuma. Ibi bihano byatangajwe ku wa 28 Mutarama 2026.

Mu mwanzuro wayo wo ku wa 17 Werurwe, Akanama gashinzwe Ubujurire muri CAF katesheje agaciro umwanzuro wa Komisiyo y’Imyitwarire, gashyigikira ikirego cya Maroc kandi gateganya ko Sénégal iterwa mpaga ku mukino wa nyuma, Maroc ikandikwa nk’iyatsinze ibitego 3-0.

Ubu impaka z’iki kibazo ziri imbere ya CAS, aho Sénégal ishaka ko uwo mwanzuro wa CAF uhindurwa. Iburanisha rizaba ku wa 8 Ukwakira 2026 i Lausanne, mu gihe umwanzuro wa nyuma wa CAS uzatangazwa nyuma y’iburanisha hakurikijwe imigendekere y’urubanza.

Ba uwa mbere mu kumenya amakuru agezweho!!!