Abanyabigwi muri Barbados bemeye gufasha u Rwanda guteza imbere cricket
Amakuru

Abanyabigwi muri Barbados bemeye gufasha u Rwanda guteza imbere cricket

Imvaho Nshya

April 18, 2022

Mu ruzinduko rw’iminsi ibiri Perezida w’u Rwanda, Paul Kagame yagiriye muri Barbados, taliki 16 Mata 2022 yagiranye ibiganiro n’abanyabigwi mu mukino wa Cricket bamwizeza ubufasha mu guteza imbere uyu mukino mu Rwanda binyuze mu gutoza.

Perezida Kagame ari kumwe na Minisitiri w’Intebe wa Barbados, Madamu Mia Amor Mottley bahuye n’abanyabigwi batandukanye mu mukino wa Cricket muri iki gihugu  barimo  Sir Garfield St Aubrun Sobers “Sir Gary Sobers”, Sir Wesley Winfield Hall, Sir Cuthbert Gordon Greenidge, Joel Garner na Ian David Russell Bradshaw  ukuriye ihuriro ry’aba banyabigwi ndetse na Perezida w’ishyirahamwe ry’umukino wa Cricket muri Barbados,  Conde Riley.

Aba banyabigwi, Sir Gary Sobers na Sir Wesley Winfield Hall bashyikirije Perezida Kagame impano.

Minisitiri w’Intebe wa Barbados, Madamu Mia Amor Mottley abinyujije ku rubuga rwa “Instagram” yagaragaje ko hashize igihe u Rwanda rutangiye gahunda yo guteza imbere umukino wa Cricket bigizwemo uruhare na Perezida Paul Kagame.

Perezida Kagame (ibumoso) ari kumwe na Minisitiri w’Intebe wa Barbados, Madamu Mia Amor Mottley

Yakomeje agira ati: “Muri Barbados, uyu mukino umaze imyaka irenga 100 ukinwa, ibyakozwe rero u Rwanda rwabyigiraho mu guteza imbere uyu mukino. Perezida Kagame yagiranye ibiganiro bishimishije n’abanyabigwi bacu ku byerekeye iterambere rya Cricket mu Rwanda”.

Amateka agaragaza ko umukino wa Cricket watangiye gukinwa muri Barbaso mu myaka ya 1806. Barbados ni kimwe bihugu bigize West Indies ibumbira hamwe ibirwa  bitandukanye igaseruka nk’ikipe imwe ndetse ikaba yaregukanye igikombe cy’Isi  inshuro 5.

Ku ruhande rw’u Rwanda, umukino wa Cricket watangiye gukinwa mu 1999 nyuma mu mwaka wa 2000 hashyirwaho ishyirahamwe ry’uyu mukino mu Rwanda “RCA”, muri 2003 ryemerwa mu ishyirahamwe mpuzamahanga ry’umukino wa Cricket “ICC”.

Mu myaka 23 uyu mukino umaze hari ibikorwa byinshi bigaragara by’iterambere birimo ibikorwa remezo nka Sitade mpuzamahanga ya Gahanga iri mu zinza muri Afurika n’ibindi bitandukanye. 

Kubera guharanira iterambere ry’umukino wa Cricket, muri 2018 u Rwanda rwahawe ibihembo 2 birimo “Spirit of Cricket Award”, igihembo  gihabwa umuntu wakoresheje umukino wa Cricket  mu kwegera abaturage bakabafasha binyuze muri uyu mukino ndetse na  “Best Women’s Cricket Initiative, igihembo gihabwa abakoze igikorwa gishimishije mu cyiciro  cy’abagore. 

Muri 2019, u Rwanda rwahawe igihembo cy’imiyoborere myiza mu rwego rw’Afurika “Good governance  Award” ndetse n’igihembo kubera  gahunda yo gufasha abagore kwitabira Cricket “100% Cricket Female Participation Programme Of the Year Award”.

Inshamake ku banyabigwi bashyikirije impano Perezida Kagame 

Sir Garfield St Aubrun Sobers “Sir Gary Sobers” ubu ufite imyaka 85 y’amavuko. Akiri muto yagaragazaga impano muri Cricket, umupira w’amaguru ndetse na Basketball gusa ku myaka 13 nyuma yo kwitwara neza mu mikino ihuza amashuri yaguzwe n’ikipe ye yakinaga shampiyona ya Barbados “Kent St Philip club”.

Sir Gary Sobers nyuma gushyikiriza impano Perezida Paul Kagame

Sir Gary Sobers ni umwe mu bakinnyi bake bari bafite ubuhanga icyarimwe mu gutera agapira “Bowling”, gukubita agapira ushaka amanota “Batting” ndetse no mu kibuga hagati mu kugarura imipira no kuyisama “Field”.

Ku myaka 17 mu 1954 ni bwo yatangiye gukina imikino mpuzamahanga ahagarika mu 1974.  Yakiniye ikipe y’igihugu ya Barbados (1952-1974), ikipe ya South Australia (1961-1964), Nottinghamshire yo mu Bwongereza (1968–1974) n’ikipe ya West Indies (1954–1974).

Muri rusage, Sir Gary Sobers yakinnye imikino 572 aho yatsinze amanota 39067. Yateye udupira “Bowling” 96838 akuramo abakinnyi “Wickets” 1388.

Sir Wesley Winfield Hall ubu afite imyaka 84 y’amavuko. Yatangiye gukina imikino mpuzamahanga muri Cricket mu 1955. Yahagaritse gukina mu 1970. Yakoze imirimo inyuranye mu buyobozi bw’igihugu aho yabaye umusenateri, Minisitiri w’Ubukerarugendo.

Sir Wesley Winfield Hall ashyikiriza Perezida Kagame agapira bakinisha Cricket

Sir Wesley Hall yakiniye amakipe atandukanye arimo Barbados (1955-1971), Queensland muri Australia (1961-1963), Trinidad (1966-1970) na West Indies (1958-1969).

Muri rusange, Sir Wesley Hall yakinnye imikino 220 atsinda amanota 3492. Yateye udupira “Bowling” 38624. Yakuye abakinnyi mu kibuga “Wickets” 741.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA