Dore abazagobokwa mu cyiciro cya 2 cy’Ikigega Nzahurabukungu
Amakuru

Dore abazagobokwa mu cyiciro cya 2 cy’Ikigega Nzahurabukungu

NTAWITONDA JEAN CLAUDE

May 18, 2022

Guverinoma y’u Rwanda yatangije icyiciro cya kabiri cy’Ikigega Nzahurabukungu (Economic Recovery Fund) cyashyizweho mu kuzahura ubukungu bwashegeshwe na COVID-19, kikaba  cyarashowemo miliyari 250 z’amafaranga y’u Rwanda.

Iki kigega ni kimwe mu ngamba Leta y’u Rwanda yafashe mu guhangana n’ingaruka z’iki cyorezo haba mu mibereho y’abaturage, mu buzima ndetse n’ubukungu. Cyashyizweho kugira ngo gitabare inzego z’ubukungu z’abikorera zagizweho ingaruka n’icyorezo ku buryo bw’umwihariko.

Uyu munsi ku wa 18 Gicurasi 2022, ubwo hatangizwaga ku mugaragaro iki cyiciro cya 2, Minisitiri w’Imari n’Igenamigambi Dr Ndagijimana Uzziel, yasobanuye uburyo ariya mafaranga azakoreshwa.

Yavuze ko hari icyiciro gishya kitari mu byafashijwe mbere kirebana n’imishinga mishya yagenewe miliyoni 150 z’amadolari ni ukuvuga amafaranga y’u Rwanda agera kuri miliyari 150. Ni imishinga yatoranyijwe bigaragara ko izagira uruhare mu kuzahura no kwihutisha ubukungu ndetse no guhanga imirimo mishya.

Yakomeje agira Ati: “Hari ibyiciro byari bisanzweho na byo bikomeza gushyigikirwa muri iki cyiciro cya kabiri; harimo amafaranga yagenewe biriya bikorwa bito cyane  angana na miliyoni 8 z’amadolari( miliyari 8Frw), amafaranga yo gukoresha (working capital) miliyoni 10 z’amadorali, ikigega cya BDF cyongerewe ubushobozi  bwo gutanga ingwate ku nguzanyo cyagenewe miliyoni 30 z’amadolari (miliyari 30Frw) ubu kikaba kizafasha amasosiyete manini mu gihe mbere cyafashaga amatoya”.

Minisitiri Dr Ndagijimana yavuze ko hari na gahunda yo gufasha amasosiyete afite imyenda kugira ngo ashobore kwishyura. Iki cyiciro cyagenewe miliyoni 32 z’amadolari. Hari n’amafaranga yo kubaka ubushobozi bw’ibigo bishinzwe gushyira mu bikorwa iyi gahunda y’ikigega.

Yanasobanuye ko hari amafaranga agera kuri miliyoni 18 z’amadolari yo kwifashisha mu bikorwa bya buri munsi bitandukanye by’abikorera arimo miliyoni 8 zigenewe ibikorwa bito bito biri hirya no hino mu Gihugu, ababifite bafite amahirwe yo kubona inguzanyo iri hasi ya 8%, bagahabwa inguzanyo zishyurwa mu myaka igera kuri 5 bitewe n’icyo bashaka kuzikoresha, bagahabwa n’igihe gisonewe cyo kutishyura kugira ngo bisuganye.

Aba bashobora kuguza kugera kuri miliyoni 5 z’amafaranga yu’u Rwanda bagahabwa ingwate na BDF. Amasosiyetse acuruza kugera kuri miliyoni 500 z’amafaranga y’u Rwanda ku mwaka na yo ahabwa inguzanyo ku nyungu ya 8%, ashobora kuguza kugera kuri miliyoni 300, agahabwa n’ingwate kuva kuri 50% kugera kuri 75%.

 Yakomeje agira ati: “Amasosiyete  aciriritse afite igicuruzo kiri hagati ya  miliyoni 500 kugera kuri miliyari 1 ku mwaka, ashobora kuguza kugera kuri miliyoni 300 z’amafaranfa y’u Rwanda ku nyungu ya 8%, ariko yarenzaho, arenzeho akayahabwa ku nyungu za banki aho yagujije”.

Umuhango wo gutangiza iki kigega witabiriwe n’abahagarariye inzego zitandukanye, unakurikirwa n’Abanyarwanda imbonankubone mu bitangazamakuru

Minisitiri Dr Ndagijimana yavuze ko amasosiyete manini acuruza hejuru ya miliyari imwe kuzamura  ku mwaka, abona inguzanyo zigera kuri miliyoni 300 z’amafaranga y’u Rwanda kuri iriya nyungu, yaguza  arenzeho akayabona ku nyungu za banki yagujijemo, akabona n’ingwate kugera kuri 50%.

Ibipimo bikurikizwa mu guhitamo sosiyete zifashwa

Hari igipimo kigenderwaho cyo kureba ko sosiyete yagizweho ingaruka ziremereye za COVID-19.  Minisitiri Dr Ndagijimana yasobanuye ko mu cyiciro cya mbere cy’iki kigega bagezaga ku  gihombo cya 30%  bakurikije icyo umuntu yinjije mu bucuruzi, bakagereranya uko byari bimeze mbere  no mu gihe cy’icyorezo.

Ati: “Abenshi bamaze gufashwa, ubu icyo gipimo cyaramanuwe kigera kuri 20%”.  Aha hanarebwa ubucuruzi umuntu agiye gukora n’ubushobozi bwo  kwishyura.

Ku bijyanye n’imishinga mishya ishobora kuzamura ubukungu mu buryo bwihuse kandi ikabyara n’imirimo, yavuze ko hatoranyijwe urwego rw’inganda n’ibizishamikiye, n’ibikorwa bijyana na zo(value chain).

Ati: “Ibi bigamije kuzamura umusaruro w’imbere mu gihugu no kongera ubudahangarwa bw’ ubukungu ku  bibazo binyuranye bituruka hanze y’Igihugu”.

Aha na ho abafite ibikorwa bito bito cyane bashobora kubona inguzanyo ya 8%, bakaba bashobora gukora umushinga ugeze ku myaka 15, bagasonerwa igihe cyo kutishyura inguzanyo kigera ku myaka 3 no kuguza kugera kuri miliyoni 500, bagahabwa n’ingwate.

Ku masosiyete aciriritse, igice kimwe kingana na 60% azakibona kuri iriya nyungu yavuzwe haruguru, igice gisigaye bagihabwe ku nyungu za banki, bakabona n’ingwate ya 50%. Ibi kandi bireba n’amasosiyete manini uretse ko yo ashobora kuguza kugera miliyari 5 mu gihe andi ageza kuri miliyari 2.

Aya mafaranga azanyuzwa uri BRD izatanga inguzanyo ya 35%, andi akanyuzwa mu mabanki  atandukanye.  Hazakomeza no gufashwa amasosiyete afite imyenda iremereye n’ibibazo byo kwishyura.

Ibyagezweho mu cyiciro cya mbere cy’ikigega ERF

Minisitiri w’Imari n’Igenamigambi, Dr. Ndagijimana Uzziel yagarutse ku byagezweho mu gushyira mu bikorwa icyiciro cya mbere cy’Ikigega Nzahurabukungu, avuga ko iki kigega cyatangiranye amafaranga agera kuri miliyoni 100 z’amadolari ni miliyari 100 z’amafaranga y’u Rwanda.

Yasobanuye uburyo ikigega cyakoreshejwe mu byiciro bitatu; harimo gufasha amasosiyete y’abikorera yari afite imyenda muri za banki kugira ngo atananirwa kwishyira kandi n’izo banki zikagerwaho n’ ingaruka zo kudashobora kugaruza ayo mafaranga zatanzeho inguzanyo. Harimo kandi amafaranga yo gukoresha mu bucuruzi mu buryo bwa buri munsi ndetse n’ingwate ku nguzanyo zitangwa n’ikigega cya BDF.

Amahoteli n’ibindi bikorwa bijyanye no kwakira inama byahawe miliyari zisaga 52, amashuri yigenga na yo yarafashijwe aho agera kuri 69 yahawe miliyari zisaga 12 z’amafaranga y’u Rwanda. Urwego rw’abatwara abantu mu buryo bwa rusange na rwo rwarafashijwe; amasosiyete agera kuri 55 yahawe miliyari zisaga 7 z’amafaranga y’u Rwanda yakoreshejwe mu bijyanye n’ikibazo cy’imyenda muri za banki.

Amafaranga asaga miliyari 11 yakoreshejwe mu bikorwa by’ubucuruzi; yafashije  amasosiyete agera ku 157 mu nzego zitandukanye haba mu burezi, mu buzima,  mu nganda, resitora, ubuhinzi n’ibindi.

Binyuze muri za SACCO na BDF, ibigo bito bito na byo byarafashijwe ku buryo byakoresheje miliyari 6.7 z’amafaranga y’u Rwanda. Ibyo bikorwa bito bito byafashijwe bigera ku 6715.

TANGA IGITECYEREZO

  • Bisangwa segasagara emmanuel
    May 18, 2022 at 11:37 pm Musubize

    Muzanyibuke nanjye dorenarahombye ndataha burundu. Natanze ingwate nyigurisha amafaranga makeya kuberako inguzanyo yarimaze kwikuba 2

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA