Dore inyungu zizanye no gukorera ibizamini by’akazi kuri mudasobwa
Amakuru

Dore inyungu zizanye no gukorera ibizamini by’akazi kuri mudasobwa

Imvaho Nshya

March 18, 2022

Ibibazo byinshi byakundaga kuvuka ku basaba akazi mu bigo bitandukanye bya Leta, bitewe n’uko bamwe baba baramenyereye gukoresha mudasobwa mu byo bandika zigatuma bibagirwa kunoza umukono wabo mu gihe bandikisha ikaramu, abandi bakandikana igihunga bigatuma bashyira amakosa menshi mu byo bandika.

Hari n’abandikaga ibidasomeka bikaba byatuma ubakosora agenekereza cyangwa se akabima ananota bakabaye babonye bitewe n’uko atabashije gusoma umukono ngo yumve icyo bashakaga kwandika.

Kuri uyu wa Gatanu, ni bwo Minisiteri y’Abakozi ba Leta n’Umurimo (MIFOTRA), yatangaje ko nta kigo cya Leta kizongera gukoresha ibizamini by’akazi byo kwandika hadakoreshejwe ikoranabuhanga, mu rwego rwo kwirinda impugenge z’uburiganya zagendaga zigaragazwa n’abapiganira imyanya y’akazi.

Guhera mu kwezi kwa Mata 2021, ni bwo ikoranabuhanga ryifashishwa mu gushaka abakozi ba Leta (E-recruitment system) ryatangiye gukoreshwa nk’uko biteganywa n’Iteka rya Perezida N°128/01 ryo ku wa 03/12/2020 ryerekeye Gushaka Abakozi ba Leta n’Amahugurwa ahabwa Abakozi bagitangira akazi.

MIFOTRA ivuga ko iryo koranabuhanga ryazanye n’inyungu nyinshi kuko ari uburyo buboneye kandi bwizewe bwo gushaka no gushyira mu myanya Abakozi ba Leta.

Muri izo nyungu harimo kuba sisitemu ya E-recruitment yaroroheje imikorere n’uburyo bwo gushaka abakozi, kugabanya akazi kakorwaga n’umuntu mu gihe cyo gukosora, kugabanya igihe igikorwa cyo gukosora cyamaraga n’ikiguzi cy’amafaranga yatangwaga mu gushaka no gushyira mu myanya Abakozi ba Leta, no kugabanya ikiguzi cy’amafaranga yatangwaga n’abashaka akazi. Ibyo bijyana no kongera icyizere cyo gukosora nta kubogama, n’ibindi.

Inzego nyinshi za Leta zikoresha iyi sisitemu mu gihe cyo gushaka abakozi. MIFOTRA ivuga ko iryo koranabuhanga ari ryo ryafashije gushaka no gushyira mu myanya abarimu n’abayobozi b’ibigo by’Amashuri bikozwe n’Ikigo cy’Igihugu gishinzwe Uburezi mu Rwanda (REB).

REB yashyize ku isoko imyanya 99 y’akazi hagamijwe gushaka abakozi 11,942. Ibizamini byakozwe neza. Mu basabye akazi 79,837, muri bo 60,782 ni bo batoranyijwe, abakandida 10,041 batsinze ibizamini. Ibi byakozwe mu gihe gito kandi bikorwa neza.

Ubusabe bw’akazi binyuze muri sisitemu bwari 541,955 (applications), abemerewe gukora ibizamini 245,000 (shortlisted), ababonye akazi muri abo bose ni 12,041 (employed).

Kugeza ubu inzego za Leta 44 zimaze gukoresha ibizamini by’akazi zikoresheje iyi sisitemu, ku myanya 1865.

Imbamutima z’abakoresha ikoranabuhanga rya e-recrutiment

Abanyarwanda batandukanye bashimye cyane ubu buryo bavuga ko bworoheje gahunda yo gusaba akazi, ndetse bikanatanga icyizere ko ntawushobora kubura akazi kubera amarangamutima y’uwakosoye utakunze imyandikire y’uwakoze ikizamini.

Bimenyimana Amime, warikoresheje asaba akazi k’ubwarimu, yagize ati: “Ubundi kwandikisha ikaramu hari n’igihe umuntu aba afite igihunga bigatuma yandika nabi ariko ikoranabuhanga ryo uba ufite amahirwe yo gusiba ibyo wanditse nabi ukabyandika neza ku buryo budateza umwanda mu byo wanditse. Ikoranabuhanga ni ryiza cyane nabonye bitandukanye n’uko twakoraga mbere.”

Ikindi abenshi bahurizaho ni uko iri koranabuhanga ryagabanyije amafaranga batangaga ku itiki bagiye gusaba akazi, n’ayo batangaga bajya gufotoza ibyangombwa.

Bishimira ko iyi gahunda yimakaje gukorera mu mucyo kuko umuntu akosorwa n’ikoranabuhanga, bagashima ko umukandida ataha azi amanota yagize bitandukanye na mbere aho abantu bategerezaga igihe kirekire;

Ikindi abenshi bishimira ni uko iri koranabuhanga ryagabanyije ruswa yajyaga ivugwa hamwe na hamwe

Uko Ikoranabuhanga rikora

Minisiteri y’Abakozi ba Leta n’Umurimo ivuga ko muri rusange, gushaka no gushyira mu myanya Abakozi ba Leta bikurikiza inzira imwe yateganyijwe.

Umukandida ushaka akazi arabanza akiyandikisha muri sisitemu hakoreshejwe indangamuntu ye (ID), noneho ikoranabuhanga rigahuza imyirondoro ye n’ibisabwa ku mwanya w’umurimo.

Urwego rwa Leta rushaka umukozi  ushyirwa mu mwanya rutangaza (muri sisitemu) umwanya w’umurimo ukenewemo umukozi, ibisabwa kuri uwo mwanya ndetse n’inshingano.

Iryo tangazo riba ririmo inyito y’umwanya w’umurimo; urwego rw’umurimo n’umubare w’imyanya y’umurimo ishakirwa abakozi; ibisabwa ku mwanya w’umurimo n’inshingano bijyanye; n’umunsi ntarengwa wo gutanga dosiye zisaba akazi.

Umunyamabanga Uhoraho w’agateganyo muri MIFOTRA Abimana Fidèle, avuga ko umutekano w’iri koranabuhanga wizewe ku buryo ntawushobora gukopera yifashishije murandasi.

Yagize ati: “Iyo wafunguye ipaji y’ikizamini, sisitemu iteguye ku buryo imashini itakwemerera kugira ikindi wafungura yaba inyandiko ziri kuri iyo mudasobwa cyangwa kujya ku zindi mbuga nkoranyambaga ntibyemera, ikizamini kiza kuri mudasobwa kikakwereka ibibazo ugahitamo igisubizo nya cyo kiba kigizwe n’ibibazo  50 iyo umaze kubikora uhita ubona amanota ugisoza.”

Ahakorerwa ibi bizamini hagomba kuba hari mudasobwa zujuje ibisabwa, hari murandasi, umuriro w’amashanyarasi ndetse na moteri yakwifashishwa umuriro ugiye kugira ngo ikizamini kidahagarara.

TANGA IGITECYEREZO

  • Emmanuel
    March 19, 2022 at 1:37 pm Musubize

    Banashyireho interview kuri internet Kuko niho baturira bamwe tukibura amarangamutima ariyongera muri interview rwose nabyo mubyigeho harimo akarengane

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA