Dr. Ngirente yakomoje ku izamuka ridasanzwe ry’ibiciro mu Rwanda
Amakuru

Dr. Ngirente yakomoje ku izamuka ridasanzwe ry’ibiciro mu Rwanda

NTAWITONDA JEAN CLAUDE

March 16, 2022

Abenshi mu bakomeje guhura n’ingaruka z’izamuka ry’ibiciro mu Rwanda, bagiye bumva abacuruzi bababwira ko izo mpinduka zirimo guterwa n’igitero u Burusiya bwagabye kuri Ukraine, ariko ako ni nk’agatonyanga mu Nyanja ku cyateye ibibazo by’itumbagira ry’ibiciro ku bicuruzwa binyuranye.

Hari bamwe byagoraga kumva uburyo  intambara yo muri Ukraine yagize ingaruka no ku birayi cyangwa imboga rwatsi zera mu Rwanda, ariko hari igisubizo cyimbitse gisobanura uburyo ibyo biciro bitapfuye kuzamuka mu ijoro ngo bucye byabaye.

Ikibazo cy’izamuka ry’ibiciro nticyihariwe n’u Rwanda gusa kuko isoko mpuzamahanga rimaze igihe rihungabanye, umuzi wabyo ukaba ari icyorezo cya COVID-19 cyateje impinduka mu bukungu zitari zitezwe ku Isi.

Minisitiri w’Intebe Dr. Edouard Ngirente, yagarutse ku mpamvu zateye izamuka ry’ibiciro ryajyanye n’ihungabana ry’ubukungu mu ruhando mpuzamahanga no mu Rwanda by’umwihariko.

Mu kiganiro Minisitiri w’Intebe na bamwe mu bagize Guverinoma bagiranye n’abanyamakuru cyibanze ku bukungu no kuzahuka k’ubukungu nyuma y’icyorezo cya COVID-19, ni bwo yasabye Abanyarwanda gusobanukirwa byimbitse impinduka zabaye mu bukungu zatangiye kubakoraho binyuze mu izamuka ry’ibiciro.

Yavuze ko COVID-19 yaje itunguranye yarogoye ubuhahirane mpuzamahanga, za Guma Mu Rugo nyinshi zituma abantu bamara igihe kinini badakora, habaho igabanywa ry’abakozi, ikiguzi cy’ubwikorezi mpuzamahanga (shipping cost) kirazamuka ku buryo ibintu bigomba kuva mu gihugu bijya mu kindi byajemo ibibazo byinshi.

Ati: “Mwumvise ibyo bise kontineri aho n’iyo wagura ibintu kubipakira byashoboraga kukugora, ndetse wanabipakira bigatinda mu nzira. Icyo kibazo kiri mu byagize ingaruka ku rwego rw’ubucuruzi n’imihahirane ku Isi ariko noneho kigira ingaruka zikomeye ku Rwanda nk’igihugu [kidakora ku Nyanja], kiri kure y’aho tweza ibintu byinshi.”

Yakomeje atanga urugero rw’uko mu gihe kontineri yashoboraga gukodeshwa amadolari y’Amerika 1500 kugira ngo ive mu Bushinwa igere mu Rwanda mbere ya COVID-19, ubungubu iri hagati y’Amadolari y’Amerika 8000 na 10,000. Ibyo ngo bigira ingaruka ziremereye cyane ku bukungu n’ibiciro biri ku isoko, kuko usanga abacuruzi bashobora gukomeza ubucuruzi bwabo gusa ari uko bashatse uko babona ayo mafaranga mu baguzi.

Dr. Ngirente yanagarutse ku biciro by’ibikomoka kuri Peteroli byatumbagiye cyane mu gihe cya COVID-19 na byo bikaba biri mu byabaye imbarutso y’ukwiyongera kw’ibicuruzwa birimo n’iby’ingenzi bikorerwa mu Rwanda.

Ati: “Urugero nabaha ni uko nk’igiciro cy’akangunguru muri uyu mwaka wa 2022 kigeze ku madolari 123 muri uku kwezi, ariko wareba mu mwaka wa 2020 muri icyo gihe akagunguru kari amadolari y’Amerika 63. Murumva ko cyikubye kabiri. Ibyo bivuga ko iyo Peteroli izamutse turindira n’izindi ngaruka zose zijyanye na byo ariko hari n’ingamba nka Leta twafashe zatumye nubwo tugenda tubyumva mu mibereho yacu ariko bidakomerera cyane cyane umucuruzi n’umuguzi w’Umunyarwanda.”

Muri izo ngamba zashyizweho harimo kuba harashyizweho nkunganire ya Leta ku bikomoka kuri Peteroli, Leta y’u Rwanda igenda ishyira ku giciro mpuzamahanga guhera muri Gicurasi 2021. Ati: “Buri mezi abiri buriya tuvugurura igiciro cya Lisansi na mazutu tukareba ngo dushingiye ku biciro mpuzamahanga, amafaranga yakabaye angahe. Twagiye dushyiraho amafaranga nka Leta atuma igiciro cya peteroli na mazutu kitazamuka.”

Ashimangira ko ibyo bitakozwe kugira ngo byorohereze abafite imodoka gusa kuko binareba n’abandi bose batega imodoka rusange cyangwa bakoresha ibicuruzwa bitarwa n’amakamyo ya mafaranga ayashyira ku giciro cy’umugenzi cyangwa se akayashyira ku giciro cy’ibicuruzwa.

Hashyizweho izindi ngamba zinyuranye zijyanye no kuzahura ubukungu birimo Ikigega cyo kuzahura ubukungu cyiswe Economic Recovery Fund (ERF) gifasha inzego zose uhereye ku bukerarugendo, ukagera ku gutwara abantu mu buryo bwa rusange.

Hari kandi na Prorogaramu yihariye igenewe abanyenganda igamije korohereza mu buryo bufatika abatangiza inganda zitunganya ibikoreshwa nkenerwa mu buzima bwa buri munsi bw’Umunyarwanda, nk’ibikoresho by’isuku, ibiribwa n’ibindi bitandukanye.

Mu bindi byakozwe by’umwihariko ni ukorohereza abahinzi borozi kubona serivisi zitandukanye by’umwihariko ifumbire mvarugenda binyuze muri gahunda ya nkunganire, cyane ko ibiciro byayo byagiye bitumbakira kimwe nk’uko byagenze ku biciro by’ibikomoka kuri peteroli.

Ikindi hari nkunganire yongerewe mu buhinzi mu ifumbire. Ibiciro mpuzamahanga na byo byagiye bizamuka cyane nk’ibyo by’ibikomoka kuri peteroli ndetse bigaragara ko Leta idashyizemo amafaranga  byarushaho kugiraingaruka nyinshi ku mucuruzi n’umuhinzi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA