Dr Ngirente yifurije imirimo myiza  Musenyeri  Papias Musengamana wimitswe
Amakuru

Dr Ngirente yifurije imirimo myiza  Musenyeri  Papias Musengamana wimitswe

NTAWITONDA JEAN CLAUDE

May 14, 2022

Minisitiri w’Intebe Dr Ngirente Edouard yitabiriye umuhango wo kwimika Umusenyeri mushya wa Diyosezi ya Byumba Papias Musengamana amwifuriza imirimo myiza, anashima uruhare  Kiliziya Gatolika igira mu iterambere ry’Igihugu.

Muri uyu muhango wabereye muri Sitade ya Byumba,  uyu munsi ku wa 14 Gicurasi 2022, Minisitiri w’Intebe Dr Ngirente yagize ati: “Icyizere wagiriwe na Nyiricyubahiro Papa Francis, ni ikimenyetso cy’ubushobozi yakubonyemo, bikwiye kukongerera imbaraga mu nshingano wahawe”.

Umuhango wo kwimika Musenyeri Mushya wa Diyosezi ya Byumba Papias Musengamana

Yakomeje  ashima ubufatanye Kiliziya Gatolika igirana na Leta y’u Rwanda agira ati: “Twe nka Leta  twemera  ko Kiliziya Gatolika ari umufatanyabikorwa mwiza udufasha gushyira mu bikorwa gahunda zigamije imibereho myiza y’abaturage no kuzuza inshingano zituma Igihugu kigira imibereho myiza”.

Minisitiri w’Intebe Dr Ngirente yagarutse kuri ubwo bufatanye by’umwihariko  ibikorwa  byaranze  Musenyeri Nzakamwita  Seriviliyani wayoboraga  Diyosezi ya Byumba ugiye mu kiruhuko cy’izabukuru.

Ati: “ Twe nka Leta twaramubonye cyane mu rwego rw’uburezi, henshi yagiye adutumira kwitabira ibikorwa by’urubyiruko abiteza imbere kuko yemeraga ko urubyiruko nk’uko natwe tubyemera ari zo mbaraga z’Igihugu cyacu, twaramubonye mu bikorwa by’ubuzima ashakisha inkunga z’ibitaro ndavuga nk’ibitaro bya Kiziguro n’ibindi, aha yahuriyemo n’inzego z’ubuzima yerekana ko abaturage badafite ubuzima bwiza nta majyambere yagerwaho”.

Yakomeje avuga ko uyu Musenyeri yanagaragaye mu bikorwa byo kubaka umuryango.

Ati: “Natwe nka Leta twemera ko ubuzima bw’igihugu bwiza bushingira ku muryango aho tuvuka, umuntu akarerwa, agakura akavamo umwenegihugu mwiza. Ibijyanye n’isanamitima na byo yabigaragayemo cyane”.

Minisitiri w’Intebe Dr Ngirente yavuze ko na Musenyeri mushya  ugiyeho afitiwe icyizere, anasaba ko ibikorwa byiza byatangiye muri Diyosezi ya Byumba byakomeza Kiliziya Gatolika igakomeza kubigiramo uruhare;  birimo ibyo kwita ku rubyiruko, kurwanya igwingira mu bana, kurwanya ubuzererezi mu bana, gukemura ikibazo cy’abana bishora mu biyobyabwenge no gukomeza kwita ku burezi muri rusange.

Musenyeri Nzakamwita Seriviliyani wayoboye  Diyosezi ya Byumba mu gihe cy’imyaka 26, yavuze ko ubwo yayishingwaga yatangiranye abapadiri 3 none ubu ikaba ifite abagera ku 150.

Yashimye abakirisitu bamubaye hafi bakamufasha mu rugendo rutoroshye rurimo n’urushingiye ku mateka Igihugu cyanyuzemo; mu gihe cyo kwiyubaka nyuma ya Jenoside yakorewe Abatutsi, mu gihe cy’abacengezi, mu rwikekwe no kwishishanya no mu bukene.

Ibisubizo bikaba byarashatswe binyuze muri gahunda y’icyenurabushyo, isanamitima n’ubwiyunge.  Izi gahunda zikaba  zaratumye agirwa Umurinzi w’igihango.

Yakomeje avuga ko muri urwo rugendo rwo kwiyubaka asize umushinga yifuza ko wabonerwa  ubushobozi wiswe “Centre Imbabazi” ugamije gutanga amahugurwa ahoraho ku bumwe bw’Abanyarwanda, ubwiyunge n’isanamitima binyuze mu mikino inyuranye n’ibiganiro. Akaba asaba uruhare rwa buri wese mu kusa iki kivi.

Myr Papias Musengamana yijeje ko izi gahunda zatangijwe azakomeza kuzishyigikira afatanyije n’abakirisitu, abasaseridoti ndetse na Leta itarahwemye kugaragaza ubufatanye, kandi  ko  hazongerwamo n’izindi bizagaragara ko zikenewe.

Diyosezi ya Byumba ifite ubuso bwa km2 5100, ikorera mu Turere 5; Nyagatare, Gatsibo, Gicumbi, Rulindo na Burera. Ifite abakirisitu bagera ku bihumbi 800 ku baturage bagera kuri miliyoni 1 n’ibihumbi 700.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA