Ikigo Nyafurika gishinzwe kurwanya no gukumira indwara z’ibyorezo (Africa CDC) cyatangaje ko mu Burasirazuba bwa Repubulika Iharanira Demokarasi ya Congo (RDC) hongeye kugaragara icyorezo gishya cya Ebola, kimaze guhitana abantu 65.

Mu itangazo  Africa CDC yanyujije ku rukuta rwayo rwa X kuri uyu wa 15 Gicurasi 2026, yatangaje ku mugaragaro ko icyorezo cya Ebola cyagarutse mu Karere k’iburasirazuba bwa RDC isaba ibihugu byo mu Karere ka Afurika y’Iburasirazuba n’iyo Hagati kuryamira amajanja kuko iyi ndwara yandura vuba kandi igahitana abantu benshi.  

Africa CDC yatangaje ko iri gutegura inama izahuza ubuyobozi bwa RDC, Uganda, Sudani y’Epfo n’abandi bafatanyabikorwa, hagamijwe gushaka uko iki cyorezo cyakumirwa no gukumira ko cyambuka imipaka. Yavuze kandi ko mu Igerageza ry’ibanze ryakorewe mu Kigo cy’Igihugu cy’Ubushakashatsi ku Buzima (INRB) i Kinshasa ku bufatanye na Minisiteri y’Ubuzima, ryagaragaje ko mu bipimo 20 byafashwe, 13 byagaragayemo virusi ya Ebola.

Mu bantu 65 bamaze gupfa, bane muri bo ni abemejwe n’ibizamini ko bari banduye Ebola, mu gihe abandi bakekwaho kuba barayanduye. Hari kandi n’abandi bakekwaho iyi ndwara bagaragaye mu Murwa Mukuru w’Intara ya Ituri, Bunia, ariko ibizamini byo kubyemeza biracyategerejwe.

Nubwo ibi byatangajwe, Leta ya DR Congo ntiratangaza ku mugaragaro ko iki cyorezo cyagaragaye, gusa biteganyijwe ko habaho ikiganiro n’abanyamakuru kibisobanura. Ebola ni indwara ikomeye yagaragaye bwa mbere mu 1976 muri DR Congo, bikekwa ko yaturutse ku nyamaswa z’inyamabere zirimo uducurama, iyi ikaba ibaye inshuro ya 17 RDC ikubiswe n’iki cyorezo.

Inzego z’ubuzima zigaragaza ko iyi ndwara yandurira mu guhura n’amatembabuzi y’umubiri w’uwanduye, kandi igatera kuva amaraso menshi ndetse no kwangirika kw’ingingo z’umubiri. Mu bimenyetso byayo bya mbere harimo umuriro, kubabara mu ngingo, umunaniro, kubabara umutwe no kubabara mu muhogo. Kugeza ubu, nta muti uvura Ebola uraboneka burundu.

Mu myaka 50 ishize, indwara ya Ebola imaze guhitana abantu bagera ku 50,000 hirya no hino muri Afurika. Icyorezo gikomeye kurusha ibindi muri RDC cyabaye hagati ya 2018 na 2020, gihitana abantu hafi 2,300.

Mu mwaka ushize na bwo, abantu 45 bahitanywe na Ebola mu ntara ya Kasai yo hagati. Abashinzwe ubuzima bakomeje gusaba abaturage kwitwararika, gukurikiza amabwiriza y’isuku no kwirinda kwegera abarwayi, mu rwego rwo gukumira ikwirakwira ry’iyi ndwara yica vuba.

Ba uwa mbere mu kumenya amakuru agezweho!!!