Dynamo y’i Burundi yanze kwambara ‘Visit Rwanda’ yasezerewe muri BAL 2024
Amakuru

Dynamo y’i Burundi yanze kwambara ‘Visit Rwanda’ yasezerewe muri BAL 2024

SHEMA IVAN

March 12, 2024

Ikipe ya Dynamo BBC y’i Burundi yasezerewe mu mikino ya Africa Basketball League (BAL 2024) kubera kwanga kwambara “Visit Rwanda” ku myambaro yayo kandi ari amategeko agenga iri rushanwa.

Mu itangazo Umuyobozi mukuru wa BAL Amadou Gallo Fall yashyize hanze kuri uyu wa Kabiri tariki 12 Werurwe 2024 yatangaje ko iyi kipe yasezerewe kubera kutubahiraza amategeko agenga irushanwa.

Ati: “Dynamo Basketball Club y’i Burundi yongeye kwanga gukurikiza amategeko n’ibisabwa muri BAL ndetse n’ibigenga imyenda, bityo iterwa mpanga mu mukino w’uyu munsi na Petro de Luanda yo muri Angola ndetse no kwitabira BAL 2024.”

Amategeko ya BAL avuga ko ikipe itewe mpaga ebyiri igomba guhita isezererwa muri iri rushanwa ako kanya. Yahise iba ikipe ya mbere ikuwe mu irushanwa.

Si ibyo gusa kuko iyi kipe ishobora no guhita ihagarikwa muri iyi mikino ihuza ibigugu byo muri Afurika mu myaka itanu iri imbere no kwishyura amande y’ibihumbi 500 by’amadolari y’Amerika.

Iki cyemezo kije gukirikira mpanga iyi kipe yatewe ku Cyumweru tariki 10 Werurwe 2024, ku mukino yari ifitanye na FUS Rabat yo muri Maroc kubera kwanga gukurikiza amategeko agenga irushanwa n’imyambaro muri BAL 2024.

Ibi byaje byiyongera ku kuba ku wa Gatandatu, mu mukino ufungura iri rushanwa iyi kipe yatsinzemo Cape Town Tigers amanota 86-73 yayikinnye yahishe ijambo Visit Rwanda, riba imbere ku myambaro y’amakipe yose kuko ari umuterankunga mukuru w’iri rushanwa.

Ni ku nshuro ya mbere Dynamo BBC yari yitabiriye irushanwa rya BAL riri gukinwa ku nshuro ya kane.

Muri rusange, Guverinoma y’u Burundi yafashe icyemezo cyo kubuza Dynamo BBC kwambara imyambaro iriho Visit Rwanda kubera umwuka mubi umaze iminsi hagati y’u Rwanda n’u Burundi, byanatumye bufata umwanzuro wo gufunga imipaka.

U Burundi bushinja u Rwanda gufasha umutwe wa RED Tabara ubarizwa mu Burasirazuba bwa Congo, mu gihe u Rwanda rubihakana rukagaragaza ko ari urwitwazo ku bibazo icyo gihugu gifite kidashaka gukemura gihereye mu mizi.

TANGA IGITECYEREZO

  • Lg
    March 12, 2024 at 5:54 pm Musubize

    Ibiburaburyo biragwira ubwose ninde uhombye !!ahubwo babishyuze buli kimwe cyose cyabatanzweho niba gihari

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA